ཕྱི་ལོ་ ༢༠༡༩ ཟླ་ ༧ ཚེས་ ༥ རེས་གཟའ་པ་སངས།

༄༅། །ཕྱི་ལོ་ ༢༠༡༩ ཟླ་ ༦ ཚེས་ ༢༩ ཉིན་ནིའུ་ཛི་ལན་ཌའི་ཡུལ་གྱི་གསར་འགྱུར་བརྒྱུད་ལམ་སྟེང་གནས་ཚུལ་སྤེལ་གསལ་ལྟར་ན། ཕ་བོད་པ་དང་མ་ནིའུ་ཛེ་ལན་ཌ་མི་སེར་ཡིན་པའི་རང་ལོ་ ༡༤ སོན་པའི་ན་གཞོན་རྐང་སྤོལ་རྩེད་མོ་བ་ཉི་མ་ཚེ་རིང་རྒྱ་ནག་ཏུ་འཚོགས་རྒྱུ་ཡིན་པའི་འཛམ་གླིང་གཞོན་སྐྱེས་རྐང་སྤོལ་འགྲན་སྡུར་ཞེས་སྙན་གྲགས་ཅན་གྱི་གྷོ་ཐེ་ཡ་ Gothia Cup རྐང་སྤོལ་རྩེད་འགྲན་ནང་མཉམ་ཞུགས་བྱེད་མཁན་ནིའུ་ཛེ་ལན་ཌའི་སྒེར་གྱི་རྐང་སྤོལ་རུ་ཁག་ཁོངས་འདེམས་སྒྲུག་བྱས་ཡོད་འདུག་ཀྱང་ཁོང་གི་ཕ་བོད་པ་ཡིན་སྟབས། རྒྱ་གཞུང་གིས་ཁོང་ལ་མཐོང་མཆན་མ་སྤྲད་པར་འགོག་རྐྱེན་མང་དག་ཅིག་བཟོས་པར་བརྟེན། རྩེད་འགྲན་རུ་ཁག་གི་་ཁོངས་ནས་ཕྱིར་འཐེན་བྱས་ཡོད་འདུག

ཁོང་གི་ཨ་མ་མེ་གྷན་ཚེ་རིང་ཡཱང་ Megan Tsering Young ལགས་ཀྱིས་རྩེད་འགྲན་རུ་ཁག་ལ་དུས་ཚོད་སོགས་ཀྱི་དཀའ་ངལ་འཕྲད་རྐྱེན་ཁོང་གི་བུ་རུ་ཁག་ནས་ཕྱིར་འཐེན་བྱེད་རྒྱུ་ལས་གཞན་འདམ་ག་གང་ཡང་ལྷག་མེད། རྒྱ་ནག་གཞུང་ཚབ་ཁང་ནས་རྩེད་འགྲན་པ་གཞན་ཚང་མར་དུས་ཚོད་མ་འགྱངས་པར་མཐོང་མཆན་སྤྲད་ཡོད་ཀྱང་། ཉི་མ་ཚེ་རིང་གི་པཱ་ལགས་བོད་པ་ཡིན་སྟབས། རྒྱ་ནག་གཞུང་གིས་ཁོང་ལ་མི་རིགས་དབྱེ་འབྱེད་བྱས་པ་ཞིག་རེད། ཅེས་གསུང་།

དེ་སྔ་ཉི་མ་ཚེ་རིང་གི་ཕ་མ་གཉིས་བོད་ནང་ནང་མི་ཐུག་འཕྲད་སླད་བསྐྱོད་རྒྱུར་མཐོང་མཆན་ཞུས་པར་དུས་ཚོད་མང་པོ་འགྱངས་པ་སོགས་ཀྱི་དཀའ་ངལ་འཕྲད་མྱོང་ཡོད་པར་བརྟེན།  ཁོང་གི་ཨ་མ་ལགས་ཀྱིས་མཐོང་མཆན་སྙན་ཞུ་དེ་རྩེད་འགྲན་པ་གཞན་ལས་སྔོན་ལ་བཏང་ཡོད་ནའང་། སྙན་ཞུ་དེ་རྒྱ་ནག་ལ་གཏོང་དགོས་ཚུལ་སོགས་ལ་སྙད་དེ་ཐོངས་མཆན་སྤྲད་རྒྱུ་དུས་འགྱངས་བྱས་ཡོད་པ་མ་ཟད། བདུན་ཕྲག་སྔོན་མར་ཁོང་ལ་ཡི་གེ་ཞིག་འབྱོར་བའི་ནང་། གལ་ཏེ་ཁོང་གིས་རྐང་སྤོལ་རྩེད་འགྲན་ནང་མཉམ་ཞུགས་བྱས་པ་ཙམ་ལས་བྱེད་སྒོ་གཞན་ནང་ཞུགས་རྒྱུ་མིན་པའི་ཁས་ལེན་གྱི་ཡི་གེ་འབྲི་ཚེ། མཐོང་མཆན་སྤྲད་མིན་བསམ་བློ་གཏོང་སྲིད་སྐོར་བརྗོད་ཡོད་འདུག

ཉི་མ་ལགས་ཀྱི་ཨ་མ་ལགས་ཀྱིས། རང་ལོ་བཅུ་བཞི་ལ་སོན་པའི་བྱིས་པ་ཞིག་གིས་རྐང་སྤོལ་རྩེས་པ་ཙམ་གྱིས་ཉེན་ཁ་ཡོད་པ་ཞིག་ངས་མཐོང་གི་མི་འདུག ཁོང་གི་ནང་མིའི་ངོས་ནས་གནད་དོན་དེ་དྲང་ལྡན་ཞིག་མིན་པར་གཟིགས་ཀྱི་ཡོད་ཀྱང་ཁོང་གི་བུས་ཡི་གེ་དེ་བྲིས་རྒྱུ་ཡིན་པ་གསུངས་འདུག

ནིའུ་ཛ་ལན་ཌིར་སྐྱེས་པའི་བོད་རིགས་རྐང་སྤོལ་རྩེ་འགྲན་པ་ཞིག་ལ་དཀའ་ངལ་དེ་ལྟར་འཕྲད་ཀྱི་ཡོད་ཚེ་བོད་ནང་གི་བོད་མི་མང་ཚོགས་རྣམས་ཀྱི་གནས་སྟངས་གང་འདྲ་ཡོད་དམ་ཞེས་དྲི་བ་ཞིག་ཀྱང་གནང་འདུག

དྲིལ་བསྒྲགས་དྲུང་ཆེ་ཨརྱ་ཚེ་དབང་རྒྱལ་པོ་ལགས་ཀྱིས། རྒྱ་ནག་དམག་དོན་དང་དཔལ་འབྱོར་གྱི་ཆ་ནས་སྟོབས་ཆེན་རྒྱལ་ཁབ་ཡིན་ཡང་། དོན་དངོས་སུ་རྒྱ་ནག་གིས་རང་ལོ་བཅུ་བཞི་ལ་སོན་པའི་ནིའུ་ཛི་ལན་ཌའི་མི་སེར་ཡིན་པའི་བོད་རིགས་འདྲེས་མའི་བྱིས་པ་ཞིག་རྒྱ་ནག་ནང་རྐང་སྤོལ་རྩེད་འཇུག་རྒྱུར་ཞེ་སྣང་སྐྱེ་ཡི་ཡོད་པ་རེད། ཅེས་གསུངས། 

སྤྱིར་སྙན་གྲགས་ཅན་གྱི་གྷོ་ཐེ་ཡ་ Gothia Cup རྐང་སྤོལ་རྩེད་འགྲན་འདི་བཞིན་རྒྱ་ནག་གི་ཁྲིན་ཡང་གྲོང་ཁྱེར་དུ་འདི་ལོའི་ཕྱི་ཟླ་ ༨ ཚེས་ ༡༢ ནས་ ༢༠ བར་ཉིན་གྲངས་ ༨ རིང་རྩེད་འགྲན་གནང་རྒྱུ་ཡིན་འདུག་པ་དང་། ཕྱི་ལོ་ ༡༩༧༥ ལོར་ཐོག་མར་དབུ་འཛུགས་གནང་བ་ནས་བཟུང་ད་བར་འཛམ་གླིང་རྒྱལ་ཁབ་འདྲ་མིན་ཁག་ ༡༤༣ ཙམ་ནས་རྩེད་འགྲན་པ་ས་ཡ་གཅིག་ལྷག་ནས་དེའི་ནང་མཉམ་ཞུགས་གནང་ཡོད་པ་མ་ཟད།  ་ཕྱི་ལོ་ ༢༠༠༧ ལོར་ FIFA ཞེས་རྒྱལ་སྤྱིའི་རྐང་སྤོལ་ལྷན་ཚོགས་ཀྱིས་འཛམ་གླིང་གཞོན་སྐྱེས་རྐང་སྤོལ་རྩེད་འགྲན་ཞེས་མཚན་གནས་ཕུལ་ཡོད་པ་བཅས། །