༢༠༡༡ ཟླ་ ༥ ཚེས་ ༡༢ རེས་གཟའ་ཕུར་བུ།
གྲྭ་བློ་བཟང་རིན་ཆེན།
༄༅། །ཕྱི་ལོ་ ༢༠༡༡ ཟླ་ ༥ ཚེས་ ༡༡ ཉིན་ཀི་རྟི་གྲྭ་ཚང་གི་བོད་གནས་འབྲེལ་མཐུད་པས་བཏང་གནས་ནང་འཁོད་དོན།
ཕྱི་ཟླ་ ༥ ཚེས་ ༩ ཉིན་རྔ་པ་ཀིརྟིའི་དགོན་གྱི་གྲྭ་བློ་བཟང་རིན་ཆེན། རང་ལོ་ ༢༡ ཡིན་པ་ཁོང་རང་ཤག་ནས་འཛིན་བཟུང་གིས་བཙན་ཁྲིད་བྱས་ཡོད་འདུག་ལ། ཁོང་ནི་རྔ་པ་རྫོང་རྨེའུ་རུ་མའི་རུ་ཆེན་གཉིས་པའི་འཚམས་རིང་ཚང་གི་ཡིན་ཞིང་། མ་མིང་ལ་ཚེ་དབང་སྐྱིད་ཡིན་འདུག ཁོང་རྔ་པ་རང་སྐྱོང་ཁུལ་གྱི་གསང་བའི་ལས་ཁུངས་ཀྱི་མི་སྣ་དང་ཉེན་རྟོག་པས་འཛིན་བཟུང་བྱས་རྗེས་གང་དུ་ཁྲིད་ཡོད་མེད་དང་འཛིན་བཟུང་བྱེད་དགོས་པའི་རྒྱུ་མཚན་སོགས་འབྲེལ་ཡོད་མི་སྣར་གསལ་པོ་བཤད་མེད་སྟབས་ད་ཆ་གང་ཡང་ཤེས་རྟོགས་མེད་པའི་གནས་སུ་ལྷུང་།
དེ་བཞིན་དེང་སྐབས་རྔ་པ་ཀིརྟི་དགོན་པ་གཙོ་བོར་གྱུར་པའི་རྔ་པའི་དགོན་གྲོང་རྣམས་སྔར་བཞིན་དམ་བསྒྲགས་བྱེད་མུས་ཡིན་པ་མ་ཟད། ཀིརྟི་དགོན་པའི་ནང་རྒྱལ་གཅེས་ཆོས་གཅེས་ཀྱི་སློབ་གསོ་ཟེར་བ་མུ་མཐུད་སྤེལ་བཞིན་འདུག དགེ་འདུན་པ་རྣམས་ཀྱི་གྲྭ་ཤག་རེ་རེ་བཞིན་དམག་མི་དང་ཉེན་རྟོག་པས་དངོས་སུ་བཀག་སྡོམ་བྱས་ཡོད་ལ། བརྙན་ཕབ་དང་སྒྲ་ལེན་འཕྲུལ་ཆས་ཀྱིས་ལྐོག་ནས་བཀག་སྡོམ་བྱས་ཏེ་གྲྭ་པ་རྣམས་ཀྱིས་འགྲོ་འདུག་ཚང་མ་དུས་ཚོད་ཉེར་བཞིའི་རིང་ལྟ་རྟོག་འོག་གནས་ཡོད་འདུག་པ་བཅས།།
