ཕྱི་ལོ་ ༢༠༢༠ ཟླ་ ༡ ཚེས་ ༣ རེས་གཟའ་པ་སངས།
![](https://www.bod.asia/wp-content/uploads/2020/01/1-555x370.jpg)
བོད་ཀྱི་སྐད་ཡིག་དང་ནང་དོན་རིག་པའི་ཟླ་དྲུག་ཟབ་ཁྲིད་ཐེངས་དྲུག་པའི་སྐུ་མགྲོན་རྣམ་པ་དང་། སློབ་གཉེར་བ་རྣམ་པ།
༄༅། །འདི་གར་བོད་མིའི་སྒྲིག་འཛུགས་ཆོས་རིག་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༡༩ ཟླ་ ༡༢ ཚེས་ ༣༡ ཉིན་རྒྱ་གར་ལྷོ་ཕྱོགས་ཧོན་སུར་རབ་རྒྱས་གླིང་དུ་རྟེན་གཞི་བྱས་པའི་རྒྱུད་སྨད་གྲྭ་ཚང་གི་གངས་ཅན་རིག་གནས་སློབ་གྲྭའི་ཚོགས་ཁང་དུ། བོད་མིའི་སྒྲིག་འཛུགས་ཆོས་རིག་ལས་ཁུངས་དང་དཔལ་ལྡན་རྒྱུད་སྨད་གྲྭ་ཚང་གི་གངས་ཅན་རིག་གནས་སློབ་གྲྭ་ཟུང་འབྲེལ་གྱི་གོ་སྒྲིག་འོག ཕྱི་ལོ་ ༢༠༡༩ ཟླ་ ༧ ཚེས་ ༡ ཉིན་ནས་ཚུགས་པའི་མཐོ་སློབ་ཐོན་པའི་སློབ་མ་རྣམས་ཀྱི་བོད་ཀྱི་སྐད་ཡིག་དང་ནང་དོན་རིག་པའི་ཟླ་དྲུག་ཟབ་ཁྲིད་ཐེངས་དྲུག་པ་ལེགས་གྲུབ་ཀྱི་མཇུག་སྡོམ་མཛད་སྒོ་ཚོགས་ཡོད།
དེ་ཡང་གོང་ཚེས་ཉིན་གྱི་སྔ་དྲོ་ཕྱག་ཚོད་ ༩།༣༠ ཐོག་མཇུག་སྡོམ་མཛད་སྒོའི་སྐུ་མགྲོན་གཙོ་བོ་ཕྱོགས་བཞུགས་བོད་མི་མང་སྤྱི་འཐུས་ཚེ་རིང་གཡུ་སྒྲོན་ལགས་དང་མི་འགྱུར་རྡོ་རྗེ་ལགས་རྣམ་གཉིས་ཀྱིས་གཙོས། ཧུན་སུར་རབ་རྒྱས་གླིང་གི་ས་གནས་འགོ་འཛིན་ཐུབ་བསྟན་ཚེ་རིང་ལགས་དང་། རྒྱུད་སྨད་གངས་ཅན་རིག་གནས་སློབ་གྲྭའི་སློབ་སྤྱི་སྔགས་རམས་པ་ཚེ་རིང་བཀྲ་ཤིས་ལགས་ཀྱིས་དབུས་དགེ་ལས་རྣམ་པ། ཆོས་རིག་འབྲེལ་ཡོད་ལས་བྱེད་ཀུན་དགའ་བྱམས་པ་ལགས། དམིགས་བསལ་སྐུ་མགྲོན་བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱི་སྲོལ་རྒྱུན་ཚན་པའི་འགན་འཛིན་དངོས་གྲུབ་བསྟན་པ་ལགས། ཟབ་ཁྲིད་པ་དང་ཟབ་སྦྱོང་བ་རྣམ་པ་བཅས་ཚང་འཛོམས་ཀྱིས་ཐོག་མར། བོད་རྒྱལ་ཁབ་ཆེན་པོའི་རྒྱལ་གླུ་ཕུལ་རྗེས་སློབ་དགེ་སྔགས་རམས་པ་ཡོན་ཏན་ལགས་ནས་མཛད་སྒོའི་ངོ་སྤྲོད་དང་ཟླ་དྲུག་ཟབ་སྦྱོང་ཀྱི་ལས་བསྡོམས་སྙན་སྒྲོན་གནང་གྲུབ་བསྟུན།
མཛད་སྒོར་ཕེབས་པའི་སྐུ་མགྲོན་རྣམས་ནས་བོད་ཀྱི་སྐད་ཡིག་དང་ནང་དོན་རིག་པར་དོན་གཉེར་སློབ་སྦྱོང་བྱེད་རྒྱུ་གལ་ཆེན་པོ་ཡིན་སྐོར་སོགས་ཀྱི་གསུང་བཤད་ཟབ་རྒྱས་གནང་ཡོད། དེ་བཞིན་སློབ་ཕྲུག་ཕོ་མོ་གཉིས་ནས་ཀྱང་ཟབ་ཁྲིད་རིང་གི་མྱོང་ཚོར་སྐོར་གསུངས་ཡོད།
སྐབས་དེར་ཟབ་ཁྲིད་འདིའི་མཐའ་མའི་ཡིག་རྒྱུགས་ཀྱི་གྲུབ་འབྲས་རྩེ་ཕུད་གསུམ་དང་། ཉེ་བའི་རྩེ་ཕུད་གསུམ་ལ་བྱ་དགའ་གསོལ་རས་དང་། སློབ་ཕྲུག་སྤྱི་ཡོངས་ལ་བསླབ་པ་མཐར་སོན་གྱི་ཕྱག་ཁྱེར་ཡང་གནང་ཡོད། ཕྱོགས་མཚུངས་ཆོས་རིག་ལས་ཁུངས་ནས་ཟབ་ཁྲིད་གནང་མཁན་འབྲེལ་ཡོད་དགེ་ལས་ཡོངས་ལ་ཐུགས་རྗེ་ལེགས་གསོལ་གནང་ཡོད།
སྤྱིར་ཟབ་སྦྱོང་འདི་ཐོག་མ་ཕྱི་ལོ ༢༠༡༤ ལོ་ནས་འགོ་བརྩམས་ཏེ་ད་བར་ཟབ་ཁྲིད་ཐེངས་ལྔ་ཚོགས་ཟིན་པ་དང་། ཐེངས་འདིའི་ཟབ་ཁྲིད་ཐེངས་དྲུག་པར་སློབ་གཉེར་བ་བཅུ་དགུས་མཉམ་ཞུགས་བྱས་ཡོད། སློབ་མ་ཚོས་ཟབ་སྦྱོང་འདིའི་བརྒྱུད་ནང་ཆོས་ཀྱི་གོ་རྟོགས་ཟབ་པོ་དང་བོད་ཀྱི་སྐད་ཡིག་ཡར་རྒྱས་ཕྱིན་པའི་སྐོར་གསུང་བཞིན་འདུག་པ་བཅས། །