༢༠༡༡ ཟླ་ ༥ ཚེས་ ༣༡ རེས་གཟའ་མིག་དམར།
༄༅། །ཕྱི་ལོ་ ༢༠༡༡ ཟླ་ ༥ ཚེས་ ༣༠ ཉིན་རྡ་ས་བཞུགས་སྒར་གངས་སྐྱིད་གསོལ་ཐབ་ཡང་སྟེང་ཚོགས་ཁང་དུ་འབྲས་སྤུངས་སྒོ་མང་བྱ་བྲལ་ཁང་ཚན་སྤྲུལ་སྐུ་གྲགས་པ་རྒྱ་མཚོ་ལགས་ཀྱིས་གོ་སྒྲིག་ཐོག་བསྟན་པ་དང་འགྲོ་བའི་ཕན་བདེ་སླད་བོད་ཀྱི་རིས་མེད་བླ་སྤྲུལ་རྣམས་མཉམ་རུབ་དང་ཆིག་སྒྲིལ་གྱི་སྔོན་འགྲོའི་ཚོགས་འདུ་ཚོགས་ཡོད།
དེ་ཉིན་སྔ་དྲོ་ཆུ་ཚོད་ ༨ ཐོག་སྐུ་མགྲོན་གཙོ་བོ་བཀའ་ཁྲི་ཟམ་གདོང་རིན་པོ་ཆེ་དང་། དམིགས་བསལ་སྐུ་མགྲོན་ཆོས་རིག་བཀའ་བློན་ཚེ་རིང་ཕུན་ཚོགས་མཆོག ཆོས་བརྒྱུད་ཆེན་པོ་བཞི་དང་གཡུ་དྲུང་བོན་དང་བཅས་པའི་བླ་སྤྲུལ་རྣམ་པའི་སྐུ་ཚབ་རྣམས་ལྷན་འཛོམས་ཐོག་སྐུ་མགྲོན་གཙོ་བོ་མཆོག་གི་སྣང་གསལ་ཞལ་ཕྱེ་གནང་རྗེས་གསོལ་ཇ་འབྲས་སིལ་ཕུལ། དེ་ནས་ཚོགས་འདུ་གཙོ་སྐྱོང་བས་ཚོགས་འདུའི་དགོས་དམིགས་བོད་སྤྱི་མཐུན་གྱི་བསོད་ནམས་གསོག་སླད་དང། དུས་དུས་སུ་དགེ་སྒྲུབ་སྐུལ་འདེད། དེ་བཞིན་རིས་མེད་བླ་སྤྲུལ་རྣམས་རྡོག་རྩ་གཅིག་སྒྲིལ་གྱི་སྣེ་ཁྲིད་ཐུབ་པ་ཡོང་ཆེད་ཡིན་སྐོར་ངོ་སྤྲོད་གནང་བསྟུན་སྐུ་མགྲོན་གཙོ་བོ་མཆོག་གིས་གསུང་བཤད་གནང་དོན། དེ་རིང་འདི་གར་ཕེབས་པའི་བླ༌སྤྲུལ་རྣམ་པའི་སྐུ་ཚབ་རྣམས་ལ་ངས་བཀའ་ཤག་དང་ང་རང་སྒེར་ངོས་ནས་འཚམས་འདྲིའི་བཀྲ་ཤིས་བདེ་ལེགས་ཞུ་གི་ཡོད། དེང་སྐབས་མང་གཙོའི་གནས་སྐབས་འདིར་ནུས་པ་ཡོད་པའི་བླ་སྤྲུལ་རྣམས་མཉམ་རུབ་གནང་སྟེ་བོད་མི་སྤྱི་བོ་གནམ་བསྟན་ཡོང་རྫོགས་ལ་བོད་སྤྱི་དོན་གྱི་བསོད་ནམས་གོང་འཕེལ་དང་ལས་ངན་སྦྱང་རྒྱུར་ནུས་པ་ཐོན་པའི་ཕྱག་ལས་གནང་ཐུབ་ན། དེའི་དབང་གིས་བོད་པའི་ཆབ་སྲིད་ཀྱི་འགྱུར་འགྲོས་ལ་ཤུགས་ཐེབས་ཀྱི་རེད་བསམ་གྱི་འདུག ཕྱི་ལོ་ ༢༠༡༦ དབར་བོད་མི་རིགས་ཀྱི་མ་འོངས་པའི་མདུན་ལམ་གནད་འགག་ཆེ་བའི་དུས་རབས་ཤིག་ཡིན། ཆོས་ཕྱོགས་ནས་བཤད་ན་ལྷ་དང་བླ་མའི་ལུང་བསྟན་ནང་དེ་ལྟར་ཡོང་གི་ཡོད། ཆོས་ལ་དད་པ་མེད་ཀྱང་སྐར་རྩིས་དང་གཡང་འཆར་ལ་ཡིད་ཆེས་ཡོད་མཁན་ཚོས་བལྟས་ན། རྒྱ་གར་སོགས་རྩིས་པ་མང་ཆེ་བས་ད་ལྟའི་གནས་སྐབས་ལ་འགྱུར་འགྲོས་འགྲོ་རྒྱུའི་དུས་ཚོད་གལ་ཆེན་པོ་ཞིག་ཡིན། དེའི་སྐབས་ལམ་འགྲོ་རྒྱུགས་པ་དང་བསོད་ནམས་ཀྱི་ཁྱོག་ན་བོད་ཀྱི་བདེན་མཐའ་གསལ་རྒྱུ་ཡོད་པ་ཙམ་མ་ཟད། བོད་ཙམ་མིན་པའི་འཇིག་རྟེན་སྤྱི་ཡོངས་ལ་དུས་རབས་བཟང་པོ་ཞིག་ཡོང་རྒྱུ་ཡིན་པའི་བསམ་ཚུལ་ཤོད་མཁན་ཡོད། དེ་ལྟར་རེ་བ་དོན་གནས་ཡོང་ཆེད་ང་ཚོས་ཆོས་དད་ཡོད་མཁན་ཚོས་ལྷག་བསམ་རྣམ་དག་གིས་བྱང་ཆུབ་སེམས་ཀྱི་རྩེ་ཟིན་པའི་ཐོག་སྤྱི་མཐུན་གྱི་བསོད་ནམས་གོང་འཕེལ་ཡོང་བའི་བྱ་བ་ཞིག་སྒྲུབ་ན་ཏན་ཏན་ཕན་ཐོགས་ཡོད། དེ་བཞིན་ཡུ་རོབ་དང་ཨ་རིར་དཔལ་འབྱོར་ཉམས་རྒུད་བྱུང་སྟེ་ལོ་གསུམ་ཙམ་འགྲོ་གི་ཡོད། ཆབ་སྲིད་དང་དཔལ་འབྱོར་གྱི་གནས་བབ་ཐོག་ནས་རྒྱ་ནག་ནང་འགྱུར་བ་ཆེན་པོ་འགྲོ་རྒྱུའི་དུས་ཚོད་སླེབ་ཡོད་པར་བསམ་བློ་འཁོར་གྱི་ཡོད།  དེའི་ངོས་ནས་བལྟས་པ་ཡིན་ནའང་བོད་པ་ཚོས་འབྱུང་འགྱུར་གྱི་གོ་སྐབས་དམ་བཟུང་བྱེད་རྒྱུ་དེ་གལ་ཆེན་པོ་རེད། ཆོས་ཕྱོགས་ཀྱི་སྡིག་སྤོང་དགེ་སྒྲུབ་བྱེད་རྒྱུའི་ལས་དོན་ཐོག་མང་ཚོགས་གཅིག་སྒྲིལ་བྱུང་ན་ཆབ་སྲིད་བྱེད་ཀྱི་མེད་ཀྱང་། གཅིག་སྒྲིལ་ནུས་པ་དེ་ཆབ་སྲིད་ཐོག་ལའང་ཏན་ཏན་མངོན་ཐུབ་པ་རང་བཞིན་ཡོང་རྒྱུ་ཞིག་ཡིན། བླ་སྤྲུལ་སྐུ་ནུས་ཡོད་མཁན་ཚོས་མཉམ་རུབ་ཐོག་སོའི་སོའི་རྗེས་འཇུག་སློབ་མ་ཚོ་བརྒྱུད་ནས་སྐུལ་ལྕག་བྱེད་རྒྱུ། དེ་ཡང་ཆབ་སྲིད་དང་དཔལ་འབྱོར་གྱི་འབྲེལ་བ་མེད་པར་ཆོས་ཕྱོགས་རང་གི་ཐོག་ལ་གོ་རྟོགས་འཕེལ་རྒྱུ་ཡོང་གི་རེད། ཅེས་སོགས་ཀྱི་གསུང་བཤད་གནང་རྗེས་དམིགས་བསལ་སྐུ་མགྲོན་མཆོག་གི་གསུང་བཤད་གནང་། དེ་རྗེས་དགའ་ལྡན་ཁྲི་རིན་པོ་ཆེ་མཆོག་གི་སྐུ་ཚབ་བྱ་དོ་རིན་པོ་ཆེ་ལགས་དང་། ས་སྐྱ་བདག་ཁྲི་རིན་པོ་ཆེ་མཆོག་གི་སྐུ་ཚབ་སྤྲུལ་སྐུ་བསོད་ནམ་རིན་ཆེན་ལགས། འཁྲུལ་ཞིག་རིན་པོ་ཆེ་མཆོག་གི་སྐུ་ཚབ་མཁན་པོ་སྙན་གྲགས་ལགས། རྒྱལ་བ་ཀརྨ་པ་རིན་པོ་ཆེ་མཆོག་གི་སྐུ་ཚབ་དར་རྒྱས་ལགས། སྨན་རི་ཁྲི་འཛིན་རིན་པོ་ཆེ་མཆོག་གི་སྐུ་ཚབ་དཀའ་རམས་པ་ཚེ་དབང་རྒྱལ་མཚན་ལགས་བཅས་ཚོགས་བཅར་རྒྱུན་ལས་རྣམས་ཀྱི་དགོངས་ཚུལ་ལྷུག་བརྗོད་གནང་སྟེ་གྲོས་གཞིའི་དོན་ཚན་ལ་བགྲོ་གླེང་དང་གྲོས་ཆོད་སྒྲོགས་སྦྱང་གནང་སྟེ་གྲོལ་ཡོད་པ་བཅས། །