༢༠༡༡ ཟླ་ ༥ ཚེས་ ༡༨ རེས་གཟའ་ལྷག་པ།
༄༅། །ཕྱི་ལོ་ ༢༠༡༡ ཟླ་ ༥ ཚེས་ ༡༧ རེས་གཟའ་མིག་དམར་གྱི་ཕྱེད་ཡོལ་ཆུ་ཚོད་ ༥ པར་རྒྱ་གར་གྱི་དེ་སྔའི་སྲིད་བློན་གཞོན་པ་སྐུ་ཞབས་ཨེལ་ཀེ་ཨ་ཌི་ཝཱ་ནི་ (L.K Advani) མཆོག་གྷ་གལ་གནམ་ཐང་དུ་ཕེབས་སྐབས་ཧི་མཱ་ཅལ་མངའ་སྡེའི་སྤྱི་ཁྱབ་བློན་ཆེན་པེ་རེམ་ཀུ་མར་དུ་མལ་མཆོག་གི་གཙོས་མངའ་སྡེའི་འབྲེལ་ཡོད་ལས་བྱེད་རྣམ་པ་དང་། གཞན་ཡང་སྐབས་དེར་བཙན་བྱོལ་བོད་གཞུང་གི་བཀའ་ཁྲི་ཟམ་གདོང་རིན་པོ་ཆེ་མཆོག་དང་སྐབས་གསུམ་པའི་བཀའ་ཁྲིར་འོས་འདེམས་བྱུང་བ་མཁས་དབང་བློ་བཟང་སེང་གེ་མཆོག ཕྱི་འབྲེལ་དྲུང་ཆེ་ཨ་ཏི་ཤ་བསྟན་འཛིན་ཕུན་ཚོགས་ལགས་བཅས་ཀྱིས་ཕེབས་བསུ་གཟབ་རྒྱས་ཞུས་ཡོད།
སྐུ་ཞབས་ཨེལ་ཀེ་ཨ་ཌི་ཝཱ་ནི་མཆོག་ཕྱི་ཚེས་ ༡༨ ཉིན་རྒྱབ་ཞུགས་སྒར་ཕོ་བྲང་དུ་ཕེབས་ཏེ་༸གོང་ས་༸སྐྱབས་མགོན་ཆེན་པོ་མཆོག་དང་མཇལ་འཕྲད་མཛད་ཡོད་པ་མ་ཟད།  ༸གོང་ས་མཆོག་གིས་སྐུ་ཞབས་ཨེལ་ཀེ་ཨ་ཌི་ཝཱ་ནི་ལྷན་རྒྱས་ལ་ཉིན་གུང་གསོལ་སྟོན་ཕུལ་གནང་མཛད།།

དེ་ཡང་མཇལ་འཕྲད་གྲུབ་སྟེ་ཕོ་བྲང་ནས་ཕྱིར་ཕེབས་མཚམས་གསར་འགོད་པ་ཚོས་མཇལ་འཕྲད་སྐབས་བཀའ་མོལ་ཇི་བྱུང་གི་དྲི་བ་ཕུལ་བར་སྐུ་ཞབས་ཨེལ་ཀེ་ཨ་ཌི་ཝཱ་ནི་མཆོག་གིས་གསུང་དོན། ང་རང་༸གོང་ས་མཆོག་དང་ཐེངས་འགའ་ཤས་མཇལ་མྱོང་ཡོད། ཐེངས་འདིའི་མཇལ་འཕྲད་དེ་ཡང་དེ་སྔ་ངས་༸གོང་ས་ཏཱ་ལའི་བླ་མ་མཆོག་ལ་ཉིན་གཅིག་ང་རང་ཞུགས་སྒར་དུ་སྐུ་ཉིད་དང་མཇལ་བར་བཅར་རྒྱུ་ཡིན་ཞེས་ཞུས་པ་ལྟར་ད་རེས་ང་རང་དངོས་སུ་བཞུགས་སྒར་དུ་བཅར་ཏེ་༸གོང་ས་ཏཱ་ལའི་བླ་མ་མཆོག་དང་མཇལ་བ་ཞིག་ཡིན། ༸གོང་ས་ཏཱ་ལའི་བླ་མ་མཆོག་ངེད་གཉིས་མཇལ་འཕྲད་སྐབས་སྐད་ཆ་ཤོད་རྒྱུའི་གནད་དོན་གཙོ་བོ་ནི་བོད་ཀྱི་བདེ་དོན་ཆེད་ཡིན་པ་དང་། ངས་༸གོང་ས་ཏཱ་ལའི་བླ་མ་མཆོག་ལ་བོད་ཐོག་རྒྱ་ནག་གཞུང་གིས་འཛིན་པའི་སྲིད་བྱུས་དེར་འགྱུར་བ་གང་ཞིག་ཡོད་མེད་སྐོར་བཀའ་དྲི་ཞུས་པར་༸གོང་ས་ཏཱ་ལའི་བླ་མ་མཆོག་གིས་ད་ལྟ་རྒྱ་ནག་གཞུང་གིས་བཟང་ཕྱོགས་ཀྱི་འགྱུར་བ་གཏོང་རྒྱུའི་འཆར་གཞི་གཟིགས་ཀྱི་མེད་ནའང་རེ་བ་ཏན་ཏན་ཡོད་སྐོར་བཀའ་སྩལ་བྱུང་ཞེས་གསུངས་ཡོད་པ་བཅས།།