༢༠༡༡ ཟླ་ ༥ ཚེས་ ༥ རེས་གཟའ་ཕུར་བུ།
༄༅། །ཕྱི་ལོ་ ༢༠༡༡ ཟླ་ ༥ ཚེས་ ༥ ཉིན་བཞུགས་སྒར་རྡ་ས་ཐེག་ཆེན་ཆོས་གླིང་གཙུག་ལག་ཁང་དུ་བོད་གཞུང་ཆོས་རིག་ལས་ཁུངས་ནས་གོ་སྒྲིག་ཐོག་རྒྱ་གར་བྱང་ཤར་ཨ་རུ་ན་ཅལ་མངའ་སྡེའི་སྤྱི་ཁྱབ་བློན་ཆེན་རྡོ་རྗེ་མཁའ་འགྲོ་མཆོག་གནམ་གཤིས་རྐྱེན་ངན་གྱིས་ཐད་འཕུར་གནམ་གྲུར་བརྡབ་སྐྱོན་བྱུང་སྟེ་འདས་གྲོངས་སུ་གྱུར་བར་བརྟེན་མཆོད་འབུལ་སྨོན་ལམ་ཚོགས་ཡོད།
དེ་ཉིན་སྔ་དྲོ་ཆུ་ཚོད་ ༨།༣༠ ཐོག་སྟག་ལུང་ཞབས་དྲུང་རིན་པོ་ཆེ་མཆོག་དང་། རྣམ་རྒྱལ་ཕན་བདེ་ལེགས་བཤད་གླིང་གི་མཁན་པོ་རིན་པོ་ཆེ་མཆོག བཙན་བྱོལ་བོད་གཞུང་ཆོས་རིག་དྲུང་ཆེ་ངག་དབང་ཆོས་གྲགས་ལགས་ཀྱིས་དབུས་རྡ་སའི་ཉེ་འཁོར་གྱི་དགོན་སྡེ་གྲྭ་ཚང་དང་། གཉུག་མར་གནས་པ། གློ་བུར་ལྷགས་པའི་དགེ་བཙུན་སྔགས་གསུམ་དང་གཞུང་འབྲེལ་མ་ཡིན་པའི་ཚོགས་སྡེ་ཁག དེ་བཞིན་སེར་སྐྱ་མི་མང་བརྒྱ་ཕྲག་འགའ་ཤས་བཅས་ལྷན་འཛོམས་ཀྱིས་ཉེ་ཆར་ཕྱི་ཟླ་ ༤ ཚེས་ ༣༠ ཉིན་རྒྱ་གར་བྱང་ཤར་ཨ་རུ་ན་ཅལ་མངའ་སྡེའི་སྤྱི་ཁྱབ་བློན་ཆེན་རྡོ་རྗེ་མཁའ་འགྲོ་མཆོག་གིས་དབུས་ཞབས་ཞུ་བ་ཁག་གཅིག་གནམ་གཤིས་རྐྱེན་ངན་གྱིས་ཐད་འཕུར་གནམ་གྲུར་རྡབ་སྐྱོན་བྱུང་སྟེ་འདས་གྲོངས་སུ་གྱུར་བར་བརྟེན་དམ་པ་ཁོང་རྣམས་ཀྱི་གཙོས་འབྲེལ་ཐོག་སེམས་ཅན་རྣམས་ཀྱི་སླད་རྟེན་མཆོག་སྤྱན་སྔར་མཆོད་སྤྲིན་སྣ་ལྔ་འབུལ་བཤམས་ཀྱི་སེམས་ཅན་ཚེ་ལས་འདས་པ་ཡོངས་ཀྱི་ཚེ་རབས་ཕྲེང་བར་བྱས་བསགས་སྡིག་ལྟུང་མཐའ་དག་བྱང་ཞིང་དག་ནས་དལ་རྟེན་རིམ་བརྒྱུད་ཀྱི་སྐུ་བཞི་རྒྱལ་བའི་གོ་འཕང་རིན་པོ་ཆེ་མྱུར་དུ་ཐོབ་ཆེད་འཕགས་མཆོག་འདུས་པ་རྒྱ་མཚོར་བསྙེན་བཀུར་མང་ཇ་དང་། དགེ་བཙུན་སྔགས་གསུམ་ལ་སྐུ་འགྱེད་བཅས་དད་གདུང་དྲག་པོས་འབུལ་ལམ་ཞུས་ཏེ་དམ་པ་ཁོང་གི་རྗེས་ཤུལ་ནང་མི་རྣམས་ཀྱི་གཙོས་འཇིག་རྟེན་ཀུན་ཏུ་སྙིགས་ལྔའི་རྒུད་ཚོགས་སྤྱི་དང་། ཁྱད་པར་འབྱུང་བཞིའི་འཇིག་པའི་རྐྱེན་ངན་མི་འབྱུང་བར་བདེ་སྐྱིད་རྫོགས་ལྡན་གྱིས་དཔལ་ལ་ལོངས་སུ་སྤྱོད་ཐུབ་པའི་མཆོད་འབུལ་སྨོན་ལམ་རྒྱ་ཆེ་ཞིག་ཚོགས་ཡོད་པ་བཅས། །