༢༠༡༩ ཟླ་ ༡༠ ཚེས་ ༡༦ རེས་གཟའ་ལྷག་པ།
༄༅། །ཕྱི་ལོ་ ༢༠༡༩ ཟླ་ ༡༠ ཚེས་ ༡༥ ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་སིག་ཆོས་ལུགས་ཀྱི་ཤིང་རྟའི་གསོལ་འབྱེད་གུ་རུ་ནཱ་ནག་མཆོག་སྐུ་འཁྲུངས་ནས་མི་ལོ་ ༥༥༠ འཁོར་བའི་དུས་དྲན་མཛད་སྒོའི་སྐུ་མགྲོན་གཙོ་བོར་ཆིབས་སྒྱུར་བསྐྱངས་འདུག
སྐབས་དེར་མགོན་པོ་མཆོག་གིས་དེང་དུས་ཤེས་ཡོན་ལམ་ལུགས་ནང་བཟང་སྤྱོད་ཀྱི་ཉམས་ལེན་དགོས་གལ་སྐོར་བཀའ་སློབ་སྩལ་འདུག དེ་ཡང་ཐོག་མར་ཅནྡི་གར་མཐོ་སློབ་ཀྱི་རིགས་བདག་དང་ཉེ་བའི་རིགས་བདག་གཉིས་ཀྱིས་མཐོ་སློབ་ཕེབས་སྒོའི་མཚམས་ནས་ཕེབས་བསུའི་སྣེ་ལེན་གཟབ་རྒྱས་ཞུས་རྗེས། བོད་པའི་སློབ་ཕྲུག་གཉིས་ཀྱིས་གྲོ་སོ་ཕྱེ་མར་དང་ཆང་ཕུད་འདེགས་འབུལ་ཞུས། ཐོག་མར་རིགས་བདག་ལས་ཁུངས་སུ་འཁྱུག་ཙམ་གདན་ཞུས་རྗེས་ཚོགས་ཁང་ནང་མི་གྲངས་ ༤༠༠༠ བརྒལ་བ་འདུ་འཛོམས་ཐོག་སྡིངས་ཆའི་སྟེང་༸ཞབས་སོར་བདེ་བར་འཁོད་བསྟུན། སྣང་གསལ་ཞལ་ཕྱེ་མཛད་རྗེས་ཉེ་བའི་རིགས་བདག་སྐུ་ཞབས་ Dr RS Bawa མཆོག་གིས་ཚོགས་བཅར་བ་རྣམས་ལ་༸གོང་ས་༸སྐྱབས་མགོན་ཆེན་པོ་མཆོག་གི་མཛད་རྣམ་སྙིང་བསྡུས་ངོ་སྤྲོད་ཞུས་འདུག
![His Holiness the Dalai Lama riding in an electric buggy to the amphitheater for his talk at Chandigarh University in Chandigarh, India on October 15, 2019. Photo by Tenzin Choejor His Holiness the Dalai Lama riding in an electric buggy to the amphitheater for his talk at Chandigarh University in Chandigarh, India on October 15, 2019. Photo by Tenzin Choejor](https://www.dalailama.com/assets/news-articles/2019-10-15-Chandigarh-N01a-SA901336.jpg)
དེ་རྗེས་མགོན་པོ་མཆོག་གིས་བྱམས་པ་དང་བརྩེ་བ། བཟོད་བསྲན། ཆོག་ཤེས་སོགས་འགྲོ་བ་མིའི་གཞི་རྩའི་བཟང་སྤྱོད་ཀྱི་རིན་ཐང་དེ་དག་ལག་བསྟར་དགོས་གལ་ཆེ་བ་དང་། ལྷག་པར་དེང་སྐབས་རང་རྒྱལ་གཞན་ཕམ་དང་རང་གཞན་ཆགས་སྡང་ཕྱོགས་རིས་ཆེ་བའི་དུས་སྐབས་འདིར་ང་ཚོ་ཚང་མས་འགྲོ་བ་མི་རིགས་གཅིག་གྱུར་གྱི་འདུ་ཤེས་འཛིན་ནས་ཕན་ཚུན་བསམ་ཤེས་དང་བཟོད་བསྲན་བསྟེན་དགོས་པ་ཧ་ཅང་གལ་ཆེ་ཚུལ་བཀའ་སློབ་སྩལ་འདུག སྐབས་དེར་ཆོས་ལུགས་མཐུན་སྒྲིལ་སྐོར་བཀའ་སློབ་སྩལ་བ་དང་།
![His Holiness the Dalai Lama addressing the gathering at Chandigarh University in Chandigarh, India on October 15, 2019. Photo by Tenzin Choejor His Holiness the Dalai Lama addressing the gathering at Chandigarh University in Chandigarh, India on October 15, 2019. Photo by Tenzin Choejor](https://www.dalailama.com/assets/news-articles/2019-10-15-Chandigarh-N02-A7303299.jpg)
