ཕྱི་ལོ་ ༢༠༡༩ ཟླ་ ༣ ཚེས་ ༨ རེས་གཟའ་པ་སངས།
༄༅། །ཕྱི་ལོ་ ༡༩༥༩ ཟླ་ ༣ ཚེས་ ༡༧ ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྟོན་འཁོར་ཧྲག་བསྡུས་དང་བཅས་ནོར་གླིང་ཕོ་བྲང་ནས་ཞལ་གྱེས་ཏེ་བཙན་བྱོལ་དུ་ཆིབས་སྒྱུར་བསྐྱངས་ཡོད། འདི་ལོའི་ཕྱི་ཟླ་ ༣ ཚེས་ ༡༨ ཉིན་མགོན་པོ་མཆོག་གི་དབུ་ཁྲིད་འོག་བོད་མི་འབུམ་གཅིག་ལྷག་བཙན་བྱོལ་དུ་འབྱོར་ནས་མི་ལོ་ ༦༠ འཁོར་བཞིན་ཡོད་སྟབས། དུས་ཚིགས་ཁྱད་པར་ཅན་དེ་རྗེས་དྲན་ཞུ་སླད་ཨ་རིར་རྟེན་གཞི་བྱས་པའི་རྒྱལ་སྤྱིའི་གསར་འགྱུར་ཚན་པ་གྲགས་ཅན་དུས་བབ་བརྙན་དེབ་ TIME ཀྱི་རྒྱབ་ཤའི་སྟེང་༸གོང་ས་ཏཱ་ལའི་བླ་མ་མཆོག་གི་༸སྐུ་པར་ཞིག་བཀོད་དེ། ༼ ལོ་ངོ་ ༦༠ རིང་འཛམ་གླིང་ཁྱོན་དུ་ནང་པའི་མཚོན་རྟགས་སུ་ངོས་འཛིན་ཞུ་བཞིན་པའི་ཏཱ་ལའི་བླ་མའི་གོ་གནས་དེར་རྒྱ་ནག་གཞུང་གིས་འགྱུར་བ་གཏོང་ཐབས་བྱེད་བཞིན་པ། ༽ ཞེས་པའི་འགོ་བརྗོད་འོག དུས་དེབ་དེའི་རྩོམ་པ་པོ་ཅར་ལི་ཀེམ་བྷེལ་ Charlie Campbell ལགས་ཆེད་མངགས་བཞུགས་སྒར་༸རྒྱལ་བའི་ཕོ་བྲང་དུ་མཇལ་བཅར་ཞུས་ནས་མགོན་པོ་གང་ཉིད་དང་ལྷན་སྐར་མ་དགུ་བཅུའི་རིང་བཅར་འདྲི་མཛད་པའི་སྐོར་གྱི་ཆེད་རྩོམ་ཞིག་ཀྱང་དུས་བབ་བརྙན་དེབ་དེའི་ནང་བཀོད་འདུག
ཆེད་རྩོམ་དེའི་ནང་ཐོག་མར་༸རྒྱལ་བའི་ཡང་སྲིད་དུ་ངོས་འཛིན་ཞུ་སྟངས་དང་། ཆོས་སྲིད་ལུགས་གཉིས་ཀྱི་མངའ་དབང་བདག་གིར་བཞེས་ཚུལ། བོད་དུ་རྒྱ་ནག་དམར་པོ་བཙན་འཛུལ། ཕྱི་ལོ་ ༡༩༥༩ ཟླ་ ༣ ཚེས་ ༡༠ ཉིན་བོད་ཀྱི་རྒྱལ་ས་ལྷ་སར་བོད་མི་ཚོས་མ་གྲོས་བསམ་པ་གཅིག་མཐུན་གྱིས་རྒྱ་དམར་སྲིད་གཞུང་གི་དབང་སྒྱུར་ལ་ངོ་རྒོལ་རྔམ་སྟོན་བྱེད་པའི་གནས་སྟངས། རྒྱ་གར་ནང་བོད་མིའི་ཆོས་དང་རིག་གཞུང་འཛིན་སྐྱོང་སྤེལ་གསུམ་ཇི་ལྟར་མཛད་ཚུལ་དང་། བོད་ཀྱི་ལོ་རྒྱུས་ཁྲོད་སྔར་མ་གྲགས་པའི་མང་གཙོའི་ལམ་ལུགས་སྲོལ་བཟང་གསར་གཏོད་མཛད་ཚུལ། དབུ་མའི་ལམ་གྱི་སྲིད་བྱུས་ཀྱི་བྱུང་རིམ་དང་། སྲིད་བྱུས་དེའི་འོག་ནས་བོད་རྒྱ་འབྲེལ་མོལ་ཇི་ཙམ་བྱུང་བ། རྒྱལ་སྤྱིའི་ཐོག་མགོན་པོ་གང་ཉིད་ལ་ཆེ་མཐོང་ཇི་ལྟར་ཞུ་ཚུལ།
