༢༠༡༩ ཟླ་ ༡༠ ཚེས་ ༥ རེས་གཟའ་སྤེན་པ།
༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཐེ་ཝན་དད་ལྡན་ཆོས་ཞུ་བ་ཚོར་དཔལ་མགོན་འཕགས་པ་ཀླུ་སྒྲུབ་ཀྱིས་མཛད་པའི་དབུ་མ་རིན་ཆེན་ཕྲེང་བའི་གསུང་ཆོས་ཉིན་མཐའ་མའི་སྐབས་མགོན་པོ་གང་ཉིད་ཀྱི་ཐུགས་བསྐྱེད་དམ་བཅའ་གསུམ་པ་སྟེ། བོད་ཀྱི་སྐད་ཡིག་དང་རིག་གཞུང་། ཁོར་ཡུག་སྲུང་སྐྱོབ་ཐོག་བཀའ་སློབ་སྩལ་དོན། ངོས་རང་བོད་པ་རེད། ངོས་ལ་ཏཱ་ལའི་བླ་མའི་མིང་ཞིག་ཡོད། གཞིས་བཞུགས་བོད་མི་ས་ཡ་དྲུག་བདུན་ཙམ་ཡོད་པ་ཁོང་ཚོས་ངོས་ལ་བློ་གཏད་བྱེད་བཞིན་ཡོད། རང་དབང་ལུང་པའི་ནང་གི་བོད་མི་ཚོས་ཀྱང་ངོས་ལ་བློ་འགེལ་ནས་བློ་གཏད་བཅོལ་བཞིན་ཡོད། དེར་བརྟེན་བོད་དོན་འགན་ཞིག་ངོས་ལ་ཡོད། བོད་མིའི་ཆབ་སྲིད་ཀྱི་འགན་དེ་ངོས་ཀྱིས་ཕྱི་ལོ་ ༢༠༠༡ ནས་བཞག་པ་རེད།
ད་ཆ་མང་གཙོའི་ལམ་ནས་འོས་འདུ་བྱས་པའི་ཆབ་སྲིད་དབུ་ཁྲིད་ཀྱིས་འགན་འཁྱེར་བཞིན་ཡོད། ངོས་ཀྱིས་ཆབ་སྲིད་འགན་འཁྱེར་གྱི་མེད། སྐབས་རེ་ངོས་ཀྱི་རྩེད་མོ་དང་སྦྲགས་དེ་སྔ་ཆོས་སྲིད་ཟུང་འབྲེལ་ཞེས་ལུགས་གཉིས་ཐོག་ནས་འགྲོ་རྒྱུའི་ལམ་སྲོལ་དེ་༸རྒྱལ་བ་ལྔ་པའི་སྐབས་ནས་བྱུང་བ་རེད། གལ་སྲིད་༸རྒྱལ་བ་ལྔ་པ་བསྐྱར་དུ་ཕེབས་པ་ཡིན་ན། ངོས་ཀྱིས་ཏཱ་ལའི་བླ་མ་ཆོས་སྲིད་གཉིས་ཀྱི་དབུ་ཁྲིད་ཟེར་བ་དེ་མེད་པ་བཟོས་སྟབས་ཁོང་གིས་གང་གསུང་ཡོང་བསམ་པ་དྲན་གྱི་འདུག འོན་ཀྱང་༸རྒྱལ་བ་ལྔ་པ་བསྐྱར་དུ་ཕེབས་རྒྱུ་མིན་སྟབས་བཞེད་སྣང་བྱེད་དགོས་པ་གང་ཡང་མེད། དེར་བརྟེན་ངོས་ཀྱིས་གང་བྱས་རེད། ཆབ་སྲིད་ཀྱི་ལས་ཀ་དེ་ངོས་ཀྱིས་བཞག་ཟིན་པ་རེད། ངོས་རང་བོད་པ་ཞིག་ཡིན་པའི་ཆ་ནས་བོད་ཀྱི་ཁོར་ཡུག་གལ་ཆེན་པོ་རེད་འདུག ས་མཐོན་པོ་རེད། རྒྱ་གར་བའི་ཁོར་ཡུག་མཁས་པ་དེ་འདྲས་ངོས། བོད་ཀྱི་ས་མཐོ་ཞིང་ས་སྐམ་པོ་ཡིན་སྟབས་ཁོར་ཡུག་ལ་སྐྱོན་ཆགས་བྱུང་ཚེ་རང་བཞིན་གྱིས་གསོ་རྒྱུར་དུས་ཚོད་ཧ་ཅང་འགོར་རྒྱུ་ཡིན་པ་བརྗོད་ཀྱི་འདུག