ཆོས་ལུགས་གཙོ་ཆེ་བ་ཚང་མས་མི་བཟང་པོ་ཞིག་བྱེད་དགོས་པའི་བསླབ་བྱ་སྐྱོན་བཞིན་ཡོད་སྟབས་ཆོས་ལུགས་ཚང་མའི་བསླབ་བྱ་གཅིག་མཚུངས་ཡིན་པ་དང་། ལྟ་གྲུབ་ཐོག་ནས་མི་འདྲ་བ་ཡོད་ཆོག་ཀྱང་ནང་དོན་མི་བཟང་པོ་ཞིག་དང་དྲང་པོ་དྲང་གཞག འདོད་ཆུང་ཆོག་ཤེས་བྱེད་དགོས་པའི་བསླབ་བྱ་སོགས་གཅིག་མཚུངས་ཡིན་སྐོར། དེང་དུས་ཤེས་ཡོན་ལམ་ལུགས་ནང་གཙོ་ཆེར་ཕྱི་དངོས་པོ་དཔལ་འབྱོར་འཛུགས་སྐྲུན་ཇི་ལྟར་གཏོང་དགོས་པའི་ལམ་སྟོན་འབའ་ཞིག་ལས་ནང་གི་བསམ་བློ་ཇེ་བཟང་དུ་གཏོང་རྒྱུའི་ཐད་ལམ་སྟོན་གང་ཡང་བྱེད་ཀྱི་མེད་པ་དེ་ཧ་ཅང་བློ་ཕམ་སྐྱེ་གཞི་ཡིན་སྐོར་བཀའ་སློབ་སྩལ་འདུག
དེང་སྐབས་དཔལ་འབྱོར་ཁོ་ན་གཙིགས་ཆེར་འཛིན་བཞིན་པའི་ཤེས་ཡོན་ལམ་ལུགས་དེ་ལ་བརྟེན་ནས་སྤྱི་ཚོགས་ནང་ཆགས་སྡང་སོགས་ཉོན་མོངས་པའི་བློ་ཤུགས་ཆེ་ཡོད་པ་དེར་གཉེན་པོ་བསྟེན་ཕྱོགས་ཐད་དཀའ་ངལ་འཕྲད་བཞིན་ཡོད་སྟབས། དཀའ་ངལ་དེ་དག་ལ་གདོང་ལེན་བྱ་རྒྱུ་དེ་རྒྱ་གར་གནའ་རབས་སེམས་ཁམས་རིག་པའི་རྣམ་གཞག་ཐོག་ནས་ཆགས་སྡང་སོགས་ཉོན་མོངས་པའི་བློ་སྐྱེ་སྐབས་སེམས་རྒྱུད་གདུལ་བར་ཕན་ཐོགས་ཧ་ཅང་ཡོད་པ་དང་།
![Many of the more than 4,000 people, mostly students, listening to His Holiness the Dalai Lama at Chandigarh University in Chandigarh, India on October 15, 2019. Photo by Tenzin Choejor Many of the more than 4,000 people, mostly students, listening to His Holiness the Dalai Lama at Chandigarh University in Chandigarh, India on October 15, 2019. Photo by Tenzin Choejor](https://www.dalailama.com/assets/news-articles/2019-10-15-Chandigarh-N03-SA901423.jpg)
རྒྱ་གར་གནའ་རབས་སྲོལ་རྒྱུན་རིག་གནས་ཁྲོད་སེམས་ཁམས་རིག་པའི་རྣམ་གཞག་དེ་དག་དེང་སྐབས་སྤྱི་ཚོགས་ནང་དགོས་མཁོ་ཡོད་པ་ནི་འཚེ་བ་མེད་པ་དང་སྙིང་རྗེའི་བསམ་པ་གཞི་ལ་བཞག་ནས་འགྲོ་རྒྱུའི་སྲོལ་བཟང་ཞིག་ཡོད་པ་དེ་ལ་བརྟེན་ནས་རྒྱ་གར་ནང་ཆོས་ལུགས་འདྲ་མིན་ཡོད་ཀྱང་ཚང་མ་འཆམ་མཐུན་ངང་གནས་ཐུབ་པ་དང་། ལེགས་སྐྱེས་དེ་དག་འཛམ་གླིང་སྤྱི་ལ་ཁྱབ་པ་ཞིག་ཡོང་སླད་མགོན་པོ་མཆོག་གིས་ཐོག་མར་རྒྱ་གར་ནང་ལེགས་བཤད་དེ་དག་སླར་གསོ་ཡོང་ཐབས་མཛད་བཞིན་ཡོད་སྐོར་སོགས་བཀའ་སློབ་སྩལ།
