༢༠༡༡ ཟླ་ ༤ ཚེས་ ༡༦ རེས་གཟའ་སྤེན་པ།
༄༅། །ཕྱི་ལོ་ ༢༠༡༡ ཟླ་ ༤ ཚེས་ ༡༥ ཉིན་༸གོང་ས་༸སྐྱབས་མགོན་ཆེན་པོ་མཆོག་ཡུ་རོབ་རྒྱལ་ཁབ་སུ་ཝི་ཌན་ (Sweeden) གྱི་རྒྱལ་ས་སི་ཊོཀ་ཁོམ་ (Stockholm) དུ་༸ཞབས་སོར་འཁོད་དེ་རྒྱལ་ས་སི་ཊོཀ་ཁོམ་དང་ལན་ཌི་(Lund) བཅས་ས་གནས་ཁག་གཉིས་ནང་ཉིན་གྲངས་གསུམ་རིང་མཛད་འཕྲིན་རྒྱ་ཆེ་སྐྱོང་གནང་མཛད་རྒྱུ་རེད་འདུག དེ་ཡང་ཕྱི་ཚེས་ ༡༥ ཉིན་མགོན་པོ་གང་ཉིད་མཆོག་གིས་རྒྱལ་ས་སོ་ཊོཀ་ཁོམ་ཝ་ཊར་ཕ་རན་ཌི་གྲོས་ཚོགས་ཀྱི་ཚོགས་ཁང་ཆེན་མོའི་ནང་ (Stockholm Waterfront Congress Centre) མང་ཚོགས་གྲངས་ ༣༠༠༠ བརྒལ་བ་འདུ་འཛོམས་ཐོག་༸གོང་ས་ཏཱ་ལའི་བླ་མ་མཆོག་དང་མཇལ་འཕྲད་ (Meeting With Dalai Lama) ཅེས་པའི་བརྗོད་གཞི་དང་འབྲེལ་བའི་བགྲོ་གླེང་ཚོགས་འདུ་ཞིག་ལ་ཆིབས་སྒྱུར་བསྐྱངས་ཏེ་བཀའ་སློབ་དང་མང་ཚོགས་ཀྱི་དྲི་བ་རྣམས་ལ་བཀའ་ལན་ཡང་མཛད་ཡོད། བགྲོ་གླེང་གོ་སྒྲིག་གནང་མཁན་ (Swedish Organization for Individual Relief) ཞེས་སུ་ཝི་ཌན་ངལ་སེལ་ཚོགས་པ་ཞེས་པ་དེ་ཡིན་འདུག
༸གོང་ས་མཆོག་དང་སོག་པོའི་མང་ཚོགས།
སྐབས་དེར་མང་ཚོགས་ཀྱིས་༸གོང་ས་མཆོག་ལ་བྱམས་བརྩེ་དང་བདེ་སྐྱིད། ༸གོང་ས་མཆོག་གིས་ཆབ་སྲིད་ཀྱི་སྐུ་དབང་རྩིས་སྤྲོད་བཅས་ཀྱི་སྐོར་དྲི་བ་འབུལ་ལམ་ཞུས་པར་བཀའ་ལན་མཛད་ཡོད། དེ་རྗེས་གསར་འགོད་པ་ཁག་གཅིག་གིས་༸གོང་ས་༸སྐྱབས་མགོན་ཆེན་པོ་མཆོག་གི་ཆབ་སྲིད་ཀྱི་སྐུ་དབང་རྩིས་སྤྲོད་སྐོར་དྲི་བ་ཕུལ་བར་མགོན་པོ་གང་ཉིད་མཆོག་གིས་བཀའ་ལན་སྩལ་དོན། ངོས་ཀྱིས་དྭངས་བླང་ཐོག་ལོ་ངོ་ ༤༠༠ ཙམ་སོང་བའི་ཏཱ་ལའི་བླ་མས་ཆབ་སྲིད་ཀྱི་འགོ་ཁྲིད་བྱ་རྒྱུའི་ལམ་སྲོལ་དེ་དགའ་སྤོབས་ཟུང་འབྲེལ་ཐོག་ནས་མཇུག་བསྒྲིལ་བ་ཡིན་ཞེས་བཀའ་ལན་སྩལ།
