ཕྱི་ལོ་ ༢༠༡༩ ཟླ་ ༤ ཚེས་ ༢༢ རེས་གཟའ་ཟླ་བ།
པར་པ་པ་སངས་དོན་གྲུབ་ལགས།
༄༅། །ཕྱི་ལོ་ ༢༠༡༩ ཟླ་ ༤ ཚེས་ ༢༢ རེས་གཟའ་ཟླ་བའི་ཉིན་དཔལ་འབྱོར་ལས་ཁུངས་ཀྱི་ཚོགས་ཁང་དུ་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་གཞིས་ཆགས་གཅིག་བསྡུས་ཡར་རྒྱས་འཆར་གཞིའི་ (ISDP) ལས་གཞི་འོག་སྡེ་ར་ལྡུན་ཁུལ་དུ་རྟེན་གཞི་བྱས་པའི་གླིང་ཚང་གཞིས་ཆགས་གཞོན་སྐྱེས་རྣམས་ཀྱིས་བཟོ་བསྐྲུན་ཞུས་པའི་བོད་ཀྱི་བརྡུང་ཚགས་ལུགས་གསུམ་བྱས་པའི་མཐུན་མིན་སྒྱུ་རྩལ་དངོས་ཆས་ཁག་གཅིག་འགྲེམས་སྟོན་གནང་ཡོད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༡༠ ཐོག་སྐུ་མགྲོན་གཙོ་བོ་བོད་མིའི་སྒྲིག་འཛུགས་དཔལ་འབྱོར་ལས་ཁུངས་ཀྱི་སྤྱི་ཁྱབ་འཆར་འགོད་པ་འབུམ་རམས་པ་དཀོན་མཆོག་བརྩོན་འགྲུས་ལགས་དང་། ཁམས་གླིང་ཚང་གཞིས་ཆགས་སུ་དྲིལ་བུ་ཏིང་ཤགས་སོགས་གནའ་བོའི་བོད་ཀྱི་ལག་ཤེས་བཟོ་རིག་སྦྱོང་བརྡར་སྤྲོད་མཁན་ཚེ་རིང་རྣམ་རྒྱལ་ལགས། སྦྱོང་བརྡར་དུ་མཉམ་ཞུགས་གནང་མཁན་ཚེ་རིང་བསྟན་འབྱོར་ལགས་དང་བསོད་ནམས་ཕུན་ཚོགས་ལགས། ནང་སྲིད་ལས་ཁུངས་ཀྱི་འབྲེལ་ཡོད་ལས་བྱེད། དེ་བཞིན་ཕྱི་ནང་གི་གསར་འགོད་པ་བཅས་ཚང་འཛོམས་ཀྱི་ཐོག་མར་སྤྱི་ཁྱབ་འཆར་འགོད་པས་འགྲེམས་སྟོན་དབུ་འབྱེད་གནང་ཡོད།
པར་པ་པ་སངས་དོན་གྲུབ་ལགས།
དེ་ནས་ཚེ་རིང་རྣམ་རྒྱལ་ལགས་ཀྱིས་མཆོད་རྫས་རེ་རེ་བཞིན་ངོ་སྤྲོད་གནང་བསྟུན་དཀོན་མཆོག་བརྩོན་འགྲུས་ལགས་ཀྱི་ལས་གཞིའི་དམིགས་ཡུལ་གཙོ་བོ་ནི། བོད་ཀྱི་ཐུན་མིན་རིག་གཞུང་རྣམས་མི་ཉམས་རྒྱུན་འཛིན་བྱ་རྒྱུ་དང་། བོད་མི་གཞོན་སྐྱེས་རྣམས་ལ་དེའི་ཐོག་སྦྱོང་བརྡར་སྤྲོད་རྒྱུ་ཡིན་སྐོར་སྤྱི་དང་། ལྷག་པར་དུ་ལས་གཞི་དེར་བོད་མིའི་སྒྲིག་འཛུགས་བཀའ་ཤག་གིས་རྒྱབ་སྐྱོར་ཤུགས་ཆེ་གནང་བཞིན