ཕྱི་ལོ་ ༢༠༡༩ ཟླ་ ༤ ཚེས་ ༡༨ རེས་གཟའ་ཕུར་བུ།
༄༅། །འདི་གར་ཀ་སྦུག་ས་གནས་འགོ་འཛིན་ལས་ཁུངས་ནས་བཏང་གནས་ནང་འཁོད་དོན། ཟླ་འདིའི་ཕྱི་ཚེས་ ༡༧ ལྷག་དཀར་དགེ་བའི་ཉིན་དང་བསྟུན། ཀ་སྦུག་བོད་མིའི་ས་གནས་འགོ་འཛིན་ལས་ཁུངས་ཀྱིས་འགན་འཁུར་རྐང་བཞེས་ཐོག་སྔ་ལོ་ཕྱི་ལོ་ ༢༠༡༨ ཟླ་ ༩ ཚེས་ ༣ ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཀ་རྡོར་སྒང་གསུམ་དང་། ར་ཝང་ལ། བསུ་ན་མདའ་བཅས་ཀྱི་བོད་རིགས་མི་མང་ཡོངས་ནས་བརྟན་བཞུགས་བསྟར་འབུལ་ཞུས་སྐབས་བོད་མི་རིགས་ཀྱི་ངོ་བོ་བརྟན་སྲུང་སླད་བོད་ཀྱི་སྐད་ཡིག་ཉམས་པ་སླར་གསོ་དང་མི་ཉམས་གོང་འཕེལ་གཏོང་རྒྱུར་རང་ནུས་འབད་བརྩོན་བྱ་རྒྱུའི་དམ་བཅའ་ཕུལ་བ་ལྟར་དངོས་སུ་ལག་བསྟར་ཐུབ་ཆེད་ཀ་སྦུག་བོད་ཀྱི་སྐད་ཡིག་སྲུང་སྐྱོབ་ཚོགས་ཆུང་གསར་འཛུགས་ཐུབ་པ་བྱུང་ཡོད།
ཚོགས་ཆུང་གི་ཚོགས་མིའི་ཁོངས་སུ་ཀ་སྦུག་གཏན་སློབ་ཀྱི་བོད་ཡིག་དགེ་རྒན་དང་། ཆོལ་ཁ་གསུམ་གྱི་འཐུས་མི། གངས་ལྗོངས་ཟློས་གར་གྱི་སྐུ་ཚབ། དགོན་པའི་སྐུ་ཚབ་བཅས་ལས་གྲུབ་པའི་ཚོགས་མི་གྲངས་བདུན་ཡོད།
སྤྱིར་ཀ་སྦུག་ས་གནས་སུ་ཡོད་པའི་བོད་རིགས་རྣམས་ཁ་འཐོར་དུ་གནས་ཀྱི་ཡོད་པ་དང་ཕྲུ་གུ་མང་དག་ཅིག་རྒྱ་གར་ཡུལ་མིའི་སློབ་གྲྭར་སློབ་འཇུག་བྱས་ཡོད་པའི་གནས་སྟངས་སོགས་རྐྱེན་པས་ད་བར་གངས་ལྗོངས་ཟློས་གར་ངོས་ནས་བོད་ཀྱི་སྐད་ཡིག་དང་རིག་གཞུང་སྲུང་སྐྱོབ་དང་འབྲེལ་ལས་འགུལ་སྣ་མང་ཞིག་སྤེལ་དང་སྤེལ་མུས་ཡིན་པ་དེར་རོགས་འདེགས་བྱ་རྒྱུ་སོགས་ཀྱི་དམིགས་ཡུལ་འཛིན་པའི་ཐོག་ཚོགས་ཆུང་དེ་ཉིད་འཛུགས་པ་ཞིག་ཆགས་ཀྱི་ཡོད།
ཚོགས་ཆུང་གི་མ་འོངས་བྱེད་འཆར།
༡། ཕྲུ་གུའི་ཕ་མ་དང་མཉམ་དུ་ཚོགས་འདུ་འཚོགས་རྒྱུ།
༢། བོད་རིགས་ཕྲུ་གུ་ཚོར་གཟའ་མཇུག་འཛིན་གྲྭ་སློབ་ཁྲིད་བྱ་རྒྱུ།
༣། ཚོགས་ཆུང་གི་ངོ་དེབ་གསར་བཟོ་བྱ་རྒྱུ་དང་དེའི་བརྒྱུད་བོད་ཀྱི་སྐད་ཡིག་གལ་ཆེ་ཡིན་པའི་བཀའ་སློབ་དང་བརྙན་ཐུང་། རྩོམ་ཡིག དེ་བཞིན་སྐད་ཡིག་སྲུང་སྐྱོབ་དང་འབྲེལ་བའི་ལས་འཆར་སོགས་ཀྱི་གསལ་བསྒྲགས་སྤེལ་རྒྱུ།
༤། བོད་ཀྱི་སྐད་ཡིག་དང་ཡིག་གཟུགས་ཉིན་མོ་སྲུང་བརྩི་ཞུ་རྒྱུ།
༥། བོད་ཀྱི་དུས་ཆེན་དང་དུས་དྲན་ཁག་ངོ་སྤྲོད་གནང་རྒྱུ། བཅས་ཡིན་འདུག་པ་བཅས། །
