ཕྱི་ལོ་ ༢༠༡༩ ཟླ་ ༡༢ ཚེས་ ༡༡ རེས་གཟའ་ལྷག་པ། 

༄༅། །ལྡི་ལི་བསམ་ཡས་གླིང་བོད་མིའི་ས་གནས་འགོ་འཛིན་ལས་ཁུངས་ནས་བཏང་གནས་ནང་འཁོད་དོན།  བོད་རྒྱལ་ལོ་ ༢༡༤༦ རབ་གནས་ས་ཕག་ལོའི་ཕྱི་ལོ་ ༢༠༡༩ ཟླ་ ༡༡ ཚེས་ ༡༠ རེས་གཟའ་མིག་དམར་ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ནོ་ཝེལ་ཞི་བདེའི་གཟེངས་རྟགས་འབུལ་བཞེས་མཛད་ནས་མི་ལོ་ ༣༠ ཧྲིལ་པོ་འཁོར་བའི་ཉིན་མོ་སྲུང་བརྩི་མཛད་སྒོའི་ཐོག་སྐུ་མགྲོན་གཙོ་བོར་བོད་མིའི་སྒྲིག་འཛུགས་ཀྱི་ནང་སྲིད་བཀའ་བློན་འཁོར་ལྷ་ཚང་བསོད་ནམས་སྟོབས་རྒྱལ་མཆོག་ཕེབས་འདུག  ཕྱོགས་མཚུངས་དོན་ཁང་གི་དྲུང་ཆེ་དང་། བཀའ་ཟུར་རྒྱ་རི་སྒྲོལ་མ་མཆོག་དང་ Shri Ashok Mendhe JI Vice Chairman of Foundation for  Ambedkar  དང་།  རྒྱ་གར་རྒྱལ་ཡོངས་ཀྱི་བོད་དོན་རྒྱབ་སྐྱོར་ཚོགས་པའི་སྤྱི་ཁྱབ་དྲུང་ཆེ། རྒྱུན་ལྡན་ནས་བོད་དོན་ལས་འགུལ་སྤེལ་མཁན་རྒྱ་གར་སྐུ་ཞབས་ Sandesh Meshram Ji དང་། དབུས་གཞོན་ནུ་ཚོགས་པའི་ཚོགས་གཙོ།  དབུས་ཆུ་བཞི་སྒང་དྲུག་གི་ཚོགས་གཙོ། རྒྱ་གར་སྐུ་མགྲོན་ཁག་གཅིག 

ཕྱོགས་མཚུངས་ལྡི་ལི་བསམ་ཡས་གླིང་ས་གནས་འགོ་འཛིན་གྱིས་གཙོས་འདི་གའི་ཁྱབ་ཁོངས་གཞུང་དང་གཞུང་འབྲེལ་མིན་པའི་ཚོགས་པ་ཁག་གི་ཚོགས་གཙོས་གཙོས་པའི་ཚོགས་མི་རྣམ་པ། དེ་བཞིན་སེར་སྐྱ་མི་མང་ལྔ་བརྒྱ་བརྒལ་བ་མཛད་སྒོར་ལྷན་བཞུགས་གནང་འདུག

སྐབས་དེར་སྐུ་མགྲོན་གཙོ་བོ་མཆོག་གིས་དུས་དྲན་དང་འབྲེལ་བའི་གསུང་བཤད་དང་སྦྲགས། དཔལ་ལྡན་བཀའ་ཤག་གི་ལྟ་གྲུབ་དགོངས་དོན་ལྟར་བསམ་ཡས་གླིང་ས་ཆ་དེ་བཞིན་སྒྲིག་འཛུགས་གཏན་ལྷིང་གནས་ཐབས་སུ་ཕྱི་མི་ལ་བཙོང་མི་ཆོག་པའི་ལམ་སྟོན་ཡང་གནང་ཡོད། དེ་ནས་རྟེན་འབྲེལ་མཚོན་ཆེད་དུ་སློབ་ཕྲུག་དང་མང་ཚོགས་ནས་གཞས་སྣ་ཁག་གཟིགས་འབུལ་ཞུས་ཡོད་པ་བཅས། །