༢༠༡༡ ཟླ་ ༤ ཚེས་ ༡༢ རེས་གཟའ་མིག་དམར།
༄༅། །ཕྱི་ལོ་ ༢༠༡༡ ཟླ་ ༤ ཚེས་ ༡༠ ཉིན་སུད་སིར་རྟེན་གཞི་བྱས་པའི་བོད་རིགས་མི་མང་ཚོགས་པས་གོ་སྒྲིག་ཐོག་བོད་མདོ་སྨད་རྔ་པ་ནས་ཡིན་པའི་རྒྱལ་གཅེས་པ་དགེ་འདུན་ཕུན་ཚོགས་ལགས་ཀྱིས་བོད་བསྟན་པ་ཆབ་སྲིད་ཀྱི་དོན་དུ་རང་སྲོག་བློས་གཏོང་གནང་བའི་བྱས་རྗེས་ལ་ཡི་རང་བསྔགས་བརྗོད་གནང་བ་དང་ཆབས་ཅིག་ཁོང་གིས་གཙོས་བོད་མི་རིགས་ཀྱི་ཆེད་དུ་རང་གི་ལུས་སྲོག་ལོངས་སྤྱོད་དང་བཅས་པ་ཡོངས་རྫོགས་བློས་གཏོང་གནང་མཁན་གྱི་སྤྱིར་རྒྱལ་གཅེས་དཔའ་བོ་ཕོ་མོ་རྣམས་དང་། ཡང་སྒོས་ད་ལྟ་རྒྱ་མིའི་བཙོན་ཁང་ནང་སྡུག་སྦྱོང་སྣ་ཚོགས་མྱངས་དང་མྱོང་མུས་སུ་གནས་པའི་ཆབ་སྲིད་བཙོན་པ་རྣམས། དེ་བཞིན་ཉེ་ལམ་ཉི་ཧོང་དུ་རང་བྱུང་གི་གོད་ཆག་འོག་ཡུལ་མི་སྟོང་ཕྲག་མང་པོར་རྨས་སྐྱོན་དང་རྐྱེན་འདས་སོང་བ་རྣམས་དལ་རྟེན་བཟང་པོ་ཞིག་འཐོབ་སླད་སྨོན་ལམ་གསོལ་འདེབས་ཚོགས་ཡོད།
གོང་ཚེས་ཉིན་སུད་སིར་རྟེན་གཞི་བྱས་པའི་རི་ཀོན་ཆོས་འཁོར་དགོན་གྱི་འདུ་ཁང་ནང་སུད་སིར་གནས་བཞུགས་བོད་མི་ ༢༠༠ བརྒལ་བ་ལྷན་འཛོམས་ཀྱིས་རྟེན་མཆོག་སྤྱན་སྔར་མཆོད་སྤྲིན་སྟོང་ཚར་འབུལ་བཤམས་གནང་སྟེ། རི་ཀོན་ཆོས་འཁོར་དགོན་པའི་དགེ་འདུན་པ་རྣམས་དབུ་བཞུགས་ཐོག་འདས་མཆོད་ཀྱི་གསོལ་ཚོགས་ཤིག་ཀྱང་ཕུལ་ཡོད།
དེ་ཡང་མཆོད་འབུལ་དེའི་སྐོར་ལ་སུད་སིའི་བོད་རིགས་མི་མང་གི་ཚོགས་གཙོ་པ་སངས་ལགས་ཀྱིས་གསུང་དོན།  བོད་མདོ་སྨད་རྔ་པ་ནས་ཡིན་པའི་རྒྱལ་གཅེས་པ་དགེ་འདུན་ཕུན་ཚོགས་ལགས་ཀྱིས་བོད་སྤྱི་དོན་ཆེད་རང་ལུས་མེ་སྲེག་བཏང་ཡོད། དེ་བཞིན་མདོ་སྨད་བླ་བྲང་བཀྲིས་འཁྱིལ་དགོན་པའི་སྨན་པ་གྲྭ་ཚང་ནས་ཡིན་པའི་དགེ་འདུན་སྦྱིན་པ་ལགས་སུ་རྒྱ་ནག་གཞུང་གིས་མནར་གཅོད་ཚད་མེད་བཏང་བར་བརྟེན་འདས་གྲོངས་སུ་གྱུར་ཡོད། མདོར་ན། བོད་མི་རིགས་དང་བོད་རྒྱལ་ཁབ་ཆེད་ཁ་ཞེ་གཉིས་མེད་ཀྱིས་ལས་དོན་སྒྲུབ་མཁན་རྒྱལ་གཅེས་དཔའ་བོ་ཕོ་མོ་ཡོངས་སུ་རྫོགས་པ་དཀའ་སྡུག་གི་གནས་ལས་གང་མྱུར་གྲོལ་སླད་ང་ཚོས་འདི་གར་མཆོད་འབུལ་སྨོན་ལམ་འཚོགས་བཞིན་ཡོད། ཕྱོགས་མཚུངས་ཉི་ཧོང་ནང་རང་བྱུང་གི་གནོད་འཚེས་རྐྱེན་པས་ཡུལ་མི་སྟོང་ཕྲག་མང་པོར་སྲོག་སྐྱོན་དང་མང་དག་ཅིག་ལ་རྨས་སྐྱོན་ཕོག་ཡོད་པར་བརྟེན། འདས་པོ་རྣམས་དལ་རྟེན་རིམ་བཟང་འཐོབ་རྒྱུ་དང་ནད་མནར་གྱུར་བ་རྣམས་མགྱོགས་མྱུར་དྲག་སྐྱེད་ཡོང་བའི་ཆེད་གསོལ་འདེབས་སྨོན་ལམ་ཚོགས་ཀྱི་ཡོད་ཅེས་འགྲེལ་བརྗོད་གནང་ཡོད་པ་བཅས། །