༢༠༡༡ ཟླ་ ༥ ཚེས་ ༢༥ རེས་གཟའ་ལྷག་པ།
༄༅། །ཕྱི་ལོ་ ༢༠༡༡ ཟླ་ ༥ ཚེས་ ༢༤ ཉིན་རྡ་ས་བཞུགས་སྒར་རྡ་སྟེང་བོད་ཁྱིམ་ཚོགས་ཁང་ཆེན་མོར་བོད་གཞུང་མང་རྒྱལ་ཡོངས་ཚོགས་ཆེན་ཐེངས་གཉིས་པའི་མཇུག་བསྡོམས་མཛད་སྒོར་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་སྤྱི་འཐུས་ལྷན་ཚོགས་ཀྱི་གསུང་བཤད་གནང་དོན།
དཔལ་ལྡན་ཁྲིམས་ཞིབ་པ་རྣམ་པ་དང་། དཔལ་ལྡན་བཀའ་བློན་ཁྲི་པ་རིན་པོ་ཆེ་མཆོག་གིས་དབུས་བཀའ་བློན་རྣམ་པ། བཀའ་ཟུར་རྣམ་པ། རང་དབང་ཅན་གྱི་སྡེ་ཚན་ཁག་གི་འགན་འཛིན་རྣམ་པ། འདས་མ་འོངས་ད་ལྟ་གསུམ་གྱི་སྤྱི་འཐུས་རྣམ་པ། དེ་བཞིན་མི་མང་གི་སྐུ་ཚབ། དང་བླང་བ་རྒྱ་བལ་འབྲུག་གསུམ་དང་ཕྱི་རྒྱལ་ཡུལ་གྲུ་ཁག་ནས་ཕེབས་པ་ཚང་མར་དེ་རིང་མཇུག་བསྡོམས་མཛད་སྒོ་འདིའི་ཐོག་ནས་བོད་མི་མང་སྤྱི་འཐུས་ལྷན་ཚོགས་ཀྱི་ཚབ་ཞུས་ཏེ་འཚམས་འདྲི་དང་བཀྲ་ཤིས་བདེ་ལེགས་ཞུ་རྒྱུ་ཡིན། སོ་སོའི་མི་ཚེའི་ནང་ཚོགས་འདུ་གོ་སྒྲིག་ཞུ་རྒྱུའི་ལས་དབང་གང་ལ་གང་ཙམ་ཞིག་ཡོད་པ་ལྟར། བོད་ཀྱི་གྲོས་ཚོགས་དང་སྲིད་བྱུས་ཉམས་ཞིབ་ཁང་དུ་སྡོད་སྐབས་ཚོགས་འདུ་མང་པོ་ཞིག་གོ་སྒྲིག་ཞུ་རྒྱུའི་གོ་སྐབས་བྱུང་། དེ་བཞིན་སྤྱི་འཐུས་ལྷན་ཚོགས་སུ་ཚོགས་གཙོ་བྱེད་སྐབས་ཀྱང་གཞུང་མང་རྒྱལ་ཡོངས་ཚོགས་ཆེན་ཐེངས་གཉིས་ཙམ་ཞིག་ཆབ་སྲིད་ཀྱི་གནད་འགག་ཆེན་པོའི་ཐོག་ནས་གོ་སྒྲིག་ཞུ་རྒྱུའི་གོ་སྐབས་བྱུང་། ལྷག་པར་ད་རེས་ལྟ་བུར་ཆ་མཚོན་ན་ལོ་རྒྱུས་ཀྱི་དོན་སྙིང་ལྡན་པའི་ཚོགས་ཆེན་ཞིག་ཆགས་ཡོད་པ་མ་ཟད། བཅའ་ཁྲིམས་བསྐྱར་བཅོས་དང་༸གོང་ས་༸སྐྱབས་མགོན་ཆེན་པོ་མཆོག་གིས་སྐུ་དབང་མི་མང་ལ་རྩིས་སྤྲོད་མཛད་རྒྱུའི་དུས་ཚོད་དེ་འདྲ་ཞིག་གི་སྐབས་གང་འདྲ་ཞིག་ཆགས་ཡོང་ངམ་བསམ་པའི་སེམས་འཚབ་ཧ་ཅང་ཆེན་པོ་ཞིག་ཚོགས་འདུ་གོ་སྒྲིག་མ་ཞུས་སྔོན་བྱུང་། འོན་ཀྱང་དུས་ད་ལྟ་བར་དུ་ཚོགས་འདུ་གང་འདྲ་བྱུང་ཡང་ཚང་མ་རྒྱལ་ཁའི་ངང་ནས་བྱུང་ཡོད། དེ་ཡང་གཙོ་བོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཐུགས་རྗེའི་བྱིན་རླབས་དང་། འཛིན་སྐྱོང་བཀའ་ཤག་ངོས་ནས་ག་དུས་ཡིན་ཡང་ཚོགས་འདུ་གོ་སྒྲིག་ཞུས་དགོས་པ་སོགས་གང་ཅིའི་ཐོག་མཐུན་འགྱུར་དང་མཉམ་རུབ་ཆིག་སྒྲིལ་གྱི་ནུས་པ་འདོན་རྒྱུའི་འབད་བརྩོན་གནང་བར་བརྟེན་ནས་བྱུང་བ་ཞིག་དང་། ད་ཐེངས་ཀྱི་ཚོགས་ཆེན་འདི་ལྟ་བུ་ཞིག་ཡིན་ན་བཀའ་བློན་ཁྲི་པ་མཆོག་གིས་དབུས་འཛིན་སྐྱོང་བཀའ་ཤག་རེད། དེ་བཞིན་ཚོགས་ཆུང་ཁག་སོ་སོའི་ནང་གི་ཚོགས་ཆུང་གི་ཚོགས་གཙོ་དང་དྲུང་ཆེ་རྣམ་པ། ལྷག་པར་ཕྱག་སྦྲེལ་ཚོགས་གཙོ་གཞོན་པས་གཙོས་ཚོགས་དྲུང་ལས་ཁུངས་ཀྱི་ལས་བྱེད། དེ་བཞིན་བཀའ་ཤག་ནས་བཏང་གནང་བའི་ལས་བྱེད་ཚང་མས་མཉམ་རུབ་བྱས་པའི་རྒྱུ་མཚན་ལ་བརྟེན། ད་རེས་ཀྱི་ཚོགས་འདུ་ལོ་རྒྱུས་དང་ལྡན་པ་དང་ལས་དོན་ཐམས་ཅད་དཀའ་ངལ་གང་ཡང་མ་འཕྲད་པར་མཇུག་སྒྲིལ་ཐུབ་པ་འདིར་ཁོང་རྣམ་པ་དང་ཚོགས་བཅར་ཚང་མས་མཐུན་འགྱུར་གནང་བར་བརྟེན་ནས་བྱུང་བ་ཡིན་སྟབས། ཚོགས་གཙོ་སྦྲེལ་པོའི་ངོས་ནས་རྣམ་པ་ཚོ་ཚང་མར་སྙིང་ཐག་པ་ནས་ཐུགས་རྗེ་ཆེ་ཞུ་འདོད་བྱུང་།
དེ་བཞིན་ཚོགས་ཆེན་ཐོག་ནས་བསམ་ཚུལ་ག་རེ་བྱུང་བ་དེ་དག་ལག་ལེན་དུ་འཁྱེར་བའི་སྐབས་ག་ཚོད་ཅིག་ཕན་ཐོགས་མ་ཐོགས་ཞེས་པའི་བསམ་ཚུལ་དེ་དག་ཚོགས་བཅར་བ་མང་དག་ཅིག་ལ་བྱུང་ཡོད་ངེས་རེད། སྤྱི་ཚོགས་ནང་དུའང་འདིའི་སྐོར་བཀའ་མོལ་གསུང་མཁན་མང་པོ་ཡོད་ངེས་རེད།  འོན་ཀྱང་ད་རེས་ཚོགས་ཆེན་འདིའི་ནང་ཚོགས་བཅར་བ་རྣམ་པས་མང་ཚོགས་ཀྱི་བསམ་ཚུལ་གང་ཡོད་པ་དེ་སྤུངས་ནས་དེར་འགྱུར་བ་ག་ཚོད་ཅིག་གཏོང་ཐུབ་ཀྱི་ཡོད་མེད་དེ་ད་རེས་ཀྱི་ལས་རིམ་འདིའི་ཐོག་ནས་གསལ་པོ་ཆགས་ཡོད། ཡིན་ཡང་ད་ལྟ་ལས་རིམ་འདི་ཆ་ཚང་ཚར་མེད། ཕྱི་ཚེས་ ༢༦ ཉིན་ནས་གྲོས་ཚོགས་ཚོགས་དགོས་ཀྱི་ཡོད། གྲོས་ཚོགས་ཚོགས་པའི་སྐབས་ཁ་སང་ནས་ཞུས་པ་ལྟར་གྲོས་ཚོགས་ནང་དོན་དག་འགའ་ཞིག་ཐོག་བསྒྱུར་བ་གཏོང་དགོས་པ་དང་། དོན་དག་འགའ་ཞིག་༸གོང་ས་༸སྐྱབས་མགོན་ཆེན་པོ་མཆོག་གི་གསུང་འཕྲིན་རིན་པོ་ཆེ་དང་འབྲེལ་བ་མེད་པའི་གནད་དོན་ཁག་གཅིག་གཏན་འབེབས་བྱེད་ཐུབ་ཀྱང་འདྲ་མ་ཐུབ་ནའང་ཁྱད་པར་གང་ཡང་མེད། འོན་ཀྱང་༸གོང་ས་མཆོག་གི་གསུང་འཕྲིན་རིན་པོ་ཆེ་དང་འབྲེལ་བ་ཡོད་པའི་བསྐྱར་བཅོས་དེ་དག་སྤྱི་མོས་ཐོག་ནས་འགྲོ་རྒྱུའི་རེ་བ་ཞུ་བཞིན་ཡོད། རྒྱུ་མཚན་གང་ཡིན་ཞུས་ན། བོད་མི་མང་སྤྱི་འཐུས་རྣམ་པ་ཚོ་མི་མང་གི་སྐུ་ཚབ་ཡིན་པ་དང་། ད་རེས་འདིར་བོད་མི་མང་གི་སྐུ་ཚབ་རྒྱས་པོ་འཛོམས་པའི་སྐབས་ལ་སྤྱི་མོས་ཀྱི་གཏན་ལ་ཕབ་ཐུབ་པའི་ཡིག་ཆ་འདི་གྲོས་ཚོགས་ནང་དུ་ཡང་བསྒྱུར་བ་གཏོང་དགོས་ངེས་དེ་དག་བཏང་བའི་ཐོག་ནས་སྤྱི་མོས་ལ་འགྲོ་ཐུབ་རྒྱུའི་ཐབས་ཤེས་ཤིག་ཏན་ཏན་བྱེད་དགོས་ཀྱི་རེད་ཅེས་ཞུ་འདོད་བྱུང་།
དེ་རྗེས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཅའ་ཁྲིམས་བསྐྱར་བཅོས་ལ་མཚན་རྟགས་གསོལ་རས་སྩལ་བའི་ཉིན་མོ་ནས་ལོ་རྒྱུས་ཐོག་ནས་འགྱུར་བ་དངོས་སུ་འགྲོ་རྒྱུ་དེ་དེའི་ཐོག་ནས་འགྲོ་གི་ཡོད། ཐོག་མར་མཛད་སྒོ་འདི་ཚོགས་སྐབས་འདེམས་ཐོན་བཀའ་བློན་ཁྲི་པ་དང་། འདེམས་ཐོན་སྤྱི་འཐུས་རྣམས་འདེམས་ཐོན་གྱི་ངོ་བོའི་ཐོག་ནས་བཅར་རྒྱུའི་གོ་སྐབས་དང་པོ་ཡིན་པར་བརྟེན། ལྷན་ཚོགས་འདིའི་ཐོག་ནས་འཚམས་འདྲི་ཞུ་དགོས་བསམ་བྱུང་ཡང་དེའི་སྐབས་བརྗེད་ཐོའི་ནང་གསལ་པོ་མ་ཐེབས་སྟབས་ལུས་འདུག་པས་ད་རེས་གོ་སྐབས་འདི་བཟུང་ནས་འདེམས་ཐོན་བཀའ་ཁྲི་དང་སྤྱི་འཐུས་རྣམ་པ་ཚང་མར་འཚམས་འདྲི་ཞུ་གི་ཡོད། དེ་དང་ཆབས་ཅིག་འདེམས་ཐོན་བཀའ་ཁྲི་པ་དང་སྐབས་བཅོ་ལྔ་པའི་སྤྱི་འཐུས་གསར་པ་ཚང་མར་ཐུགས་འགན་ཆེན་པོ་ཞིག་ཆགས་ཀྱི་ཡོད།
