ཕྱི་ལོ་ ༢༠༡༩ ཟླ་ ༣ ཚེས་ ༡༡ རེས་གཟའ་ཟླ་བ།
༄༅། །འདི་གར་ཐེ་ཝན་བོད་ཀྱི་སྐུ་ཚབ་དོན་ཁང་ནས་བཏང་གནས་ནང་འཁོད་དོན། བོད་མིས་རང་དབང་སྒེར་ལངས་བྱས་ནས་མི་ལོ་ཧྲིལ་པོ་དྲུག་ཅུ་འཁོར་བའི་དུས་དྲན་ཐེ་ཝན་ནང་སྲུང་བརྩི་གཟབ་རྒྱས་ཞུས་ཡོད་པ་རེད། ཐེ་སྡོད་བོད་རིགས་ཚོགས་པ་དང་། བོད་དང་ཐེ་ཝན་འགྲོ་བ་མིའི་ཐོབ་ཐང་འབྲེལ་མཐུད་ཁང་སོགས་བོད་དོན་རྒྱབ་སྐྱོར་ཚོགས་པ་དང་། གཞུང་འབྲེལ་མིན་པའི་ཚོགས་པ་ཁག་ ༢༦ མཉམ་འབྲེལ་ཐོག་གཞི་རྒྱ་ཆེ་བའི་གསུམ་བཅུའི་དུས་དྲན་གྱི་མཛད་སྒོ་དང་ཐེ་པེ་གྲོང་ཁྱེར་དང་རྔམ་སྟོན་ཁྲོམ་སྐོར་གོ་སྒྲིག་གནང་ཡོད་པ་རེད།
ཕྱི་ཚེས་ ༡༠ ཕྱི་དྲོ་ཆུ་ཚོད་ ༡།༣༠ ཐོག་མཛད་སྒོ་དབུ་འཛུགས་གནང་བ་ཞིང་བོད་རིགས་ཚོགས་པའི་ཚོགས་གཙོ་སོགས་ནས་དུས་དྲན་སྲུང་བརྩི་དང་འབྲེལ་བའི་གཏམ་བཤད་གནང་རྗེས། སྐུ་མགྲོན་གྱི་གཙོ་བོ་ཐེ་ཝན་གཞུང་འཛིན་དམངས་གཙོ་ཡར་ཐོན་ཚོགས་པའི་དྲུང་ཆེ་དང་། ཕྱོགས་འགལ་ཚོགས་པ་དུས་རབས་ནུས་སྟོབས་ཚོགས་པའི་ཚོགས་གཙོ། གྲོས་ཚོགས་འཐུས་མི་ལྕམ་ཝུའུ་གཡུས་ཇིན་ལགས། ཐེ་ཝན་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་Freddy Lim ལགས་སོགས་ཀྱིས་བོད་དོན་དང་འབྲེལ་བའི་གཏམ་བཤད་སྤེལ་རྗེས། སྐུ་ཚབ་དོན་གཅོད་ཟླ་བ་ཚེ་རིང་ལགས་ཀྱིས་ལས་འགུལ་ནང་མཉམ་ཞུགས་གནང་མཁན་ཡོངས་ལ་ཐུགས་རྗེ་ཆེ་ཞུས་པ་དང་སྦྲགས་བཀའ་ཤག་གི་གསུམ་བཅུའི་དུས་དྲན་གྱི་གསུང་འཕྲིན་སྒྲོག་སྦྱང་གནང་། དེ་རྗེས་ཐེ་ཝན་རྒྱལ་ས་ཐེ་པེ་གྲོང་ཁྱེར་གྱི་མི་ཚོགས་མང་བའི་གཞུང་ལམ་ཐོག་རྔམ་སྟོན་ཁྲོམ་སྐོར་དང་། ལམ་བར་སྣུམ་འཁོར་སྟེགས་བུའི་ཐོག་ཐེ་པེ་གྲོང་ཁྱེར་ས་གནས་གྲོས་ཚོགས་འཐུས་མི་དང་། གཞུང་འབྲེལ་མིན་པའི་ཚོགས་པའི་ཚོགས་གཙོ་སོགས་ནས་བོད་མིར་གདུང་སེམས་མཉམ་སྐྱེའི་གཏམ་བཤད་སྤེལ།
ཆུ་ཚོད་ ༣།༡༠ ཐོག་ཁྲོམ་སྐོར་འགྲོ་མཚམས་བཞག་སྟེ་བོད་ཀྱི་རྒྱལ་གཅེས་དཔའ་བོ་དཔའ་མོ་རྣམས་ལ་གུས་འདུད་མཚོན་ཆེད་གཞུང་ལམ་ཐོག་ཕྱག་འཚལ་དང་། སྐར་མ་གཅིག་གི་ངག་བཅད་མྱ་ངན་ཞུས། ཁྲོམ་སྐོར་མཇུག་སྒྲིལ་རྗེས་ཉི་ཧོང་དགོན་པའི་ཐང་ཆེན་དུ་འཛོམས་ནས་སྡིངས་ཆའི་ཐོག་ཕོ་བྲང་པོ་ཏ་ལའི་སྐུ་པར་མདུན་༸གོང་ས་མཆོག་གི་སྐུ་པར་མཐོང་གྲོལ་རིན་པོ་ཆེ་སྒྲིག་ནས་མཇལ་དར་སྒྲོན་པ་དང་། དེ་ཡང་༸གོང་ས་མཆོག་གིས་དབུས་པའི་བཙན་བྱོལ་བོད་མི་རྣམས་རང་ཡུལ་བོད་གངས་ཅན་ལྗོངས་སུ་གཞིས་བྱེས་མཉམ་འཛོམས་ཐུབ་ནས། བོད་མི་རྣམས་ཕོ་བྲང་པོ་ཏ་ལ་ནས་༸གོང་ས་༸སྐྱབས་མགོན་ཆེན་པོ་མཆོག་གི་ཞལ་མཇལ་གྱི་སྐལ་པ་བཟང་པོ་ཤར་བའི་རྟེན་འབྲེལ་མཚོན་ཆེད་བཅས་ཡིན་པ་རེད།
