༢༠༡༡ ཟླ་་༥ ཚེས་ ༦ རེས་གཟའ་པ་སངས།
༄༅། །བཙན་བྱོལ་བོད་གཞུང་ཆོས་རིག་ལས་ཁུངས་ཀྱིས་གོ་སྒྲིག་འོག་ཕྱི་ལོ་ ༢༠༡༡ ཟླ་ ༢ ཚེས་ ༡༥ ནས་ཕྱི་ཟླ་ ༤ ཚེས་ ༣༠ བར་ཝཱ་ཎཱ་དབུས་བོད་ཀྱི་གཙུག་ལག་སློབ་གཉེར་ཁང་དུ་ཧིན་སྐད་ཐོག་ནང་ཆོས་སློབ་ཁྲིད་ཀྱི་ཟབ་སྦྱོང་ལེགས་གྲུབ་ཀྱིས་མཇུག་བསྡོམས་མཛད་སྒོར་དཔལ་ལྡན་ཆོས་རིག་བཀའ་བློན་ཚེ་རིང་ཕུན་ཚོགས་མཆོག་ཕེབས་ཡོད། དེ་ཉིན་གྱི་ཕྱེད་ཡོལ་ཆུ་ཚོད་ ༣།༣༠ ཐོག་གཙུག་ལག་སློབ་གཉེར་ཁང་དེའི་མགོན་མེད་ཟས་སྦྱིན་མགྲོན་ཁང་དུ་མཇུག་བསྡོམས་མཛད་སྒོ་ཚོགས་སྐབས་ཐོག་མར་ཆོས་རིག་བཀའ་བློན་མཆོག་གིས་སྣང་གསལ་ཞལ་ཕྱེ་དང་སྦྲགས་མཛད་སྒོ་དབུ་འབྱེད་གནང་། དེ་རྗེས་སློབ་མ་གཉིས་ཀྱིས་ལེགས་སྦྱར་དང་པཱ་ལི་སྐད་ཐོག་ཤིས་བརྗོད་བཏོན་རྗེས་ཟབ་སྦྱོང་བ་གྲྭ་བཙུན་གསུམ་གྱིས་ཟབ་སྦྱོང་སྐབས་མྱོང་ཚོར་ངོ་སྤྲོད་གནང་། དེ་ནས་ཝཱ་ཎཱ་མཐོ་སློབ་ཀྱི་ཉེ་བའི་རིག་བདག་དགེ་བཤེས་ངག་དབང་བསམ་གཏན་ལགས་ཀྱིས་ཟབ་སྦྱོང་བ་རྣམས་ལ་མཇལ་དར་དང་ཕྱག་འཁྱེར་གནང་གྲུབ་བསྟུན། ཆོས་རིག་བཀའ་བློན་མཆོག་གིས་ཟབ་སྦྱོང་སྤྲོད་མཁན་དགེ་རྒན་རྣམས་ལ་ཐུགས་རྗེ་ཆེ་ཞུའི་མཇལ་དར་དང་། ལེགས་སྐྱེས་ཕྱག་རྟགས་དེ་བཞིན་ཕྱག་འཁྱེར་སོགས་གནང་སྟེ་མཛད་སྒོ་དང་འབྲེལ་བའི་གསུང་བཤད་གནང་རྗེས་ཝཱ་ཎཱ་མཐོ་སློབ་ཀྱི་ཉེ་བའི་རིག་བདག་ནས་ཀྱང་གསུང་བཤད་གནང་བསྟུན། ཆོས་རིག་དྲུང་འཕར་ནོར་བུ་དོན་ལྡན་ལགས་ཀྱིས་ཐུགས་རྗེ་ཞུས་ཏེ་མཛད་སྒོ་ལེགས་པར་གྲུབ།
ཕྱི་དྲོ་ཆུ་ཚོད་ ༥།༣༠ ཐོག་ཝཱ་ཎཱ་དགེ་ལས་སློབ་ཕྲུག་དང་གཞན་ཡང་ས་གནས་བོད་རིགས་བཅས་ཚང་འཛོམས་ཐོག་ཆོས་རིག་བཀའ་བློན་མཆོག་གིས་གསུང་བཤད་གནང་བ་མ་ཟད། མང་ཚོགས་ཀྱི་དྲི་བ་ཁག་ལ་ལན་འདེབས་ཀྱང་གནང་ཡོད། ཆུ་ཚོད་ ༧།༣༠ ཐོག་ཆོས་རིག་ལས་ཁུངས་ཀྱིས་གོ་སྒྲིག་ཐོག་ཟབ་སྦྱོང་སྤྲོད་མཁན་དགེ་རྒན་རྣམས་དང་ཟབ་སྦྱོང་བ་གྲྭ་བཙུན་རྣམས་ལ་གསོལ་སྟོན་བཤམས་ཡོད།
ཕྱི་ཟླ་ ༥ ཚེས་ ༡ ཉིན་གྱི་ཕྱེད་ཡོལ་ཆུ་ཚོད་ ༢ ཐོག་ཆོས་རིག་བཀའ་བློན་མཆོག་ཝཱ་ཎཱ་ནས་ཕེབས་ཐོན་གྱིས་ཚེས་ ༣ ཉིན་རྡ་སར་ཕྱིར་ཕེབས་གནང་ཡོད་པ་བཅས།།
ཧིན་སྐད་ཐོག་ནང་ཆོས་སློབ་ཁྲིད་ཀྱི་ཟབ་སྦྱོང་ལེགས་གྲུབ་བྱུང་བ།
གསར་གནས།
![](https://bod.asia/wp-content/uploads/2017/08/cropped-Central_Tibetan_Admin_Logo-1-370x370.jpeg)
འབྲེལ་གནས།
![](https://bod.asia/wp-content/uploads/2017/08/cropped-Central_Tibetan_Admin_Logo-1-370x370.jpeg)