ཕྱི་ལོ་ ༢༠༡༩ ཟླ་ ༥ ཚེས་ ༦ རེས་གཟའ་ཟླ་བ།

 ༄༅།  །ཤེས་རིག་ལས་ཁུངས་ནས་ཕྱི་ལོ་ ༢༠༠༢ ལོར་བོད་གཞུང་དགའ་ལྡན་ཕོ་བྲང་དབུ་བརྙེས་ནས་ལོ་ངོ་ ༣༦༠ འཁོར་བའི་དུས་ཆེན་སྲུང་བརྩི་ཞུ་སྐབས། དམིགས་བསལ་ལས་འགུལ་མང་དག་སྤེལ་བའི་ཁོངས་ནས་རྒྱ་གར་རྒྱལ་ཡོངས་འཛིན་རིམ་ ༡༢ ཡིག་རྒྱུགས་ཆེན་མོའི་ནང་ཚན་རིག་དང་། སྒྱུ་རྩལ། ཚོང་རིག་བཅས་སློབ་ཚན་སྡེ་ཁག་སོ་སོའི་ནང་ནས་སྦྱང་འབྲས་རྩེ་ཕུད་སོན་པའི་སློབ་ཕྲུག་རེར་དགའ་ལྡན་ཕོ་བྲང་སློབ་ཕྲུག་གཟེངས་རྟགས་ཞེས་ལོ་ལྟར་གནང་རྒྱུ་འགོ་འཛུགས་ཞུས་ཡོད་པ་དང་།  འདི་ལོའི་དགའ་ལྡན་ཕོ་བྲང་གི་བྱ་དགའ་ཐོབ་མཁན་ཚན་རིག་སྡེ་ཚན་ཁོངས་ཨང་དང་པོ། སེ་ལ་ཁུའི་བོད་ཁྱིམ་སློབ་གྲྭའི་སློབ་མ་ཀརྨ་ཕུན་ཚོགས་ཟླ་བ་ལགས་དང་། སྒྱུ་རྩལ་སྡེ་ཚན་ཁོངས་ནས་ཨང་དང་པོ་སྦེལ་ཀོབ་སཾ་བྷོ་ཊའི་སློབ་མ་བསྟན་འཛིན་གངས་མཚོ་ལགས།  ཚོང་རིག་གི་སྡེ་ཚན་ཁོངས་ནས་ཨང་དང་པོ་སྦེལ་ཀོབ་བོད་ཁྱིམ་གྱི་སློབ་མ་བསྟན་འཛིན་ལུང་རིགས་ལགས་བཅས་ལ་བཅར་འདྲི་ཞུས་པ་ཁག་གཤམ་གསལ།

ཀརྨ་ཕུན་ཚོགས་ཟླ་བ་ལགས།

དྲི་བ། རངཉིད་སྐོར་ངོ་སྤྲོད་སྙིང་བསྡུས་ཤིག་གནང་རོགས།

ཀརྨ་ཕུན་ཚོགས་ཟླ་བ་ལགས།  ངའི་ཕ་མ་རྣམ་གཉིས་སུ་ཇ་བོད་ཁྱིམ་གྱི་དགེ་རྒན་རེད། སྔོན་འགྲོ་ནས་འཛིན་རིམ་བཅུ་པ་བར་སུ་ཇ་བོད་ཁྱིམ་དུ་སློབ་གཉེར་བྱས་རྗེས་འཛིན་རིམ་བཅུ་གཅིག་དང་བཅུ་གཉིས་སེ་ལ་ཁུའི་བོད་ཁྱིམ་དུ་སློབ་གཉེར་བྱེད་རྒྱུའི་གོ་སྐབས་བཟང་པོ་བྱུང་། སེ་ལ་ཁུའི་བོད་ཁྱིམ་དུ་སློབ་གཉེར་བྱེད་སྐབས་སློབ་སྦྱོང་གིས་གཙོས་གང་ཅིའི་ཐད་ཡར་རྒྱས་གོང་འཕེལ་དང་གསར་པ་མང་པོ་ཞིག་ཤེས་རྒྱུའི་གོ་སྐབས་བྱུང་སོང་། དེ་རིང་གོ་སྐབས་འདི་བརྒྱུད་སེ་ལ་ཁུའི་བོད་ཁྱིམ་གྱི་དགེ་ལས་སློབ་མ་ཡོངས་ལ་སྙིང་ཁོངས་རུས་པའི་སྟེང་ནས་ཐུགས་རྗེ་ཆེ་ཞུ་རྒྱུ་ཡིན།

དྲི་བ། ཁྱེད་ཀྱིས་འཛིན་རིམ་བཅུ་གཉིས་ཡིག་རྒྱུགས་སླད་གྲ་སྒྲིག་ཇི་ལྟར་བྱེད་སྐོར་སོགས་ངོ་སྤྲོད་གནང་རོགས།