རྒྱ་རིགས་གྲོགས་པོ་དེ་འདྲ་ལའང་ངོས་ཀྱིས་བརྗོད་ཀྱི་ཡོད། ཁྱེད་ཚོས་གཏེར་ཁ་སྔོག་འདོན་སོགས་བྱེད་དགོས་ཀྱང་ཁོར་ཡུག་ལ་གནོད་འཚེ་མི་ཡོང་བར་བསམ་བློ་ཏན་ཏན་གཏོང་དགོས། ཞེས་བརྗོད་ཀྱི་ཡོད།
གལ་ཆེ་ཤོས་ནི་བོད་ཀྱི་ཤེས་ཡོན་དེ་དུས་རབས་བརྒྱད་པ་ཙམ་ནས་མཁན་ཆེན་ཞི་བ་འཚོས་ནཱ་ལེནྜ་ནས་མནམས་པའི་ནང་ཆོས་དེ་བོད་མི་ཚོས་ཧ་ཅང་གཅེས་ཉར་བྱས་ཡོད། མཁན་ཆེན་ཞི་འཚོས་བོད་མི་ཚོ་ལ། ཁྱེད་ཚོས་ཆོས་རྒྱལ་སྲོང་བཙན་སྒམ་པོའི་སྐབས་ནས་བོད་ཡིག་ཟུར་དུ་བཟོས་འདུག དེར་བརྟེན་ལེགས་སྦྱར་དང་པཱ་ལིའི་སྐད་ནང་ཡོད་པའི་གཞུང་དེ་དག་བོད་ཡིག་ནང་བསྒྱུར་དགོས། ཁྱེད་ཚོ་བོད་པ་ཚོར་བོད་སྐད་རང་གི་ཐོག་ནས་སློབ་སྦྱོང་བྱེད་རྒྱུ་ཞིག་དགོས། ཞེས་བཀའ་སློབ་གནང་ཡོད། སྐབས་དེར་སྒྲ་སྒྱུར་ལོ་པཎ་གླིང་ཞེས་བསམ་ཡས་ལ་སྒྲ་སྒྱུར་ལས་ཀ་བྱེད་མཁན་ལོ་ཙྭ་བ་དང་པཎ་གྲུབ་ཀྱི་གླིང་ཞིག་བཟོས་ཡོད། སྐབས་དེར་དཔེ་ཆ་བསྒྱུར་སྐབས་ལོ་ཙྭ་གཅིག་པུ་མིན་པར་ཞུ་དག་གཏོང་མཁན་པཎྜི་ཏ་གཅིག་མཉམ་དུ་ཡོད། ལོ་པཎ་ཟུང་འབྲེལ་ཐོག་ནས་འགྲོ་བཞིན་འདུག ལེགས་སྦྱར་ནང་ཡོད་པའི་གཞུང་གཙོ་ཆེ་བ་ཕལ་མོ་ཆེ་བོད་ཡིག་ནང་ཡོད། དེང་སྐབས་ལེགས་སྦྱར་སྐད་ནི་སྐད་དབང་རེ་ཟུང་མ་གཏོགས་དེ་ཙམ་སློབ་སྦྱོང་སྤྲོད་རྒྱུ་མེད། དེང་སྐབས་ལེགས་སྦྱར་སྐད་ཀྱི་ཚབ་བོད་སྐད་ཀྱིས་བྱེད་ཀྱི་ཡོད། མཁན་ཆེན་ཞི་འཚོ་མ་བྱོན་སྔོན་བོད་སྐད་དེ་གདོད་མའི་སྐད་ལྟ་བུ་ཞིག་བྱས་ནས་ཡར་རྒྱས་དེ་ཙམ་མེད། མཁན་ཆེན་ཞི་འཚོས་བཀའ་སློབ་གནང་བ་བཞིན་བསྒྱུར་གྱི་ཐོག་ནས་བོད་སྐད་རང་གི་ཐོག་ནས་མིང་ཚིག་གསར་པ་བཟོས་ནས་ཡར་རྒྱས་ཕྱིན་ཡོད། དེང་སྐབས་ལེགས་སྦྱར་གཞུང་ཁག་གཅིག་བོད་སྐད་ནང་སྒྲ་སྒྱུར་དང་དོན་སྒྱུར་གཉིས་ཀ་ཡོད། དེ་དག་ཧ་ཅང་ཡག་པོ་འདུག དཔལ་ནཱལེནྜའི་རིག་གཞུང་ཧ་ཅང་རླབས་ཆེན་པོ་འདི་ང་ཚོ་བོད་མི་ཚོས་བདག་པོ་བརྒྱབ་ཡོད། རྒྱ་གར་ནང་ཉམས་ཆག་ཕྱིན་པ་རེད། དཔལ་ནཱ་ལེནྜའི་རིག་གཞུང་སེམས་ཁམས་རིག་པ་དང་འབྲེལ་བ།
ཕྱོགས་མཚུངས་ཚད་མ་རིག་པ་དང་འབྲེལ་བ་དེ་དག་བོད་སྐད་ནང་ཆ་ཚང་ཡོད། བོད་ཀྱི་ཤེས་ཡོན་འདི་བོད་མི་ཙམ་གྱི་དོན་དུ་མ་རེད། འཛམ་གླིང་སྤྱི་ལ་ཕན་ཐོགས་ཡོད་པ་ཞིག་ཏན་ཏན་ཆགས་ཡོད། འདི་ཉམས་པ་སོར་ཆུད་མི་ཉམས་གོང་འཕེལ་བྱ་རྒྱུ་ཧ་ཅང་གལ་ཆེན་པོ་རེད། དེང་སྐབས་རྒྱ་ནག་གུང་བྲང་ཏང་གི་འགོ་ཁྲིད། ཀླད་པ་གུ་དོག་དེ་ཚོའི་གྲས་འགའ་ཤས་ཀྱིས་བོད་ཀྱི་སྐད་ཡིག་དེ་བོད་མི་རིགས་ཀྱི་མཚོན་བྱེད་ཡིན་སྟབས། ཁ་བྲལ་འགྲོ་རྒྱུའི་ཉེན་ཁ་འདུག་ཟེར་ནས་བོད་ཡིག་ལ་དམ་བསྒྲགས་བྱེད་བཞིན་འདུག བྱེད་བབ་དེ་ནི་བསམ་བློ་གུ་དོག་དྲགས་པ་དང་བློ་རྒྱ་ཆུང་དྲགས་པས་རེད། རྒྱ་གར་ལ་མཚོན་ན་བཙན་བྱོལ་བ་ཆགས་མ་ཐག འགོ་སྟོད་རང་ནས་སློབ་གྲྭ་འཛུགས་རྒྱུ་དང་། སློབ་གྲྭ་དེའང་བོད་པའི་ཕྲུ་གུ་ཚོར་དམིགས་ནས་སློབ་གྲྭ་ཟུར་དུ་འཛུགས་རྒྱུ། དེའི་ནང་བོད་ཡིག་སློབ་རྒྱུ་ཡོད་པ། སྐབས་དེར་རྒྱ་གར་གྱི་སྲིད་བློན་ནེ་རུ་མཆོག་ཡོད། ཁོང་གིས་རྒྱབ་སྐྱོར་ཧ་ཅང་གནང་བྱུང་། དེང་སྐབས་སེར་འབྲས་དགའ་གསུམ་གཙོ་བོར་གྱུའི་བའི་བཤད་གྲྭ་ཆེན་པོ་དེ་དག་ཚུགས་ནས་སློབ་ཕྲུག་ཁྲི་ཕྲག་ཙམ་སློབ་གཉེར་གནང་ནས་ཡོད། ནཱ་ལེནྜའི་ཤེས་ཡོན་མུ་མཐུད་ནས་ང་ཚོས་འཛིན་བཞིན་ཡོད། ང་ཚོ་བཙན་བྱོལ་བ་ཡིན་ནའང་ནཱ་ལེནྜའི་ཤེས་ཡོན་དེ་ང་ཚོས་བཙན་བྱོལ་བའི་ནང་དུའང་འཛིན་ནས་ཡོད། བོད་ནང་ས་ཁུག་ལུང་ཁུག་འགའ་ཤས་ནང་སློབ་སྦྱོང་མུ་མཐུད་བྱ་རྒྱུ་ཡོད། དེ་མིན་སྐབས་རེ་དམ་བསྒྲགས་ཚ་པོ་དང་སྐབས་རེ་ཕྲན་བུའི་དམ་བསྒྲགས་ལྷུག་ཏུ་ཕྱིན་ནས་གང་ལྟར་དཀའ་ངལ་འདུག
