ཕྱི་ལོ་ ༢༠༡༩ ཟླ་ ༣ ཚེས་ ༢༩ རེས་གཟའ་པ་སངས། 

༄༅། །༸རྒྱལ་མཆོག་སྐུ་ཕྲེང་བཅུ་གསུམ་པ་ཆེན་པོ་མཆོག་གིས་བོད་ཀྱི་རྒྱལ་ས་ལྷ་སར་སྨན་རྩིས་ཁང་ཕྱག་བཏབ་ནས་ལོ་ངོ་ ༡༠༣ འཁོར་བ་དང་། བྱེས་སུ་༸རྒྱལ་མཆོག་སྐུ་ཕྲེང་བཅུ་བཞི་པ་ཆེན་པོ་མཆོག་གིས་བཞུགས་སྒར་རྡ་རམ་ས་ལར་སྨན་རྩིས་ཁང་བསྐྱར་འཛུགས་བསྐྱངས་ནས་མི་ལོ་ ༥༨ འཁོར་བའི་དུས་དྲན་མཛད་སྒོ་ཞིག་ཕྱི་ལོ་ ༢༠༡༩ ཟླ་ ༣ ཚེས་ ༢༩ རེས་གཟའ་པ་སངས་ཉིན་གྱི་སྔ་དྲོ་ཆུ་ཚོད་ ༡༠།༤༥ ཐོག་བཞུགས་སྒར་རྡ་ས་བོད་ཀྱི་སྨན་རྩིས་ཁང་ཚོགས་ཁང་དུ་དབུས་སྨན་རྩིས་ཁང་དབུས་བརྙེས་པའི་དུས་དྲན་སྲུང་བརྩི་གཟབ་རྒྱས་ཞུས་སོང་།

དེ་ཡང་མཛད་སྒོའི་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་འཕྲོད་བསྟེན་བཀའ་བློན་ཆོས་སྐྱོང་དབང་ཕྱུག་མཆོག་དང་། དམིགས་བསལ་སྐུ་མགྲོན་ཀང་ར་རྫོང་གི་སྨན་པ་གཙོ་བོ་སྐུ་ཞབས་ Dr. Gurdarshan Gupta མཆོག   ཁྲིམས་ཞིབ་པ་གཞན་ངག་དབང་རབ་རྒྱལ་མཆོག་དང་ཀརྨ་དགྲ་འདུལ་མཆོག དབུས་སྨན་རྩིས་ཁང་གི་འགན་འཛིན་བཀྲ་ཤིས་ཚེ་རིང་ལགས། སྤྱི་ཁྱབ་རྩིས་ཞིབ་འགན་འཛིན་ཨརྱ་པདྨ་དགྲ་འདུལ་ལགས། བདེ་ལེགས་སྨན་ཁང་གི་འགན་འཛིན་སྤྱི་འཐུས་ཟླ་བ་ཕུན་སྐྱིད་ལགས།འདེམས་ལྷན་དང་འོས་བསྡུ་འགན་འཛིན་ཤོ་ཟུར་བསོད་ནམས་ཆོས་འཕེལ་ལགས། འཕྲོད་བསྟེན་དྲུང་ཆེ་ཆུ་སྐྱ་སྦྲ་གཉིས་ཚེ་རྒྱལ་ལགས།  བོད་མིའི་སྒྲིག་འཛུགས་ཀྱི་མཛད་གཙོ་ལས་ཟུར་རྣམ་པ། རྒྱ་གར་སྐུ་མགྲོན་རྣམ་པ། ༸སྐུའི་བླ་སྨན་པ། དབུས་སྨན་རྩིས་ཁང་དགེ་ལས་སློབ་ཕྲུག་རྣམ་པ། གསར་འགོད་པ་སོགས་ཁྱོན་མི་གྲངས་ ༧༠༠ ལྷག་ཙམ་ཚང་འཛོམས་ཀྱིས་ཐོག་མར་སྐུ་མགྲོན་གཙོ་བོ་འཕྲོད་བསྟེན་བཀའ་བློན་མཆོག་དང་དམིགས་བསལ་སྐུ་མགྲོན་སྐུ་ཞབས་ Gurdarshan Gupta མཆོག་རྣམ་གཉིས་ནས་སྣང་གསལ་སྒྲོན་མེ་ཞལ་ཕྱེ་གནང་། 

དེ་ནས་སྨན་རྩིས་ཁང་གི་དགེ་ལས་སློབ་ཕྲུག་ཡོངས་ནས་གཡུ་ཐོག་གསོལ་འདེབས་རྟ་དབྱངས་དང་བཅས་གསུང་འདོན་གྲུབ་མཚམས་རྟེན་འབྲེལ་གྱི་གསོལ་ཇ་འབྲས་སིལ་འདེགས་འབུལ་ཞུས་གྲུབ་མཚམས་སྨན་རྩིས་ཁང་གི་མཐོ་སློབ་སློབ་མ་རྣམས་ནས་གཞས་སྣ་ཁག་གཉིས་གཟིགས་འབུལ་ཞུས་གྲུབ་བསྟུན་སྨན་རྩིས་ཁང་གི་འགན་འཛིན་གྱིས་བོད་ཨིན་གཉིས་ཀྱི་ཐོག་སྨན་རྩིས་ཁང་གི་ལས་བསྡོམས་སྙན་སྒྲོན་གནང་། 

དེ་རྗེས་དམིགས་བསལ་སྐུ་མགྲོན་མཆོག་གིས་སྨན་རྩིས་ཁང་གི་སྨན་སློབ་སྐབས་ ༡༨ དང་། རྩིས་སློབ་སྐབས་ ༩ སློན་ཐོན་པ་དང་། ཕྱི་ལོ་ ༢༠༡༨ ལོའི་སྨན་རྩིས་སློབ་མ་ཡིག་རྒྱུགས་རྩེ་སོན་རྣམས་དང་། མཐོ་སློབ་ཀྱི་བུ་དང་བུ་མོའི་སྤྱི་ཁྱབ་རྒན་བདག དེ་བཞིན་སྐབས་ ༡༣ སྨན་པ་རྣམས་ལ་སྨན་རམས་པའི་ལག་འཁྱེར་གནང་བསྟུན་གསུང་བཤད་གནང་དོན། ཐོག་མར་འདིར་ཕེབས་པའི་བོད་མིའི་སྒྲིག་འཛུགས་ཀྱི་འཕྲོད་བསྟེན་བཀའ་བློན་མཆོག་དང་། དབུས་བོད་ཀྱི་སྨན་རྩིས་ཁང་གི་འགན་འཛིན་ཚེ་རིང་བཀྲ་ཤིས་མཆོག དེ་བཞིན་དགེ་ལས་སློབ་ཕྲུག་ཡོངས་ལ་དེ་རིང་འདིར་བོད་ཀྱི་སྨན་རྩིས་ཁང་དེ་བཞིན་དབུ་བརྙེས་ཏེ་ལོ་ངོ་ ༥༨ འཁོར་བར་དུས་ཆེན་ཐོག་བཅར་རྒྱུ་བྱུང་བར་དགའ་ཚོར་ཆེན་པོ་བྱུང་།

ཕྱོགས་མཚུངས་མཐོ་སློབ་མཐར་སོན་པའི་སློབ་མ་རྣམས་ལ་འཚམས་འདྲི་གྲངས་མེད་ཞུ་རྒྱུ་དང་སྦྲགས། ད་ནས་བཟུང་སློབ་ཕྲུག་ཁྱེད་རྣམས་ལ་འགན་འཁུར་འཕར་མ་ཞིག་ཡོད། སྤྱི་ཚོགས་ཁག་ནང་ཞབས་འདེགས་ཞུ་རྒྱུ་ནི་ང་ཚོའི་ལས་འགན་ངོ་མ་ཞིག་ཆགས་བཞིན་ཡོད་སྟབས། ངས་དེ་རིང་གོ་སྐབས་བཟུང་སྟེ་སྤྱི་ཚོགས་ནང་ཞབས་འདེགས་ཞུ་རྒྱུར་གལ་ཆེན་པོ་བརྩིས་པའི་ཐོག་ནས་གཞན་ཕན་པར་བྱེད་དགོས་པ་འབོད་སྐུལ་ཞུ་བཞིན་ཡོད། ཅེས་གསུང་བཤད་གནང་གྲུབ་མཚམས་སྨན་རྩིས་ཁང་གི་འགན་འཛིན་ནས་དམིགས་བསལ་སྐུ་མགྲོན་མཆོག་ལ་དྲན་རྟེན་ཕྱག་རྟགས་ཤིག་འབུལ་ཡོད། 