![His Holiness the Dalai Lama speaking on "Secular Ethics in Modern Education in the context of Shri Guru Nanak Dev Ji" at Chandigarh University in Chandigarh, India on October 15, 2019. Photo by Tenzin Choejor His Holiness the Dalai Lama speaking on "Secular Ethics in Modern Education in the context of Shri Guru Nanak Dev Ji" at Chandigarh University in Chandigarh, India on October 15, 2019. Photo by Tenzin Choejor](https://www.dalailama.com/assets/news-articles/2019-10-15-Chandigarh-N04-A7303279.jpg)
གཞན་ཡང་༸གོང་ས་༸སྐྱབས་མགོན་ཆེན་པོ་མཆོག་གིས་སིག་ཆོས་ལུགས་ཀྱི་ཤིང་རྟའི་སྲོལ་འབྱེད་གུ་རུ་ནཱ་ནག་མཆོག་སྤྱིར་ཧིན་དུའི་ཁྱིམ་ཚང་ནང་འཁྲུངས་ཡོད་ཀྱང་ཁ་ཆེའི་གནས་མཆོག་མག་ཀ་ཞེས་པར་གནས་གཟིགས་སུ་ཕེབས་ཡོད་པ་དང་། དེའི་དགོས་དམིགས་གཙོ་བོ་ཆོས་ལུགས་ཕན་ཚུན་འཆམ་མཐུན་ཡོང་ཐབས་ཆེད་ཡིན་སྐོར། ལྷག་པར་སིག་སྤྱི་ཚོགས་ནང་སྤྲང་པོ་ཧ་ལམ་མཐོང་རྒྱུ་མེད་པ་དེ་ཕན་ཚུན་མཉམ་རུབ་ཐོག་ནས་གཅིག་ཕན་གཅིག་གྲོགས་ལ་བརྟེན་ནས་ཧྲ་ཏག་ཏག་ཆགས་ཐུབ་པར་བསྔགས་བརྗོད་མཛད་འདུག
![Members of the audience listening to His Holiness the Dalai Lama at Chandigarh University in Chandigarh, India on October 15, 2019. Photo by Tenzin Choejor Members of the audience listening to His Holiness the Dalai Lama at Chandigarh University in Chandigarh, India on October 15, 2019. Photo by Tenzin Choejor](https://www.dalailama.com/assets/news-articles/2019-10-15-Chandigarh-N05a-A7303239.jpg)
༸གོང་ས་༸སྐྱབས་མགོན་ཆེན་པོ་མཆོག་གིས་གུ་རུ་ནཱ་ནག་མཆོག་དང་སྟོན་པ་བཅོམ་ལྡན་འདས་ཀྱིས་རིགས་རུས་དབྱེ་འབྱེད་ལ་མཐའ་གཅིག་ཏུ་དགག་པ་མཛད་པ་ལྟར་གང་ཉིད་ནས་ཀྱང་རིགས་རུས་མཆོག་དམན་བརྩི་རྒྱུའི་ལམ་སྲོལ་ལ་དགག་པ་མཛད་བཞིན་ཡོད་པ་དང་། རྒྱ་གར་ནང་རིགས་རུས་མཆོག་དམན་བརྩི་རྒྱུའི་ལམ་སྲོལ་དེ་རྗེས་ལུས་ཀྱི་བསམ་བློ་ཡིན་སྐོར་དང་། ད་ཆ་མང་གཙོའི་རིང་ལུགས་ཡིན་སྟབས་མི་ཚང་མ་ཁྲིམས་ཀྱི་མདུན་སར་འདྲ་མཉམ་ཡིན་སྐོར་བཀའ་སློབ་སྩལ་འདུག དེ་རྗེས་མང་ཚོགས་ཀྱི་དྲི་བ་རྣམས་ལ་བཀའ་ལན་སྩལ་འདུག