ཀརྨ་ཕུན་ཚོགས་ཟླ་བ་ལགས། ཕྲན་རང་ཉིད་ལྟ་བུ་ཡིན་ན་དུས་རྒྱུན་འཛིན་གྲྭ་ནང་དགེ་རྒན་གྱི་སློབ་ཁྲིད་གནང་བའི་སྐབས་དོ་དབྱིངས་ཆེན་པོ་བྱེད་ཀྱི་ཡོད་པར་བརྟེན། ཉིན་མཚན་མེད་པར་སློབ་སྦྱོང་བྱ་རྒྱུར་དགའ་པོ་མེད། འོན་ཀྱང་སློབ་སྦྱོོང་བྱེད་པའི་སྐབས་དོ་སྣང་དང་སྤྲོ་བ་ཆེན་པོའི་སྒོ་ནས་ཉིན་ལྟར་ཆུ་ཚོད་ ༥ ནས་ ༦ བར་སློབ་སྦྱོང་བྱེད་ཀྱི་ཡོད། 

དྲི་བ། བཙན་བྱོལ་བོད་མིའི་སློབ་གྲྭ་ཁག་གི་སློབ་ཕྲུག་རྣམས་ལ་དམིགས་བསལ་གྱི་ལམ་སྟོན་ཡོད་དམ།

ཀརྨ་ཕུན་ཚོགས་ཟླ་བ་ལགས།  སློབ་སྦྱོང་སྦྱང་བའི་སྐབས་བརྒྱ་ཆ་མཐོ་པོ་ཐོབ་རྒྱུའི་ཆེད་མིན་པར་རང་ཉིད་ལ་གསར་པ་ཞིག་ཤེས་སྙམ་པ་དང་།  དུས་དང་རྣམ་པ་ཀུན་ཏུ་སློབ་སྦྱོང་ལ་སྤྲོ་བ་སྐྱེས་པའི་སྒོ་ནས་སྦྱང་ན་བརྒྱ་ཆ་མཐོ་བོ་ལོན་ཐུབ་ཀྱི་རེད།

བསྟན་འཛིན་གངས་མཚོ་ལགས།

དྲི་བ།  ཐོག་མར་རང་ཉིད་ངོ་སྤྲོད་གནང་རོགས།

བསྟན་འཛིན་གངས་མཚོ་ལགས།  ཕྲན་རང་སྦེལ་ཀོབ་སཾ་བྷོ་ཊ་གཏན་སློབ་ནས་འབྱུང་རིག་སྡེ་ཚན་ཐོག་སློབ་སྦྱོང་བྱས་པ་ཡིན། ལས་དོན་གང་འདྲ་ཞིག་ཡིན་ནའང་བསམ་བློ་བཟང་པོ་ཞིག་བཏང་བའི་སྒོ་ནས་ལས་ཀ་བྱེད་མཁན་ཞིག་ཡིན། གཞན་ལ་ཕན་མ་ཐོགས་ནའང་གནོད་སྐྱེལ་གྱི་མེད། དབྱེ་འབྱེད་མེད་པའི་ཐོག་ནས་གཞན་ལ་རོགས་པ་གང་ཐུབ་བྱེད་ཀྱི་ཡོད། 

བསྟན་འཛིན་ལུང་རིགས། གུས་མོ་སྦན་ད་ར་ནོར་རྒྱས་གླིང་བོད་མིའི་གཞིས་ཆགས་ནས་ཡིན། འཛིན་རིམ་དང་པོ་ནས་ལྔ་པ་བར་སཾ་བྷོ་ཊ་གོ་ཐན་གྷ་བོ་དང་། འཛིན་རིམ་ ༦ ནས་ ༡༠ བར་སུ་ཇ་བོད་ཁྱིམ། དེ་ནས་སྦེལ་ཀོབ་བོད་ཁྱིམ་དུ་ཕྱིན་པ་ཡིན། སྤྱིར་ང་རང་དཔེ་དབེ་གང་མང་ཀློག་རྒྱུར་དགའ་པོ་ཡོད་པ་མ་ཟད།  བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ལྗགས་རྩོམ་མཛད་པའི་དཔེ་དབེ་ཁག་ཀློག་རྒྱུ་ཧ་ཅང་དགའ་པོ་ཡོད། གཞན་ལ་གུས་ཞབས་བྱེད་རྒྱུ་དང་དམིགས་བསལ་རྒན་ལགས་རྣམ་པར་གུས་བརྩི་ཞུ་མཁན་གྱི་བུ་མོ་ཞིག་ཡིན།

