ཕྱི་ལོ་ ༢༠༡༩ ཟླ་ ༥ ཚེས་ ༤ རེས་གཟའ་སྤེན་པ།

༄༅། །ཇི་ནི་ཝར་རྟེན་གཞི་བྱས་པའི་འཛམ་གླིང་མཉམ་འབྲེལ་རྒྱལ་ཚོགས་ཀྱི་ལས་ཁུངས་སུ་མཉམ་འབྲེལ་རྒྱལ་ཚོགས་འཛུགས་སྐྲུན་ཡར་རྒྱས་ཚོགས་ཆུང་ནས་འཛུགས་སྐྲུན་ཡར་རྒྱས་གོང་འཕེལ་གྱི་ལས་དོན་བྱེད་ཕྱོགས་ཐད་བསྐྱར་ཞིབ་ཀྱི་བགྲོ་གླེང་ཚོགས་ཐུན་ཐེངས་ ༢༠ འཚོགས་བཞིན་ཡོད་འདུག   བགྲོ་གླེང་ལྷན་ཚོགས་སུ་ཚོགས་མི་རྒྱལ་ཁབ་ཁག་གི་སྐུ་ཚབ་དང་། མཁས་དབང་། ཉམས་ཞིབ་པ།  ཚན་རིག་པ། སྤྱི་དམངས་ཐོབ་ཐང་ཆོགས་པའི་ཚོགས་མི་བཅས་ལྷན་འཛོམས་ཀྱིས་ཕྱི་ལོ་ ༢༠༣༠ ལོའི་མཉམ་འབྲེལ་རྒྱལ་ཚོགས་ཀྱི་རྒྱུན་གནས་ཐུབ་པའི་ཡར་རྒྱས་ལས་གཞིའི་གྲོས་གཞི་ཐད་གོ་བསྡུར་ནན་པོ་གནང་ཡོད། 

སྐབས་དེར་སུད་སི་སྐུ་ཚབ་དོན་གཅོད་ཁང་གི་འབྲེལ་ཡོད་ལས་བྱེད་དཀོན་མཆོག་སྒྲོལ་མ་ལགས་ཀྱིས་འཇིག་ཉེན་ཡོད་པའི་མི་རིགས་སྲུང་སྐྱོབ་ལྷན་ཚོགས་  Society for Threatened Peoples ཀྱི་ཚབ་ཞུས་ཏེ་དེང་སྐབས་གོ་ལ་སྤྱིའི་གནམ་གཤིས་འགྱུར་ལྡོག་གི་གནད་དོན་ཐོག་གླེང་སློང་བྱེད་སྐབས་འཛམ་གླིང་གི་སྣེ་གསུམ་པར་གྲགས་པའི་བོད་མཐོ་སྒང་གི་སྐོར་མི་མང་པོ་ཞིག་གིས་མཁྱེན་རྟོགས་མེད་པ་ནི་ཧ་ཅང་ཡ་མཚན་དགོས་པཞིག་ཡིན་པ་དང་། ལྷན་ཚོགས་ཀྱི་ངོས་ནས་ཁོར་ཡུག་གི་གནད་དོན་ཐད་རྒྱལ་ཁབ་ཀྱི་ས་མཚམས་དངའགལ་ནས་ཤུགས་རྐྱེན་སྤྲོད་བཞིན་པའི་ས་ཁུལ་རྣམས་ལ་དམིགས་ཏེ་ཞིབ་འཇུག་བྱས་དགོས་ངེས་ཡིན། ཞེས་དང་།  བོད་མཐོ་སྒང་གི་ཁོར་ཡུག་ནི་གོ་ལ་སྤྱིའི་ཁོར་ཡུག་གི་གནས་སྟངས་ཐོག་གལ་གནད་ཆེ་ཚུལ་དང་། ལྷག་པར་བོད་ནི་འཛམ་གླིང་ནང་འཁྱགས་རོམ་དང་འཐུང་ཆུའི་ཆུ་མཛོད་ཆེ་ཤོས་ཡོད་ས་ཡིན་པ་ཙམ་མ་ཟད། ཨེ་ཤི་ཡའི་རྒྱུག་ཆུ་ཆེ་ཁག་གི་ཆུ་སྒོ་ཡང་བོད་མཐོ་སྒང་ཡིན་པ་དང་། འཛམ་གླིང་ལྷོ་བྱང་གི་སྣེ་གཉིས་ཕུད་པའི་འཁྱགས་རོམ་ཆེ་ཤོས་ཡོད་ས་དེ་བོད་ཡིན་སྟབས། གླིང་ཆེན་ཨེ་ཤེ་ཡའི་རྒྱལ་ཁབ་མང་པོ་ཞིག་བོད་མཐོ་སྒང་གི་ཆུ་ལ་བརྟེན་ནས་འཚོ་བ་སྐྱེལ་བཞིན་ཡོད་སྟབས་་བོད་ནི་འཛམ་གླིང་གི་སྣེ་གསུམ་པར་གྲགས་བཞིན་ཡོད། ཅེས་གསུང་། 

སྐབས་དེར་མཁས་པ་རྣམས་ཀྱིས་བོད་མཐོ་སྒང་གི་འཁྱགས་རོམ་ཞུར་ཚད་རྒྱལ་ཁབ་གཞན་ལས་མགྱོགས་པ་དང་། བདོ་མཐོ་སྒང་གི་ཚ་དྲོད་འཕར་ཚད་དེ་བཞིན་གོ་ལ་སྤྱི་ཡོངས་ཀྱི་ཚ་དྲོད་འཕར་ཚད་ལས་སྡབ་གསུམ་མང་བ་འཕར་བཞིན་ཡོད་སྐོར་སོགས་གསུང་། ཕྱོགས་མཚུངས་ཁེ་ན་ཌའི་ཚན་རིག་པས་ཁེ་ན་ཌའི་ནང་གནས་གཤིས་འགྱུར་ལྡོག་ལ་བརྟེན་ནས་བོད་མཐོ་སྒང་གི་གནམ་གཤིས་འགྱུར་བ་ཕྱིན་གྱི་ཡོད་སྐོར་སོགས་གསུང་།

སྐབས་དེར་ལྷན་ཚོགས་སུ་ཕེབས་པའི་ཉམས་ཞིབ་པ་དང་མཁས་དབང་རྣམས་ཀྱིས་གསུང་བཤད་གནང་སྐབས་གོ་ལ་སྤྱི་ཡོངས་ཀྱི་གནམ་གཤིས་འགྱུར་ལྡོག་དེ་བཞིན་ཁོར་ཡུག་གི་གནད་དོན་ཙམ་མིན་པར་གནད་དོན་གལ་ཆེན་པོ་ཞིག་ཆགས་ཡོད་སྐོར་སོགས་ཀྱི་གསུང་བཤད་གནང་འདུག་པ་བཅས། །