![His Holiness the Dala Lama during his talk at Chandigarh University in Chandigarh, India on October 15, 2019. Photo by Tenzin Choejor His Holiness the Dala Lama during his talk at Chandigarh University in Chandigarh, India on October 15, 2019. Photo by Tenzin Choejor](https://www.dalailama.com/assets/news-articles/2019-10-15-Chandigarh-N06-A7303331.jpg)
![A member of the audience asking His Holiness the Dalai Lama a question during his talk at Chandigarh University in Chandigarh, India on October 15, 2019. Photo by Tenzin Choejor A member of the audience asking His Holiness the Dalai Lama a question during his talk at Chandigarh University in Chandigarh, India on October 15, 2019. Photo by Tenzin Choejor](https://www.dalailama.com/assets/news-articles/2019-10-15-Chandigarh-N07-A7303337.jpg)
![His Holiness the Dalai Lama holding plate symbolizing the Global Leadership Award presented to him by Chandigarh University in Chandigarh, India on October 15, 2019. Photo by Tenzin Choejor His Holiness the Dalai Lama holding plate symbolizing the Global Leadership Award presented to him by Chandigarh University in Chandigarh, India on October 15, 2019. Photo by Tenzin Choejor](https://www.dalailama.com/assets/news-articles/2019-10-15-Chandigarh-N08-A7303364.jpg)
བཀའ་སློབ་དང་དྲི་བ་དྲིས་ལན་གྱི་ལས་རིམ་རྣམས་ཡོངས་སུ་ལེགས་གྲུབ་རྗེས་མཐོ་སློབ་དེའི་གོ་ལའི་དབུ་ཁྲིད་ཀྱི་གཟེངས་རྟགས་དེ་༸གོང་ས་༸སྐྱབས་མགོན་ཆེན་པོ་མཆོག་ལ་འབུལ་ལམ་ཞུས་འདུག མཐར་༸གོང་ས་༸སྐྱབས་མགོན་ཆེན་པོ་མཆོག་གིས་ཤིང་སྣ་འདེབས་འཛུགས་མཛད་རྗེས་ཉིན་གུང་ལྗགས་སྨིན་དགྱེས་བཞེས་མཛད་པ་བཅས།
![His Holiness the Dalai Lama offering a few words of encouragement for students from the Himalayan region before leaving the stage after his talk at Chandigarh University in Chandigarh, India on October 15, 2019. Photo by Tenzin Choejor His Holiness the Dalai Lama offering a few words of encouragement for students from the Himalayan region before leaving the stage after his talk at Chandigarh University in Chandigarh, India on October 15, 2019. Photo by Tenzin Choejor](https://www.dalailama.com/assets/news-articles/2019-10-15-Chandigarh-N09-SA901476.jpg)