བསྟན་འཛིན་ལུང་རིགས།

དྲི་བ། ཁྱེད་རྣམ་གཉིས་ཀྱིས་ཐེངས་འདིའི་རྒྱ་གར་རྒྱལ་ཡོངས་འབྲིང་རིམ་སློབ་གྲྭའི་ཡིག་རྒྱུགས་ཆེན་མོའི་ནང་གྲུབ་འབྲས་ཧ་ཅང་ཡག་པོ་སོན་པར་ཚོར་སྣང་ཇི་བྱུང་། 

བསྟན་འཛིན་གངས་མཚོ་ལགས། ང་ཙམ་མ་ཟད་ངའི་ཕ་མ་སྤྲུན་མཆེད་ཚང་མ་ཧ་ཅང་དགའ་པོ་བྱུང་འདུག དེ་རིང་ངས་གོ་སྐབས་འདི་བརྒྱུད་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དབུས་ངའི་སློབ་གྲྭ་ཁག་གི་དགེ་ལས་སློབ་མ་ཡོངས་ལ་ཐུགས་རྗེ་ཆེ་ཞུ་རྒྱུ་ཡིན། 

བསྟན་འཛིན་ལུང་རིགས་ལགས།  ངའི་དགེ་རྒན་དང་། ཕ་མ་སྤུན་མཆེད་ཚང་མས་ཐུགས་གཉེས་པོ་གནང་བར་ང་རང་ཧ་ཅང་དགའ་པོ་བྱུང་།  ཡིག་རྒྱུགས་གྲུབ་འབྲས་བཟང་པོ་ཐོབ་པ་འདི་ནི། གཙོ་བོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེ་བཀའ་དྲིན་དང་། དགེ་རྒན་དང་ཕ་མ་རྣམ་པས་ཉིན་ལྟར་སྐུ་ལས་ལ་བརྟེན་ནས་བྱུང་བ་ཡིན། 

དྲི་བ། སློབ་སྦྱོང་གི་གྲུབ་འབྲས་ཧ་ཅང་ཡག་པོ་བྱུང་ཡོད་སྟབས་སློབ་སྦྱོང་ལ་ཧུར་བརྩོན་ཇི་ལྟར་གནང་བ་ཡིན་ནམ།

བསྟན་འཛིན་གངས་མཚོ་ལགས། དམིགས་བསལ་གྱི་གསང་བ་གང་ཡང་མེད། དུས་རྒྱུན་དུ་འཛིན་གྲྭའི་ནང་དགེ་རྒན་གྱིས་སློབ་ཁྲིད་བྱེད་སྐབས་དོ་སྣང་ཆེན་པོས་སྦྱང་བ་ཙམ་མ་ཟད། ཁྱིམ་ཚང་དུ་བསྐྱར་སྦྱོང་བྱེད་ཀྱི་ཡོད། དགེ་རྒན་གྱི་སློབ་ཚན་བསླབ་པ་རྣམས་སླར་ཡང་བསྐྱར་སྦྱོང་བྱེད་དགོས་རྒྱུ་ཧ་ཅང་གལ་ཆེན་པོ་རེད། སློབ་སྦྱོང་བྱ་རྒྱུར་དོ་དབྱིངས་ཡོད་ཚེ་དཀའ་ངལ་གང་ཡང་འཕྲད་ཀྱི་མ་རེད་བསམ་གྱི་འདུག  མིའི་མི་ཚེ་ནང་ཤེས་ཡོན་སློབ་སྦྱོང་དགོས་རྒྱུ་ཧ་ཅང་གལ་ཆེན་པོ་བརྩིས་པའི་ཐོག་ནས་སྦྱོང་དགོས་ཀྱི་ཡོད།

བསྟན་འཛིན་ལུང་རིགས་ལགས། སློབ་ཕྲུག་ཁག་གཅིག་གིས་དུས་རྒྱུན་དུ་སློབ་སྦྱོང་ལ་དེ་ཙམ་དོ་སྣང་མེད་པར་ཡིག་རྒྱུགས་སླེབ་ལ་ཉེ་བའི་སྐབས་གཞི་ནས་སློབ་སྦྱོང་ལ་དོ་སྣང་བྱེད་ཀྱི་འདུག ཡིག་རྒྱུགས་ཁོ་ནའི་ཆེད་མིན་པར་དུས་རྒྱུན་དུ་སློབ་སྦྱོང་ལ་དོ་སྣང་ངེས་པར་དུ་བྱེད་དགོས། ལྷག་པར་སློབ་སྦྱོང་བྱེད་པའི་སྐབས་རང་གི་མ་ཤེས་པ་སོགས་དོགས་འདྲི་རིགས་ཡོད་ཚེ་དགེ་རྒན་རྣམ་པར་ཐད་ཀར་བཀའ་འདྲི་ཞུ་དགོས་རྒྱུ་ཧ་ཅང་གལ་ཆེན་པོ་རེད།