གཞན་ཡང་རྒྱ་ནག་ནང་བཟང་ཕྱོགས་ཀྱི་འགྱུར་བ་འགྲོ་བཞིན་པར་བརྟེན་བོད་ཀྱི་གནད་དོན་ལའང་འགྱུར་བ་འགྲོ་རྒྱུ་ཡིན་པའི་སྐོར་བཀའ་སློབ་སྩལ་དོན། རྒྱ་ནག་ནང་གནས་ཚུལ་འགྱུར་བ་ཆེན་པོ་འགྲོ་བཞིན་ཡོད། རྒྱ་ནག་མང་ཚོགས་ཁྲོད་བོད་ཀྱི་གནས་ཚུལ་ངོ་མ་ཇི་ཡིན་ཤེས་རྟོགས་ཡོད་མཁན་ཇེ་མང་འགྲོ་བཞིན་ཡོད་པ་མ་ཟད། རྒྱ་ནག་གཞུང་གིས་བོད་ཐོག་འཛིན་པའི་སྲིད་བྱུས་དེར་སྐྱོན་བརྗོད་ཀྱང་བྱེད་བཞིན་ཡོད་ཅེས་བཀའ་སྩལ།
དེ་ཉིན་སྔ་དྲོར་༸གོང་ས་༸སྐྱབས་མགོན་ཆེན་པོ་མཆོག་ཁུལ་དེར་ནོ་བེལ་འགྲེམས་སྟོན་ཁང་ (Nobel Museum) ཞེས་པ་དེར་ཆིབས་སྒྱུར་བསྐྱངས་ཏེ་༸ཞབས་སྟེགས་གི་མཐིལ་དུ་མཚན་རྟགས་བཀོད་གནང་མཛད།
དེ་ནི་འགྲེམས་སྟོན་ནང་ཕེབས་མཁན་དེ་སྔ་ནོ་བེལ་གཟེངས་རྟགས་བཞེས་མྱོང་མཁན་ཚང་མས་གཅིག་མཚུངས་མཚན་རྟགས་བཀོད་ཡོད། འགྲེམས་སྟོན་ནང་ཕེབས་མཁན་མི་སྣ་གྲགས་ཅན་ཚོས་མཚན་རྟགས་བཀོད་པའི་ཞབས་སྟེགས་དེ་དག་འགྲེམས་སྟོན་གྱི་རྩ་ཆེའི་དངོས་རྫས་ཤིག་ཏུ་ངོས་འཛིན་བྱེད་བཞིན་ཡོད།
དེ་བཞིན་མགོན་པོ་གང་ཉིད་མཆོག་གིས་སྐབས་དེར་འགྲེམས་སྟོན་ཁང་དེར་ཕྱག་སྨུག་གཅིག་དང་སྤྱན་ཤེལ། བྱང་ཆུབ་སེམས་དཔའི་སྤྱོད་པ་ལ་འཇུག་པའི་ཕྱག་དཔེ་བཅས་གསོལ་རས་སྩལ། གཞན་ཡང་ཉིན་དེར་༸གོང་ས་༸སྐྱབས་མགོན་ཆེན་པོ་མཆོག་གིས་འཛམ་གླིང་ནང་ཞི་བདེ་འཚོལ་ཐབས། ཞེས་པའི་བརྗོད་གཞིའི་ཐོག་ (Sodertorn University) གཙུག་ལག་སློབ་གྲྭའི་སློབ་མ་རྣམས་ལ་བཀའ་སློབ་སྩལ་ཡོད་པ་བཅས།།