༸གོང་ས་༸སྐྱབས་མགོན་ཆེན་པོ་མཆོག་གིས་བོད་རྒྱལ་ཁབ་གི་དབུ་ཁྲིད་མཛད་གནང་ཡོང་བའི་གསོལ་འདེབས་ཞུ་རྒྱུའི་ཐག་གཅོད་གནང་བ་རེད། འོན་ཀྱང་མགོན་པོ་གང་ཉིད་མཆོག་གིས་གྲོས་ཚོགས་ལ་གསུང་འཕྲིན་སྩལ་བ་དང་ཆོ་འཕྲུལ་སྨོན་ལམ་ཆེན་པོའི་སྐབས་བཀའ་སློབ་སྩལ་བའི་ནང་ཆབ་སྲིད་དང་འཛིན་སྐྱོང་གི་ཐུགས་འགན་བཞེས་ཀྱི་མིན། ཞེས་བཀའ་གསལ་པོ་ཕེབས་ཡོད་སྟབས།  ཞལ་བཞེས་མཛད་ཀྱི་ཡོད་དང་མེད་ད་ལྟ་ཞུ་ཐུབ་རྒྱུ་ཁག་པོ་ཡིན།
ད་རེས་འདེམས་ཐོན་བཀའ་བློན་ཁྲི་པ་ལྟ་བུར་མཚོན་ན་གཞོན་སྐྱེས་ནང་ནས་མི་རབས་གསར་པ་ཞིག་བསླེབས་ཡོད།  དེར་བརྟེན་ང་ཚོའི་སྤྱི་ཚོགས་ནང་མི་རབས་ལ་འགྱུར་བ་ཤུགས་ཆེན་པོ་ཞིག་འགྲོ་གི་ཡོད། དེ་ཡང་ལོ་རྒྱུས་ཐོག་ནས་འགྱུར་བ་ཤུགས་ཆེན་པོ་ཞིག་འགྲོ་བའི་སྐབས་འཁེལ་པར་སོང་འདེམས་ཐོན་བཀའ་ཁྲི་དང་སྤྱི་འཐུས་ཚང་མའི་མ་འོངས་པའི་ཐུགས་འགན་ག་ཚོད་ལྗིད་པོ་ཆགས་ཀྱི་ཡོད་མེད་དེ་ཚོད་བགམ་ཏན་ཏན་ཡོད་པ་རེད། དེ་བཞིན་ལས་དོན་ག་རེ་སྒྲུབ་ཀྱང་༸གོང་ས་མཆོག་གི་དགོངས་གཞི་དང་མཐུན་པ་འགྲོ་ཐུབ་པའི་རེ་བ་ཚོགས་ཆེན་འདིའི་ཐོག་ནས་ཞུ་གི་ཡོད། ཕྱོགས་མཚུངས་འདེམས་ཐོན་བཀའ་ཁྲི་མཆོག་ལ་ང་ཚོ་ཕྱོགས་ཚང་མའི་ངོས་ནས་སོ་སོའི་རང་ནུས་གང་ལྕོགས་ཐོག་ནས་མཐུན་འགྱུར་ཞུས་ཏེ། བཀའ་ཤག་དང་གྲོས་ཚོགས་ཚང་མས་ནུས་པ་མཉམ་དུ་སྤུངས་ཏེ་གཟི་བརྗིད་ལྡན་པའི་གྲུབ་འབྲས་ཐོན་ཐུབ་པའི་ལམ་ཁ་ཞིག་ལ་ང་ཚོས་འགྲོ་དགོས་རྒྱུ་གལ་ཆེན་པོ་རེད་བསམ་གྱི་ཡོད།
ད་རེས་ཀྱི་ཚོགས་ཆེན་འདིའི་ཐོག་གྲོས་བསྡུར་དང་ཐག་གཅོད་གང་འདྲ་གནང་ཡོད་མེད་དེ་དག་རྣམ་པ་ཚོས་ཆ་ཚང་ཤེས་ཀྱི་ཡོད། གཅིག་བྱས་ན་ད་རེས་འདིར་ལྷན་འཛོམས་གནང་བའི་རྒྱུ་མཚན་ལ་བརྟེན་ནས་སོ་སོས་སྔོན་མ་ཤེས་པ་ལས་ལྷག་པ་ཞིག་གནས་ཚུལ་ཤེས་ཏེ་ཕྱིར་ཕེབས་རྒྱུའི་གནས་སྟངས་ཤིག་ཆགས་ཀྱི་ཡོད། དེར་བརྟེན་ད་རེས་ཀྱི་ཚོགས་ཆེན་འདི་གྲོལ་རྗེས་ས་གནས་སོ་སོར་ཕེབས་སྐབས་མང་ཚོགས་ལ་གོང་དུ་བཀའ་ཁྲི་ཟམ་གདོང་རིན་པོ་ཆེ་མཆོག་གིས་དོན་ཚན་ཁ་ཤས་ཤིག་གསལ་བཤད་གནང་བ་དེ་ཚོའི་གྲས་གོ་བ་ལོག་འགྲེལ་མ་བྱས་པའི་ཐོག་དོན་ངོ་མ་གང་ཡིན་པ་དེ་མང་ཚོགས་ལ་གོ་བརྡ་འཕྲོད་པ་གནང་དགོས་རྒྱུ་དེ་གལ་ཆེན་པོ་ཡིན། དེ་མིན་འགྲེལ་ལོག་བརྒྱབ་ན་སྤྱི་ཚོགས་ནང་དཀྲུག་ཤིང་གི་ས་བོན་ཆགས་ཀྱི་ཡོད། བོད་ཀྱི་རྩ་དོན་ལ་ཕན་ཐོགས་མེད་པར་བརྟེན། སོ་སོས་མ་ཤེས་པ་དང་སེམས་ལ་དོགས་པ་ཡོད་ན་ཤེས་མཁན་ཚོར་སྐད་ཆ་དྲིས་ཏེ་ཤེས་པ་བྱེད་དགོས། རྣམ་པ་ཚོ་ཕྱིར་ཕེབས་ཏེ་མང་ཚོགས་ལ་གནས་ཚུལ་ར་སྤྲོད་གསལ་པོ་ཞིག་ཡོང་ཐུབ་པའི་རེ་བ་ཞུ་བཞིན་ཡོད།
ད་རེས་ཚོགས་ཆེན་འདིའི་ཐོག་ཐག་གཅོད་བྱས་པའི་བསམ་ཚུལ་ཕྱོགས་བསྡོམས་འདི་དག་སྤྱི་མོས་དང་གཟི་བརྗིད་ལྡན་པའི་ཐོག་ནས་ཐག་གཅོད་བྱེད་ཐུབ་ཡོད་པ་དེ་གཟི་བརྗིད་རེད་བསམ་གྱི་ཡོད། དཔེར་ན། རྒྱ་ནག་མི་མང་སྤྱི་མཐུན་རྒྱལ་ཁབ་ལྟ་བུར་ཆ་མཚོན་ན་དམར་ཤོག་གི་འགོ་ཁྲིད་དེ་དག་ཚོགས་འདུ་འཚོགས་སྐབས་སྤྱི་མོས་ཡོང་གི་ཡོད་ཀྱང་དེ་དག་ནང་བསམ་བློར་རང་དབང་མེད་པའི་ཐོག་ནས་སྤྱི་མོས་ཡོང་གི་ཡོད། མང་གཙོ་ཚད་ལྡན་ཞིག་ཡིན་ན། ནང་བསམ་བློའི་རང་དབང་ཐོག་ནས་སྤྱི་མོས་ཡོང་ཐུབ་ཀྱི་ཡོད་པ་དེ་ད་རེས་ང་ཚོའི་ཚོགས་ཆེན་འདིའི་ཐོག་ནས་འཛམ་གླིང་ལ་བསྟན་ཐུབ་ཡོད། ང་ཚོའི་མང་གཙོའི་ལམ་ལ་གཤག་བཅོས་བྱེད་ཐུབ་ཀྱི་ཡོད་པའི་གནས་སྟངས་ཤིག་འཛམ་གླིང་ནང་གསལ་པོ་བཟོ་ཐུབ་ཡོད། རྩ་དོན་ལ་ཐུག་སྐབས་ང་ཚོ་ཚང་མ་ཕྱོགས་གཅིག་ཏུ་བསྒྲིལ་ཐུབ་ཀྱི་ཡོད་པ་དེ་ཡང་འཛམ་གླིང་ལ་བསྟན་ཐུབ་ཡོད། ལྷག་པར་རྒྱ་ནག་གཞུང་ལ་ང་ཚོས་གོ་བརྡ་གསལ་པོ་མང་དག་ཅིག་སྤྲོད་ཐུབ་པའི་གནས་སྟངས་ཤིག་བཟོ་ཐུབ་ཡོད་བསམ་གྱི་ཡོད། དེ་ང་ཚོའི་གཟི་བརྗིད་ཆགས་ཡོད། དེར་བརྟེན་གོང་དུ་ཞུས་པ་ལྟར་ད་རེས་ཀྱི་ཚོགས་ཆེན་འདི་ལམ་ལྷོང་ཡོང་རྒྱུ་དེ་ང་ཚོ་མི་གཅིག་གཉིས་ཀྱིས་བྱེད་ཐུབ་རྒྱུ་གང་ཡང་མེད། རྣམ་པ་ཚོ་ཚང་མའི་མཐུན་འགྱུར་ལ་བརྟེན་ནས་བྱུང་སྟབས། སླར་ཡང་བོད་མི་མང་སྤྱི་འཐུས་ལྷན་ཚོགས་ཀྱི་ངོས་ནས་སྙིང་ཐག་པ་ནས་བཀའ་དྲིན་རྗེས་དྲན་དང་ཐུགས་རྗེ་ཆེ་ཞུ་རྒྱུ་ཡིན། ཞེས་གསུང་བཤད་གནང་ཡོད། །