དེ་རྗེས་འཕྲོད་བསྟེན་བཀའ་བློན་ཆོས་སྐྱོང་དབང་ཕྱུག་མཆོག་གིས་སྨན་རྩིས་ཁང་གིས་པར་སྐྲུན་གནང་བའི་དཔེ་དེབ་ཁག་གཅིག་དབུ་འབྱེད་དང་སྦྲགས། སྨན་རྩིས་ཁང་གི་ལས་བྱེད་ཞབས་ལོ་ ༣༠ དང་ ༢༠ ལོན་པ་རྣམས་ལ་གཟེངས་བསྟོད་བྱ་དགའ་གནང་བསྟུན་འཕྲོད་བསྟེན་བཀའ་བློན་མཆོག་གིས་ཐོག་མར་འཚམས་འདྲིའི་བཀྲ་ཤིས་བདེ་ལེགས་དང་སྦྲགས་གསུང་དོན། དེ་རིང་བོད་ཀྱི་སྨན་རྩིས་ཁང་དབུ་བརྙེས་ཏེ་མི་ལོ་ ༥༨ འཁོར་བའི་དུས་ཆེན་ཐོག་ལག་འཁྱེར་སོན་པའི་སློབ་མ་རྣམས་ལ་སླར་ཡང་འཚམས་འདྲི་ཞུ་རྒྱུ་ཡིན། 

ད་ཆ་རྒྱ་གར་གྱིས་གཙོས་འཛམ་གླིང་ཁྱོན་ཡོངས་ལ་བོད་ཀྱི་ཐུན་མིན་རིག་གཞུང་གཅིག་ཇི་ལྟར་ཁྱབ་སྤེལ་ཕྱིན་ཐུབ་པ་ནི་དེ་རིང་འདིར་ཚོགས་ཁང་ནང་བཞུགས་མཁན་རྣམས་དང་། དེའི་ཐོག་ཐད་ཀར་འབྲེལ་བ་ཡོད་མཁན་གྱི་ཕྱག་ལས་གནང་མཁན་ཡོངས་ལ་མངགས་བརྗོད་དང་རྗེས་སུ་ཡི་རངས་ཞུ་དགོས་རྒྱུའི་གནས་སྟངས་ཤིག་ཆགས་ཡོད། 

གོང་དུ་སྨན་རྩིས་ཁང་གི་འགན་འཛིན་མཆོག་གིས་འདས་པ་ལོ་གཅིག་གི་ལས་བསྡོམས་ཀྱི་ཚུལ་དུ་སྙིང་བསྡུས་ཤིག་གསུང་བཤད་གནང་བ་ལྟར་སྤྱི་ཚོགས་ནང་ཞབས་འདེགས་རྒྱ་ཆེ་བ་ཞིག་ཞུ་བཞིན་ཡོད་པ་དེ་བརྗོད་མི་དགོས་པ་ཞིག་དང་། བསྔགས་བརྗོད་དང་སྦྲགས་དགའ་སྤོབས་སྐྱེ་དགོས་རྒྱུའི་གནས་སྟངས་ཤིག་ཆགས་ཀྱི་ཡོད། ལྷག་པར་འབྱུང་འགྱུར་ལོའི་ནང་རིམ་བཞིན་ལས་གཞི་རྣམས་རྒྱ་ཆེར་འགྲོ་རྒྱུ་དང་། དེ་བཞིན་རྒྱ་གར་ལྷོ་ཕྱོགས་སྦེང་ལོར་དུ་བོད་ཀྱི་སྨན་རྩིས་མཐོ་སློབ་ཁང་སྤོ་རྒྱུའི་ལས་གཞི་འགྲོ་བཞིན་ཡོད། གཞན་ཡང་སྨན་རྩིས་ཁང་ནང་སྨན་ཁང་གསར་པ་མང་པོ་ཞིག་ཟླ་སྒྲིལ་གཏང་རྒྱུའི་ཐད་གོང་དུ་འགན་འཛིན་མཆོག་གིས་ལས་བསྡོམས་ནང་གསུང་པ་ལྟར་རེད། དེར་བརྟེན་ཕྱོགས་གང་སར་ནས་བལྟས་ཡོང་དུས་སྨན་རྩིས་ཁང་དང་བོད་ཀྱི་གསོ་བ་རིག་པའི་རིག་གཞུང་ཁྱབ་སྤེལ་དང་དར་སྤེལ་ཆེན་པོ་ཞིག་འགྲོ་གི་ཡོད་པའི་གནས་བབ་ཆགས་ཡོད།