རིན་པ་དང་པོ་རྒྱ་ནག་ནང་དུ་ཡོད་པའི་རྒྱ་རིགས་དེ་དག་དང་ཁྱེད་ཚོ་ཐེ་ཝན་ནང་གི་རྒྱ་རིགས་ནང་པ་ཚོ་ནཱ་ལེནྜའི་ཆོས་བརྒྱུད་འཛིན་མཁན་གཅིག་པ་ཆགས་ཡོད། ཁྱེད་ཚོ་ཐང་སེང་བླ་མའི་རྗེས་འབྲང་པ་ཚོས་ཚད་མའི་གཞུང་མེད་སྟབས་རྟགས་གསལ་གཏོང་ཡག་མེད། ང་ཚོ་བོད་མི་ཚོས་ཚད་མར་དོ་སྣང་ཧ་ཅང་བྱས་སྟབས་རྟགས་གསལ་གཏོང་རྒྱུའི་གོམས་གཤིས་ཤུགས་ཆེ་ཡོད། ང་ཚོ་ཚང་མ་ནཱལེནྜའི་ཆོས་བརྒྱུད་འཛིན་མཁན་གཅིག་གྱུར་རེད། ཁྱེད་ཚོ་ལའང་ང་ཚོས་ཞབས་འདེགས་བསྒྲུབ་ཐུབ་ཡག་ཏན་ཏན་ཡོད། ཁྱེད་ཚོས་རྒྱ་ནག་ནང་གི་རྒྱ་རིགས་དེ་འདྲ་དང་འབྲེལ་བ་ཏན་ཏན་ཡོང་གི་རེད། ཁྱེད་ཚོས་ཁོང་ཚོར་འགྲེལ་བཤད་བརྒྱག་དགོས་འདུག བོད་པའི་སྐད་ཡིག་དེ་ཧ་ཅང་རླབས་ཆེན་པོ་རེད་འདུག ནང་ཆོས་འགྲེལ་བབཤད་རྒྱག་རྒྱུའི་སྐད་ཡིག་ཡག་ཤོས་དེ་བོད་པའི་སྐད་ཡིག་རེད་འདུག ཅེས་ག་ཚོད་ཐུབ་ཐུབ་ངོ་ཤེས་ཚོར་གསལ་བཤད་བྱ་རྒྱུ་ཁྱེད་ཚོའི་ལས་འགན་རེད།
བོད་ནང་གི་རྒྱ་ཆེ་མི་མང་དེ་དག་ཧ་ལས་པའི་སེམས་ཤུགས་རེད། དཀའ་ངལ་ཇི་ཙམ་ཆེ་ནའང་འཚེ་བ་མེད་པའི་ལམ་ཐོག་བོད་མི་ཚོས་འགྲོ་བཞིན་ཡོད། བར་སྐབས་ལོ་ཤས་ནང་རང་ལུས་མེར་སྲེག་ལམ་ནས་རང་ཤི་རྒྱག་མཁན་མང་ཐག་ཆོད་བྱུང་ཡོད། སོ་སོའི་སྲོག་བློ་གཏོང་ཐུབ་མཁན་ཞིག་གིས་མི་གཞན་ལ་གནོད་འཚེ་བྱེད་ཐུབ་རྒྱུ་རེད། འོན་ཀྱང་མི་ལ་གནོད་མ་སྐྱེལ་བར་སོ་སོས་རང་ལུས་མེར་སྲེག་བཏང་བ་རེད།
བོད་མི་བརྒྱ་དང་ལྔ་བཅུ་ང་གྲངས་ཤིག་གིས་རང་སྲེག་ལས་འགུལ་སྤེལ་བ་རེད། སྙིང་རྗེ། སེམས་ཤུགས་ཧ་ཅང་ཡོད། འོན་ཀྱང་གཞན་ལ་འཚེ་བ་མི་བྱས་པའི་དམ་བཅའ་བརྟན་པོར་བཟུང་ནས་གཞན་ལ་གནོད་འཚེ་མ་བྱས་པ་རེད། བོད་མི་དེ་དག་ནང་པ་སངས་རྒྱས་པའི་ཆོས་ཀྱིས་ཕྱི་དུལ་བ། ནང་དུལ་བ་ཞིག་དངོས་གནས་ཆགས་འདུག ཧ་ཅང་ཡག་པོ་རེད་འདུག སྤྱི་ཡོངས་ཀྱི་ཆ་ནས་བརྗོད་ཀྱི་ཡོད། བོད་མི་སྡུག་པ་དེ་འདྲའང་ཡོང་གི་རེད། གནས་ཚུལ་ཐ་དད་རེད། ཅེས་སོགས་ཀྱི་བཀའ་སློབ་སྩལ་རྗེས་རྨ་བྱ་ཆེན་མོའི་རྗེས་གནང་བཀའ་དྲིན་སྩལ་རྗེས་རེ་ཞིག་ཆོས་འབྲེལ་མཇུག་སྒྲིལ་མཛད་འདུག 