ལྷག་པར་ཕྱི་ལོ་ ༡༩༨༩ ལོར་འཛམ་གླིང་ནང་ཆེས་སྙན་པར་གྲགས་པ་ནོ་བེལ་ཞི་བདེའི་གཟེངས་འབུལ་བཞེས་མཛད་ཚུལ་སྐོར། ༸གོང་ས་༸སྐྱབས་མགོན་ཆེན་པོ་མཆོག་གི་མཛད་བཟང་ལ་བརྟེན་ནས་འཛམ་གླིང་ཤར་ནུབ་གང་སར་བོད་བརྒྱུད་ནང་བསྟན་ལ་དོ་སྣང་བྱེད་མཁན་ལོ་རེ་བཞིན་ཇེ་མང་དུ་འགྲོ་ཚུལ། བོད་ནང་རྒྱ་ནག་གཞུང་གིས་འཛུགས་སྐྲུན་ལས་གཞི་ཇི་ལྟར་སྤེལ་བཞིན་པའི་སྐོར་དང་། དེ་སྔ་བོད་ཆོས་ལྡན་གྱི་ཞིང་དུ་གྲགས་པར་ད་ཆ་རྒྱ་ནག་གི་གྲོང་ཁྱེར་གཞན་དང་གཅིག་མཚུངས་ཕྱིའི་བཀོད་པ་རྒྱས་སྤྲོས་ཆེ་ཚུལ་དང་། ཆོས་དུག་ཏུ་ལྟ་བའི་རྒྱ་ནག་དམར་པོའི་སྲིད་གཞུང་གིས་ཆབ་སྲིད་ཀྱི་དགོས་མཁོར་གཞིགས་པའི་བོད་བརྒྱུད་ནང་བསྟན་ལ་འཇམ་མཁས་ཐོག་ནས་དབང་སྒྱུར་བྱེད་ཐབས་བྱེད་བཞིན་པ་མ་ཟད། བོད་བརྒྱུད་ནང་བསྟན་གྱི་བླ་སྤྲུལ་ཡང་སྲིད་རྩད་འཚོལ་ལམ་ལུགས་སྤྱི་དང་། ལྷག་པར་༸རྒྱལ་བའི་ཡང་སྲིད་ཀྱི་གནད་དོན་ཐོག་དབང་སྒྱུར་བྱེད་ཐབས་བྱེད་བཞིན་པའི་གནས་སྟངས།
བོད་ཀྱི་སྐད་ཡིག་སྲུང་སྐྱོབ་ཆེད་འཐབ་རྩོད་གནང་མཁན་བོད་མི་བཀྲ་ཤིས་དབང་ཕྱུག་སྐོར་ཡང་འཁོད་འདུག དེ་བཞིན་རྒྱ་ནག་གཞུང་གིས་འཇམ་རྩུབ་ཐབས་ཤེས་སྣ་ཚོགས་འོག་བོད་མིའི་བློ་འགུག་ཐབས་བྱེད་བཞིན་ཡོད་ཀྱང་བོད་མི་རྣམས་ཀྱི་བློ་རྩ་བ་ནས་འགུག་མ་ཐུབ་པ་མ་ཟད། ཕྱི་ལོ་ ༢༠༠༩ ནས་བཟུང་ད་བར་བོད་མི་བརྒྱ་དང་ལྔ་བཅུ་ལྷག་གིས་རང་ལུས་མེར་སྲེག་གནང་ནས་རྒྱ་ནག་གི་དབང་སྒྱུར་ལ་ངོ་རྒོལ་གནང་བའི་སྐོར་སོགས་འཁོད་འདུག
གཞན་ཡང་༸གོང་ས་༸སྐྱབས་མགོན་ཆེན་པོ་མཆོག་གི་རླབས་ཆེན་གྱི་མཛད་ཁུར་གཙོ་བོ་ཨང་གཉིས་པ་ཆོས་ལུགས་མཐུན་སྒྲིལ་སྐོར་དང་། མགོན་པོ་མཆོག་སྐུ་གཞོན་ནུའི་དུས་སྐབས་ནས་ཚན་རིག་ལ་ཐུགས་སྣང་ཧ་ཅང་མཛད་པ་མ་ཟད། རིམ་བཞིན་བཙན་བྱོལ་དུ་༸ཞབས་སོར་འཁོད་བསྟུན། ལོ་ངོ་ ༣༠ ལྷག་རིང་རྒྱལ་སྤྱིའི་ཚན་རིག་པ་གྲགས་ཅན་མང་པོ་དང་ལྷན་ནང་པའི་གཞུང་ནས་གསུང་པའི་ཚན་རིག་དང་ལྟ་གྲུབ་ཐོག་ནས་བགྲོ་གླེང་ཐེངས་མང་མཛད་པའི་སྐོར། དེང་སྐབས་རྒྱ་ནག་ནང་དུ་རྒྱ་རིགས་དམར་ཤོག་ཚོགས་མི་ལས་རྒྱ་རིགས་ནང་པ་མང་མ་ཡོད་པ་དང་། རྒྱ་རིགས་ནང་པ་ས་ཡ་ ༣༠༠ ནས་ ༤༠༠ བར་ཡོད་པ་དེ་དག་ཁྲོད་མང་པོ་ཞིག་གིས་བོད་བརྒྱུད་ནང་བསྟན་ལ་དད་གུས་ཞུ་མཁན་ཡིན་སྐོར། རྒྱ་ནག་ནང་དཔལ་འབྱོར་ཡར་རྒྱས་ཧ་ལས་པ་ཡོད་ཀྱང་བཟང་སྤྱོད་ཀྱི་ཕོངས་པའི་སྤྱི་ཚོགས་དེ་ད་ཆ་ནང་ཆོས་བརྒྱུད་ནས་རྒྱ་མི་རིགས་ཀྱི་སྲོལ་རྒྱུན་གྱི་བཟང་སྤྱོད་བསྐྱར་གསོ་མཛད་རྒྱུའི་དུས་ལ་བབ་ཡོད་སྟབས། དེའི་ཐད་༸གོང་ས་༸སྐྱབས་མགོན་ཆེན་པོ་མཆོག་གིས་ཐུགས་བརྩོན་མཛད་བཞིན་ཡོད་པ་སོགས་འཁོད་འདུག
དེ་ཡང་དུས་དེབ་འདིའི་མདུན་ཤོག་སྟེང་འཛམ་གླིང་ཐོག་ཆབ་སྲིད་དང་དཔལ་འབྱོར། ཆོས་ཕྱོགས་དང་བཟང་སྤྱོད། གཞན་ཡང་ཕུལ་བྱུང་སྒྱུ་རྩལ་བ་དང་གློག་བརྙན་འཁྲབ་སྟོན་པ། དེ་བཞིན་རྒྱལ་སྤྱིའི་མི་སྣ་གྲགས་ཅན་དང་དབུ་ཁྲིད་ཁག་ལ་ཆེ་བསྟོད་ཞུ་སླད་འཇོག་སྲོལ་ཡོད་ཅིང་། ཆེ་མཐོང་ཞུས་པའི་མི་སྣ་དེ་དག་གིས་འཛམ་གླིང་མི་མང་ས་ཡ་མང་པོར་ཤུགས་རྐྱེན་སྤྲོད་ཐུབ་པ་ཡོངས་གྲགས་ངོས་ཞུ་བཞིན་པ་རེེད།
ཐེངས་འདིར་བོད་མིའི་བླ་ན་མེད་པའི་དགོན་སྐྱབས་འདི་ཕྱིའི་སྐབས་གནས་སྤྱི་ནོར་༸གོ་ས་༸སྐྱབས་མགོན་ཆེན་པོ་མཆོག་གི་མཐོང་གྲོལ་འཛུམ་ཞལ་གྱི་སྐུ་པར་བཀོད་པ་ནི་དུས་དེབ་དེའི་རྒྱབ་ཤའི་སྟེང་འགོད་ཐེངས་གསུམ་པ་ཆགས་འདུག
ཐེངས་དང་པོ་ནི་ཕྱི་ལོ་ ༡༩༥༩ ཟླ་ ༤ ཚེས་ ༢༠ ཉིན་བོད་ནང་རྒྱ་དམར་གཞུང་གིས་བཙན་འཛུལ་བྱེད་སྟངས་ལོ་རྒྱུས་དང་སྦྲགས་བཀོད་འདུག
དེ་རྗེས་བོད་ནང་ས་བྱི་ཞི་རྒོལ་ཆེན་མོའི་སྐོར་ལ་བཅར་འདྲི་དང་སྦྲགས་ཕྱི་ལོ་ ༢༠༠༨ ཟླ་ ༣ ཚེས་ ༣༡ ཉིན་དུས་དེབ་དེའི་མདུན་ཤོག་ཏུ་སླར་ཡང་༸གོང་ས་༸སྐྱབས་མགོན་ཆེན་པོའི་སྐུ་པར་བཀོད་པ་མ་ཟད།
ད་ཐེངས་ཕྱི་ལོ་ ༢༠༡༩ ཟླ་ ༣ ཚེས་ ༡༨ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྐྱབས་བཅོལ་དུ་ཆིབས་སྒྱུར་བསྐྱངས་ནས་མི་ལོ་ ༦༠ ཧྲིལ་པོ་འཁོར་བཞིན་པ་དེར་རྗེས་དྲན་མཚོན་སླད་ ༢༠༡༩ ཟླ་ ༣ ཚེས་ ༧ ཉིན་དུས་དེབ་དེའི་རྒྱབ་ཤའི་སྟེང་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་པར་བཀོད་ཡོད་པ་མ་ཟད། རྩོམ་པ་པོས་ཆེད་མངགས་ཨ་རི་ནས་བཞུགས་སྒར་༸རྒྱལ་བའི་ཕོ་བྲང་དུ་མཇལ་བཅར་ཞུས་ནས་སྐར་མ་ ༩༠ རིང་༸གོང་ས་༸སྐྱབས་མགོན་ཆེན་པོ་མཆོག་ལ་བཅར་འདྲི་ཞུས་པའི་སྐོར་སོགས་གནས་ཚུལ་ཧ་ཅང་ཞིབ་རྒྱས་བཀོད་ཡོད་པ་བཅས།།