གཙོ་བོར་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེ་བཀའ་དྲིན་ལ་བརྟེན་ནས་བྱུང་བ་ཞིག་ཡིན་པ་དང་། གཞན་ཡང་དེའི་ཐོག་ལ་ཐད་ཀར་འབྲེལ་བ་ཡོད་མཁན་ཡོངས་ཀྱི་འགན་འཁུར་ཧུར་ཐག་གནང་བའི་གྲུབ་འབྲས་ཤིག་ཡིན། རྒྱ་གར་གྱིས་གཙོས་རྒྱལ་སྤྱིའི་ནང་སྨན་རྩིས་ཁང་གི་ལས་དོན་གནང་བཞིན་ཡོད་སྟབས། རང་སོ་སོའི་ལུང་པའི་ཁྲིམས་དང་མཐུན་པའི་ལས་དོན་གནང་དགོས་རྒྱུ་ཧ་ཅང་གལ་ཆེན་པོ་རེད། ཅེས་དང་།

ཉེ་ཆར་གྲོས་ཚོགས་ནང་བོད་ཀྱི་སྨན་རྩིས་ཁང་གི་ཐོག་ལ་གླེང་སློང་བྱུང་ཡོད་སྐོར་དང་། གཞན་ཡང་ཕྱི་ལུགས་ཀྱི་སྨན་བཅོས་བྱེད་སྟངས་ཐོག་ལ་དོ་སྣང་བྱེད་དགོས་རྒྱུ་ཧ་ལས་པ་གལ་ཆེན་པོ་རེད། དབུས་བོད་ཀྱི་སྨན་རྩིས་ཁང་གིས་ནད་རིགས་སྔོན་འགོག་ཐད་ལས་འཆར་སྤེལ་བཞིན་ཡོད་པ་ལྟར། མ་འོངས་པར་དེ་དེ་བཞིན་སྤེལ་དགོས་རྒྱུ་གལ་ཆེན་པོ་རེད། སྤྱིར་ནད་དང་ན་ཚ་གསར་པ་ལ་སོགས་ལ་སྨན་རྩིས་ཁང་གི་ངོས་ནས་ཐུགས་སྣང་དང་དོ་སྣང་གནང་དགོས་རྒྱུ་གལ་ཆེན་པོ་ཡིན་པ་མ་ཟད། ལྷག་པར་སེམས་ཁམས་ཀྱི་འཕྲོད་བསྟེན་ཐོག་ལ་དམིགས་བསལ་དོ་སྣང་གནང་དགོས་རྒྱུ་ཧ་ཅང་གལ་ཆེན་པོ་ཡིན་སྐོར་སོགས་ཀྱི་གསུང་བཤད་གནང་། 

དེ་རྗེས་སྨན་རྩིས་ཁང་གི་འགན་འཛིན་གྱིས་འཕྲོད་བསྟེན་བཀའ་བློན་མཆོག་ལ་དྲན་རྟེན་ཕྱག་རྟགས་ཤིག་འབུལ་གྲུབ་མཚམས་སྐར་རྩིས་པ་གཙོ་བོ་རྩིས་རམས་པ་ཚེ་རིང་ཆོས་འཛོམས་ལགས་ཀྱི་ཐུགས་རྗེ་ཆེའི་གསུང་བཤད་གནང་། 

མཐར་སྨན་རྩིས་ཁང་གི་དགེ་ལས་སློབ་ཕྲུག་ཡོངས་ནས་སྨན་རྩིས་བསྟན་རྒྱས་སྨོན་ལམ་རྟ་དབྱངས་དང་བཅས་གསུང་འདོན་གྲུབ་བསྟུན་མཛད་སྒོ་རྒྱལ་ཁ་ངང་ནས་གྲོལ་ཡོད་པ་བཅས། །