་ཡོད་སྐོར་དང་། ལས་གཞི་དེ་ལྟ་བུ་སྤེལ་དགོས་པ་ཧ་ཅང་གལ་ཆེ་ཡིན་སྐོར་སོགས་ཀྱི་གསུང་བཤད་གནང་བསྟུན་གསར་འགོད་པའི་དྲི་བར་ལན་འདེབས་གནང་སྟེ་མཛད་སྒོ་གྲོལ་ཡོད། གོང་གི་འགྲེམས་སྟོན་དེ་བཞིན་ཉིན་གཉིས་རིང་གོ་སྒྲིག་གནང་རྒྱུ་དང་། མཐུན་འགྱུར་རོགས་རམ་གནང་མཁན་ཨ་རི་ཐེབས་རྩ་ USAID ཡིན་འདུག
པར་པ་པ་སངས་དོན་གྲུབ་ལགས།
སྤྱིར་གླིང་ཚང་བོད་མིའི་གཞིས་ཆགས་ཀྱི་བོད་ལུགས་ལི་མའི་མཆོད་རྫས་བཟོ་བསྐྲུན་གོང་སྤེལ་ལས་གཞིའི་དམིགས་ཡུལ་གཙོ་བོ་ནི། བོད་མིའི་སྲོལ་རྒྱུན་གྱི་ལག་ཤེས་གཅེས་སྲུང་དང་གོང་འཕེལ་གཏོང་རྒྱུ།
ཁམས་གླིང་ཚང་གཞིས་ཆགས་ནས་བུད་མེད་གཉིས་ཐེ་བའི་བོད་རིགས་གཞོན་སྐྱེས་བཅུ་གསུམ་ལ་བོད་མིའི་སྲོལ་རྒྱུན་གྱི་སྒྱུ་རྩལ་དངོས་ཆས་ཀྱི་བཟོ་དབྱིབས་འགོད་སྟངས་དང་། ལུགས་རྒྱག་སྟངས། འོད་མདངས་འདོན་སྟངས་བཅས་ཀྱི་སྲོལ་རྒྱུན་གྱི་ལག་ཤེས་ཀྱི་བརྒྱུད་རིམ་ཐོག་སྦྱོང་བརྡར་གཏིང་ཟབ་ཕུལ་ཡོད། བུད་མེད་གཉིས་ཐེ་བའི་བོད་རིགས་གཞོན་སྐྱེས་བཅུ་གསུམ་ལ་ཚད་ལྡན་གྱི་དགེ་རྒན་ཆེ་མོ་བ་ལྔ་ཡི་དྲུང་ནས་ཐུན་མོང་མ་ཡིན་པའི་བོད་མིའི་སྲོལ་རྒྱུན་གྱི་ལག་ཤེས་ཐོག་ཆེད་ལས་རང་བཞིན་གྱི་སྦྱོང་བརྡར་ཐོབ་ཡོད། ད་ཆ་སྦྱོང་བརྡར་བ་ཚོས་བོད་མིའི་སྲོལ་རྒྱུན་གྱི་སྒྱུ་རྩལ་དངོས་ཆས་མི་འདྲ་བ་ཁག་བཞི་ཐོན་སྤེལ་བྱེད་ཐུབ་ཀྱི་ཡོད། དེ་བཞིན་སྦྱོང་བརྡར་བ་གསུམ་གྱིས་སྒྱུ་རྩལ་དངོས་ཆས་ལ་ལག་ཤེས་ཀྱི་ངོ་རྟགས་ཀྱང་ཐོབ་ཡོད། ཁམས་གླིང་ཚང་གཞིས་ཆགས་ཀྱི་གཞོན་སྐྱེས་རྣམས་ནས་ལོ་རྒྱུས་ཡུན་རིང་ལྡན་པའི་ལག་ཤེས་ཀྱི་སྒྱུ་རྩལ་རྒྱུན་འཛིན་ཐུབ་པ་རྣམས་གསར་གཏོད་ཀྱི་རང་བཞིན་ལྡན་པའི་དེང་རབས་ཀྱི་འཕྲུལ་རིག་སྒྱུ་རྩལ་དང་བདེ་བླག་ངང་མཉམ་སྡེབ་ཐུབ་པ་བྱུང་ཡོད་པ་བཅས། །
པར་པ་པ་སངས་དོན་གྲུབ་ལགས།
