༢༠༡༡ ཟླ་ ༥ ཚེས་ ༤ རེས་གཟའ་ལྷག་པ།
༄༅། །ཕྱི་ལོ་ ༢༠༡༡ ཟླ་ ༥ ཚེས་ ༤ ཉིན་ཨ་རུ་ན་ཅལ་མངའ་སྡེའི་བློན་ཆེན་རྡོ་རྗེ་མཁའ་འགྲོ་མཆོག་མཁའ་ལམ་བརྒྱུད་ཕེབས་སྐབས་གནམ་གྲུར་རྡབ་སྐྱོན་བྱུང་སྟེ་འདས་གྲོངས་སུ་གྱུར་བའི་ཡིད་སྐྱོའི་གནས་ཚུལ་ཐོན་པར་བཙན་བྱོལ་བོད་གཞུང་གི་བཀའ་ཁྲི་མཆོག་གིས་ཐུགས་གསོ་གནང་བའི་ནང་འཁོད་དོན།
ཨ་རུ་ནཱ་ཅལ་པར་དེ་ཤིའི་སྤྱི་ཁྱབ་བློན་ཆེན་རྡོ་རྗེ་མཁའ་འགྲོ་མཆོག་ཉེ་ཆར་སྟབས་མ་ལེགས་པ་ཞིག་ལ་ཐད་འཕུར་གནམ་གྲུ་ཟག་ནས་སྐུ་ཚེ་མ་ཟིན་པའི་གནས་ཚུལ་བྱུང་བ་དེ་བློ་ཕམ་དང་སེམས་འཚབ་ཧ་ཅང་ཆེན་པོ་བྱུང་། ཁོང་ནི་ཨ་རུ་ནཱ་ཅལ་མངའ་སྡེའི་དབུ་ཁྲིད་དགུང་ལོ་གཞོན་ལ་དྲང་བདེན་དྲག་གྲས་ཤིག་ཡིན་པ་མ་ཟད། སྤྱི་ཁྱབ་བློན་ཆེན་གནང་བའི་རིང་ཨ་རུ་ནཱ་ཅལ་གྱི་མང་ཚོགས་དང། ཨ་རུ་ནཱ་ཅལ་ཁུལ་དུ་ཡོད་པའི་བོད་པ་ཚང་མར་ཕན་ཐོགས་ཆེན་པོ་ཡོང་དང་ཡོང་བཞིན་པ་དང་དུས་བདེ་ཞི་འཇགས་ཡག་པོ་བྱས་ནས་གནས་ཐུབ་པ་གནང་ཡོད།
མ་ཟད་ཁོང་གི་མངའ་སྡེ་ཡར་རྒྱས་ཀྱི་ལས་དོན་ཧ་ཅང་ཚགས་ཚུད་གནང་མཁན་ཞིག་ཡིན། ཁོང་རྐྱེན་འདས་སུ་གྱུར་བ་དེ་བོད་པ་དང་ཨ་རུ་ནཱ་ཅལ་གྱི་ཡུལ་མི་ཚང་མར་གོད་ཆག་ཆེན་པོ་ཆགས་ཡོད་པར་བརྟེན། ང་དང་ངའི་བཀའ་བློན་ལས་རོགས་ཚང་མའི་ངོས་ནས་སེམས་ཚོར་ཆེན་པོས་ཨ་རུ་ནཱ་ཅལ་མི་མང་དང། ལྷག་པར་དུ་ཁོང་གི་ནང་མི། སྐུ་འཁོར་ཚང་མར་སེམས་གསོ་ཞུ་རྒྱུ་དང་ཆབས་ཅིག་དལ་རྟེན་བརྒྱུད་ནས་སྐུ་བཞི་གོ་འཕང་ཐོབ་པའི་སྨོན་ལམ་ཞུ་རྒྱུ་དང། ཆོས་རིགས་ལས་ཁུངས་བརྒྱུད་ནས་སང་ཉིན་གཙུག་ལག་ཁང་གི་རྟེན་མཆོག་སྤྱན་སྔར་མཆོད་འབུལ་སྨོན་ལམ་འཚོགས་རྒྱུ་ཡིན། ཞེས་གསུངས་ཡོད་པ་བཅས། །
