ཕྱི་ལོ་ ༢༠༡༩ ཟླ་ ༧ ཚེས་ ༢༩ རེས་གཟའ་ཟླ་བ།
༄༅། །དབྱར་ཁའི་གུང་གསེང་དང་བསྟུན་སུད་སི་དང་ལིག་ཏེན་སིཊཡན་ Liechtenstein བོད་རིགས་སྤྱི་མཐུན་ཚོགས་པའི་གོ་སྒྲིག་འོག་ཕྱི་ལོ་ ༢༠༡༩ ཟླ་ ༧ ཚེས་ ༢༧ ནས་ ༣༡ བར་ཉིན་གྲངས་ལྔའི་རིང་ཐེངས་དང་པོ་སུད་སིའི་ཨར་བྷར་གྷི་ Aarburg གྲོང་སྡེའི་ནང་དབྱར་ཁའི་བོད་ཀྱི་སྐད་ཡིག་དང་རིག་གཞུང་འཛིན་གྲྭ་འཚོགས་བཞིན་ཡོད་པ་དང་། ཐེངས་འདིའི་བོད་ཀྱི་སྐད་ཡིག་དང་རིག་གཞུང་འཛིན་གྲྭར་སུད་སིའི་གཟའ་མཇུག་སློབ་གྲྭ་ཁག་དྲུག་གི་སློབ་མ་གྲངས་ ༤༣ དང་ཨོ་སི་ཊི་རི་ཡའི་བོད་རིགས་སློབ་མ་གྲངས་ ༢ བཅས་འཛུལ་ཞུགས་གནང་ཡོད།
དེ་ཡང་དབྱར་ཁའི་བོད་ཀྱི་སྐད་ཡིག་དང་རིག་གཞུང་འཛིན་གྲྭ་གོ་སྒྲིག་ཞུ་དགོས་པའི་དམིགས་ཡུལ་གཙོ་བོ་ནི། སློབ་ཕྲུག་ཚོར་བོད་སྐད་ཀྱི་ཁོར་ཡུག་བསྐྲུན་རྒྱུ་དང་། སློབ་ཕྲུག་ནང་ཁུལ་བར་འབྲེལ་ལམ་ཡག་ཏུ་གཏོང་རྒྱུའི་ཆེད་རེད་འདུག སློབ་ཕྲུག་ཚོ་སྤྲོ་སྣང་ཡོང་བ་དང་བོད་རང་གི་ཁྱད་ཆོས་མཚོན་ཐུབ་པར་དམིགས་ཏེ་སྤང་ཐང་དུ་ཁ་དོག་རྣམ་པར་བཀྲ་བའི་གུར་ཕུབ་པ་དང་དར་ལྕོག་བཏགས་ཡོད། སློབ་ཕྲུག་ཡོངས་ས་དང་། ཆུ། མེ། རླུང་། ནམ་མཁའ། ཞེས་འབྱུང་བ་ལྔ་མཚོན་པའི་རུ་ཁག་བཅུ་བཟོས་ཏེ་སྨོན་ལམ་གསུང་འདོན་གནང་རྒྱུའི་མཚོན་པའི་བོད་ཀྱི་རྒྱལ་རབས་ལོ་རྒྱུས་དང་། རིག་གཞུང་། སྐད་ཡིག སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་འགྲོ་བ་མིའི་གཞི་རྩའི་རིན་ཐང་དང་། བྱམས་པ། སྙིང་རྗེ་སོགས་ཀྱི་སྐོར་བཀའ་སློབ་ཕེབས་ཡོད་པའི་སྐོར་སྦྱང་བརྩོན་བྱེད་དགོས།
ཕྱི་ཚེས་ ༢༨ ཉིན་སུད་སིའི་སྐུ་ཚབ་དོན་གཅོད་འཆི་མེད་རིག་འཛིན་ལགས་དང་དོན་གཅོད་ཁང་གི་ལས་བྱེད་བསོད་ནམས་མཐར་ཕྱིན་ལགས་རྣམ་གཉིས་དབྱར་ཁའི་འཛིན་གྲྭར་ཆེད་ཕེབས་ཀྱིས་རྟོག་ཞིབ་གནང་ཡོད་པ་དང་། སྐབས་དེར་སུད་སིའི་སྐུ་ཚབ་དོན་གཅོད་འཆི་མེད་རིག་འཛིན་ལགས་ཀྱིས། བོད་ཀྱི་སློབ་ཕྲུག་རྣམས་ནི་མ་འོངས་བོད་ཀྱི་སོན་རྩ་ཡིན་པས་སློབ་ཕྲུག་མི་རེ་ངོ་རེས་བོད་ཀྱི་རིག་གཞུང་དང་། སྐད་ཡིག ངོ་བོ་སོགས་མི་ཉམས་རྒྱུན་འཛིན་བྱ་དགོས་པའི་འགན་ཡོད་པ་མ་ཟད། སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་ཐུགས་རྗེ་བཀའ་དྲིན་དྲན་དགོས་ཞེས་ནན་ཏན་གྱིས་གསུངས། སློབ་ཕྲུག་ཚོར་རམ་འདེགས་ཞུ་མཁན་ལས་བྱེད་གྲངས་ ༡༠ ཡོད་འདུག་པ་བཅས། །
