༢༠༡༡ ཟླ་ ༥ ཚེས་ ༡༨ རེས་གཟའ་ལྷག་པ།
༄༅། །ཕྱི་ལོ་ ༢༠༡༡ ཟླ་ ༥ ཚེས་ ༡༨ ཉིན་རྡ་ས་བཞུགས་སྒར་བོད་ཀྱི་དཔེ་མཛོད་ཚོགས་ཁང་དུ་བོད་གཞུང་ཤེས་ལས་ཁུངས་ནས་གོ་སྒྲིག་ཐོག་བོད་ཀྱི་ཚིག་མཛོད་ཆེན་མོ་དབུ་འབྱེད་གནང་བ།
དེ་ཉིན་སྔ་དྲོ་ཆུ་ཚོད་ ༩།༣༠ ཐོག་སྐུ་མགྲོན་གཙོ་བོ་བཀའ་ཁྲི་ཟམ་གདོང་རིན་པོ་ཆེ་མཆོག་དང།
ཤེས་རིག་བཀའ་བློན་ཐུབ་བསྟན་ལུང་རིགས་མཆོག དྲུང་ཆེ་རྣམ་པ། ཤེས་རིག་ལས་ཁུངས་ཀྱི་ཚན་པ་ཁག་གི་འགན་འཛིན་རྣམ་པས་དབུས་འབྲེལ་ཡོད་ལས་བྱེད་རྣམ་པ། བོད་ཀྱི་དཔེ་མཛོད་ཁང་གི་ངེས་སྟོན་པ་དགེ་བཤེས་ལྷག་རྡོར་ལགས་ཀྱི་གཙོས་ཤེས་ཡོན་ལ་ཐུགས་སྣང་ཆེ་བའི་མི་སྣ་ཁག་དང་གསར་འགོད་པ་གཅིག་བཅས་མི་གྲངས་ ༥༠ བརྒལ་བ་ལྷན་འཛོམས་ཀྱི་ཐོག་མར་སྐུ་མགྲོན་གཙོ་བོ་མཆོག་གིས་སྣང་གསལ་ཞལ་ཕྱེ་གནང་བསྟུན་ཚིག་མཛོད་དེའི་རྩོམ་སྒྲིག་པ་བློ་བཟང་བསྟན་དར་ལགས་ནས་ཚིག་མཛོད་རྩོམ་སྒྲིག་བྱེད་སྐབས་ཀྱི་བརྒྱུད་རིམ་དང་འབྲེལ་བའི་ངོ་སྤྲོད་གནང་། དེ་ནས་སྐུ་མགྲོན་གཙོ་བོ་མཆོག་གིས་དཔེ་དེབ་དབུ་འབྱེད་དང་སྦྲགས་གསུང་བཤད་གནང་དོན།
ཐོག་མར་ཚིག་མཛོད་རྩོམ་སྒྲིག་པ་བློ་བཟང་བསྟན་དར་ལགས་སུ་བཙན་བྱོལ་བོད་གཞུང་བཀའ་ཤག་དང་ང་རང་སྒེར་བོད་པའི་སྤྱི་ཚོགས་ངོས་ནས་ཐུགས་རྗེ་ཆེ་ཞུ་རྒྱུ་དང་། ཚིག་མཛོད་ཆེན་མོ་འདི་འདྲ་ལེགས་གྲུབ་བྱུང་བ་དེ་རྒྱལ་ཁབ་དང་མི་རིགས་ཀྱི་སྲོག་རྩ་བོད་ཀྱི་སྐད་ཡིག དེ་དང་འབྲེལ་བའི་རིག་གནས་རྒྱུན་གནས་ཡོང་རྒྱུར་རླབས་ཆེན་གྱི་བྱས་རྗེས་ཆེན་པོ་ཞིག་ཐོན་པར་བཀྲིས་བདེ་ལེགས་ཀྱི་བཀའ་དྲིན་ཆེ་ཞུ་གི་ཡོད། རིག་གཞུང་དང་སྐད་ཡིག་དོན་ལ་ཕྱག་ལས་གནང་རྒྱུ་དེ་ནི་ཆོས་དང་སྲིད། སྤྱི་ཚོགས་དང་སྒེར། འདི་དང་ཕྱི་མ་གང་དུ་བསམ་བློ་བཏང་བ་ཡིན་ནའང་རླབས་ཆེན་གྱི་ཕྱག་ལས་ཞིག་རེད། སྤྱིར་བཏང་མི་ཡི་འགྲོ་བ་འདི་དུད་འགྲོ་ལས་ཟུར་དུ་ཕྱེ་རྒྱུའི་ཁྱད་ཆོས་གཅིག་དེ་ངག་གི་སྨྲ་བརྗོད་དེ་ཡིན་པ་དང་དེ་ལས་གཞན་པའི་འགྲོ་སྡོད་ཀྱི་ཁ་ལག་འཚོལ་རྒྱུ་དང་ཚང་བཟོ་རྒྱུ། ཕྲུ་གུ་གསོ་སྐྱོང་དེ་དག་དུད་འགྲོ་དང་ཁྱད་པར་མེད། མིའི་འགྲོ་བ་དེ་རླབས་ཆེན་ཞིག་ལ་བརྩི་རྒྱུ་དང་སྟབས་ལེགས་པ་ཡིན་ན་དལ་བརྒྱད་འབྱོར་བཅུ་ཚང་བའི་ལུས་རྟེན་བྱས་ཏེ་ཡིད་བཞིན་ནོར་བུ་ལས་ལྷག་པ་ཚེ་གཅིག་ལ་སངས་རྒྱས་གོ་འཕང་སྒྲུབ་རྒྱུའི་ནུས་པ་རླབས་པོ་ཆེ་ཡོང་ཁུངས་དེ་གང་རེད་དམ་ཞུས་ན་ངག་གི་སྨྲ་བརྗོད་དང་དེ་འབྱུང་ཁུངས་ནི་རྣམ་རྟོག་གི་འབྱུང་འཕྲོད་དེ་རེད། མི་ལ་རྣམ་དཔྱོད་ཀྱི་ཤེས་རབ་ཅེས་ཡིན་མིན་ལེགས་ཉེས་ཕྱེ་བའི་རྣམ་དཔྱོད་དེས་དྲངས་པའི་ངག་གི་སྨྲ་བརྗོད་ཞིག་ཡོད། དེ་མིའི་ཤེས་ཡོན་ཚང་མའི་འབྱུང་ཁུངས་དང་གཞི་རྩ་རྒྱུན་གནས་བྱེད་རྒྱུའི་ཐབས་ལམ་ཚང་མ་དེ་རང་ཡིན་པ་དང། མིའི་འཇིག་རྟེན་འདིར་ནང་དོན་རིག་པ་ཚུད་པའི་རིག་གནས་ཡོངས་སུ་རྫོགས་པའི་ཐོག་མར་འབྱུང་ཁུངས་ངག་གི་རིག་བྱེད་ལས་བྱུང་བ་ཞིག་རེད། སོགས་དང་། དེ་བཞིན་རིག་གཞུང་རྒྱུན་འཛིན་བྱེད་རྒྱུ་དང་།
སྐད་ཡིག་ངོ་བོ་མི་བརླག་པར་གནས་རྒྱུ། ཆོལ་གསུམ་ཡོངས་རྫོགས་སྐད་ཡིག་གཅིག་གི་ཐོག་ནས་གཅིག་ཏུ་གནས་རྒྱུའི་སྲུང་རྒྱབ་བྱེད་རྒྱུ་དེ་གལ་ཆེན་པོ་ཞེ་དྲག་རེད། དེ་ཚོའི་དོན་ལ་ཐབས་ལམ་མང་པོ་ཡོད་པའི་ནང་ནས་ཚིག་མཛོད་བཟོ་རྒྱུ་དེ་རྙིང་པ་ཆགས་རྒྱུ་མེད་པའི་ལས་ཀ་ཞིག་རེད། ཅེས་དང་ཡང་བོད་ཀྱི་ཚིག་མཛོད་ཆེན་མོ་གསར་དུ་སྐྲུན་པའི་དེབ་གཟུགས་དེ་ལ་བརྟེན་ནས་དེང་རབས་ཀྱི་བློ་གྲོས་གསར་པ་མང་པོར་ཕན་ཐོགས་ཡོང་རྒྱུ་དང་། ལྷག་པར་དུ་བོད་ཀྱི་སྐད་ཡིག་མི་ཉམས་རྒྱུན་འཛིན་ཡོང་རྒྱུར་ཕན་ཐོགས་དང་སྨོན་འདུན། སྤྱིར་རྩོམ་སྒྲིག་གནང་མཁན་དང་མཐུན་འགྱུར་བ་ཚང་མར་ལེགས་གསོའི་བསྔགས་བརྗོད་ཡོད་ཐུགས་རྗེ་ཆེ། ཞེས་གསུངས་རྗེས་ཤེས་རིག་རྩོམ་སྒྲིག་འགན་འཛིན་ཀརྨ་སྨོན་ལམ་ལགས་ཀྱི་ཐུགས་རྗེ་ཆེ་གསུངས་ཏེ་མཛད་སྒོ་གྲོལ། ཚིག་མཛོད་འདིར་མིང་ཚིག་ཁྲི་དྲུག་ལྷག་ཙམ་ཡོད་པ་དང་། རྩོམ་པ་པོས་མི་ལོ་བཅུ་གསུམ་ཙམ་ལས་ཞོར་དུ་བྲིས་པ་ཞིག་དང་། མཐའ་མའི་ཞུ་དག་ཤེས་རིག་རྩོམ་སྒྲིག་འགན་འཛིན་ཀརྨ་སྨོན་ལམ་ལགས་ཀྱིས་ཞུ་དག་དང་ཁོང་བཀོད་སྒྲིག་འོག་བཞུགས་སྒར་ཁུལ་མི་སྣ་བཅུ་ཙམ་གྱི་ཚིག་དོན་གཉིས་ཀའི་ཐོག་ཞུ་དག་དང་དགོངས་འཆར་གནང་བ་ཞིག་ཡིན་འདུག
