ཕྱི་ལོ་ ༢༠༡༩ ཟླ་ ༥ ཚེས་ ༢༧ རེས་གཟའ་ཟླ་བ།
༄༅། །ཕྱི་ལོ་ ༢༠༡༩ ཟླ་ ༥ ཚེས་ ༡༩ ནས་ ༢༥ བར་རྒྱ་ནག་ནང་གི་ཨ་རིའི་གཞུང་ཚབ་པ་ཆེན་མོ་སྐུ་ཞབས་ཊེ་རི་བྷ་རནྜ་སི་ཊཌ་ Terry Branstad མཆོག་བོད་ཀྱི་མཚོ་སྔོན་ཞིང་ཆེན་དང་། བོད་ཀྱི་ས་གནས་གཞན་ཁག་གཅིག་ཏུ་གཞུང་འབྲེལ་འཚམས་གཟིགས་ཕེབས་ནས་ཕྱིར་འཁོར་རྗེས། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཚབ་དང་ལྷན་བོད་རྒྱ་འབྲེལ་མོལ་བསྐྱར་གསོ་གནང་དགོས་པ་དང་། བོད་མིའི་ཆོས་དད་རང་དབང་ལ་རྒྱ་ནག་གཞུང་གིས་བརྩི་བཀུར་ཞུ་དགོས་པའི་རེ་འདུན་ཤུགས་ཆེ་བཏོན་ཡོད་སྐོར་ཨ་རིའི་ཕྱི་སྲིད་ལས་ཁུངས་ཀྱིས་རེས་གཟའ་སྤེན་པའི་ཉིན་གསུང་འདུག
དེ་ཡང་ཨ་རིའི་ཕྱི་སྲིད་ལས་ཁུངས་ནས་མུ་མཐུད་གསུང་དོན། གཞུང་ཚབ་པ་མཆོག་གིས་ཡུན་རིང་ནས་ཨ་རིའི་གཞུང་ལ་སེམས་འཚབ་ཡོད་པའི་གནད་དོན་ཁག་གཅིག་གླེང་འདུག་པ་ནི། བོད་ནང་དུ་བོད་མི་ཚོའི་ཆོས་དད་རང་དབང་ཐོག་རྒྱ་ནག་གཞུང་གིས་དམ་བསྒྲགས་སུན་གཙེར་བྱེད་བཞིན་པ་དང་། བོད་རང་སྐྱོང་ལྗོངས་ཀྱི་ས་ཁུལ་ནང་ཨ་རིའི་མི་སེར་འགྲོ་འོང་གི་རང་དབང་ལ་བརྩི་བཀུར་ཞུ་དགོས་པ། དེ་བཞིན་བོད་རྒྱའི་གནད་དོན་གསལ་ཆེད་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཚབ་དང་ལྷན་ཆ་རྐྱེན་གང་ཡང་མེད་པར་འབྲེལ་མོལ་བསྐྱར་གསོ་གནང་དགོས་པ་བཅས་གླེང་ཡོད། ཅེས་ཨ་རིའི་ཕྱི་སྲིད་ལས་ཁུངས་ཀྱིས་བསྒྲགས་འདུག
ཐེངས་འདིར་གཞུང་ཚབ་ཆེན་མོ་མཆོག་བོད་ཀྱི་རྒྱལ་ས་ལྷ་སའི་ཕོ་བྲང་པོ་ཏཱ་ལ་དང་། ལྷ་སའི་ཇོ་ཁང་། ནོར་གླིང་ཕོ་བྲང་། དེ་བཞིན་སེ་ར་དགོན་པ་བཅས་སུ་འཚམས་གཟིགས་གནང་བ་དང་སྦྲགས། གཞུང་ཚབ་ཆེན་མོ་མཆོག་གིས་བོད་མིའི་ཆོས་ཕྱོགས་ཀྱི་དབུ་ཁྲིད་གཙོ་གྲས་ཁག་གཅིག་དང་། ཤེས་ཡོན་ཅན་བཅས་དང་མཇལ་འཕྲད་གནང་འདུག་པ་བཅས།།
