༢༠༡༡ ཟླ་ ༤ ཚེས་ ༢༠ རེས་གཟའ་ལྷག་པ།
ཌན་མག་གྲོས་ཚོགས་འཐུས་མི་རྣམས་དང་ལྷན།
༄༅། །ཕྱི་ལོ་ ༢༠༡༡ ཟླ་ ༤ ཚེས་ ༡༨ ཉིན་༸གོང་ས་༸སྐྱབས་མགོན་ཆེན་པོ་མཆོག་གིས་ཌན་མཀ་རྒྱལ་ས་ཀོ་པན་ཧཱ་གན་ (Copenhagen) ནང་ཡུལ་དེའི་གྲོས་ཚོགས་ཀྱི་འཐུས་མི་ ༡༡ ཙམ་ལ་མཇལ་ཁ་དང་ལམ་སློབ་བཀའ་སློབ་སྩལ་ཡོད།
དེ་ཡང་སྐབས་དེར་༸གོང་ས་༸སྐྱབས་མགོན་ཆེན་པོ་མཆོག་གིས་ཐེངས་འདིའི་ཌན་མཀ་ནང་གི་ཆིབས་སྒྱུར་དེ་བཞིན་ཆབ་སྲིད་དང་འབྲེལ་བ་གང་ཡང་མེད་སྐོར་བཀའ་སློབ་སྩལ་བ་མ་ཟད། མགོན་པོ་གང་ཉིད་མཆོག་གིས་ཆབ་སྲིད་ཀྱི་སྐུ་དབང་ཡོངས་རྫོགས་མང་གཙོའི་ལམ་ནས་མི་དམངས་ཀྱིས་འོས་འདེམས་བྱས་པའི་མི་སྣར་རྩིས་སྤྲོད་མཛད་རྒྱུའི་གནད་དོན་དང་འབྲེལ་བའི་དྲི་བ་ཁག་གཅིག་ལ་བཀའ་ལན་སྩོལ་སྐབས་མགོན་པོ་གང་ཉིད་མཆོག་གིས་དགོངས་བཞེས་ཐག་གཅོད་མཛད་པ་དེ་ནི་དུས་ཀྱི་ཆ་ནས་འོས་ཤིང་འཚམ་པ་ཞིག་ཆགས་ཡོད་སྐོར་བཀའ་ལན་སྩལ་ཡོད།
དེ་བཞིན་༸གོང་ས་༸སྐྱབས་མགོན་ཆེན་པོ་མཆོག་གིས་ས་གནས་བོད་མི་དང་གཞན་ཡང་ནོར་ཝེ་ནས་ཆེད་བཅར་ཞུས་པའི་བོད་མི་བཅས་ཁྱོན་མི་གྲངས་ ༨༠ བརྒལ་བར་མཇལ་དང་བཀའ་སློབ་ཕེབས་དོན།
རང་ཉིད་བོད་རིགས་ཡིན་པའི་འདུ་ཤེས་ནམ་ཡང་བརྗེད་རྒྱུ་མེད། དེ་བཞིན་བོད་མི་རིགས་ཀྱི་ཡ་རབས་བཟང་སྤྱོད་གོང་སྤེལ་གཏོང་དགོས། ཕྱོགས་མཚུངས་རང་ཉིད་ཀྱི་བུ་ཕྲུག་ཚོར་བོད་ཀྱི་རིག་གཞུང་དང་སྐད་ཡིག་སློབ་ཁྲིད་བྱེེད་རྒྱུའི་འགན་འཁྲི་ཡོད་ཅེས་སོགས་ཀྱི་བཀའ་སློབ་སྩལ་ཡོད་པ་མ་ཟད།
ས་གནས་བོད་རིགས་རྣམས་ལ་བཀའ་སློབ་སྩོལ་བཞིན་པ།
མགོན་པོ་གང་ཉིད་མཆོག་གིས་ཆབ་སྲིད་དང་འཛིན་སྐྱོང་གི་སྐུ་དབང་ནས་དགོངས་ཞུའི་ཐད་བོད་མི་རྣམས་ནས་སེམས་ཁྲལ་རྩ་བ་ནས་བྱེད་མི་དགོས་པའི་བཀའ་སློབ་ཀྱང་ཕེབས་ཡོད། ༸གོང་ས་༸སྐྱབས་མགོན་ཆེན་པོ་མཆོག་གིས་ཌན་མཀ་ནང་གི་མཛད་འཕྲིན་ཁག་ལེགས་པར་གྲུབ་རྗེས་ས་གནས་དེའི་ཆུ་ཚོད་ ༩ ཙམ་ལ་འཇར་མ་ནི་བརྒྱུད་རྒྱ་གར་ལ་ཆིབས་ཞལ་བསྒྱུར་ཡོད་པ་བཅས། །
