ཕྱི་ལོ་ ༢༠༡༩ ཟླ་ ༣ ཚེས་༧ རེས་གཟའ་ཕུར་བུ།
༄༅། །སྦར་སེལ་དུ་ཡུ་རོབ་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་དང་ཡུ་རོབ་གྲོས་ཚོགས་ཀྱི་འཐུས་མི་སྐུ་ཞབས་ཐོ་མ་སི་མན་ Thomas Mann མཆོག་གིས་གཙོ་སྐྱོང་འོག་ཡུ་རོབ་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པའི་ཚོགས་འདུ་མཐའ་མའི་སྐབས་འཇིགས་བྲལ་ཞེས་པའི་དངོས་བྱུང་གློག་བརྙན་བཟོ་མཁན་དོན་གྲུབ་དབང་ཆེན་ལགས་དམིགས་བསལ་སྐུ་མགྲོན་དུ་ཕེབས་ཡོད།
དེ་ཡང་དོན་གྲུབ་དབང་ཆེན་ལགས་རྒྱ་ནག་གི་བཙོན་འོག་ནས་གློད་བཀྲོལ་ཡོང་བའི་ཆེད་ཡུ་རོབ་གྲོས་ཚོགས་གཙོས་གཞུང་འབྲེལ་དང་གཞུང་འབྲེལ་མ་ཡིན་པའི་ཚོགས་པ་ཁག་གིས་རོགས་སྐྱོར་བླ་མེད་གནང་ཡོད་སྟབས། དོན་གྲུབ་དབང་ཆེན་ལགས་ཡུ་རོབ་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པའི་ཚོགས་འདུ་མཐའ་མར་བདེན་དཔང་དུ་ཕེབས་ཡོད། སྦར་སེལ་སྐུ་ཚབ་དོན་གཅོད་བཀྲ་ཤིས་ཕུན་ཚོགས་ལགས་ཀྱིས། ལོ་ན་ ༤༥ ལ་སོན་པའི་གློག་བརྙན་བཟོ་མཁན་དོན་གྲུབ་དབང་ཆེན་ལགས་ཀྱིས་ཕྱི་ལོ་ ༢༠༠༨ ལོར་འཇིགས་བྲལ་ཞེས་པའི་དངོས་བྱུང་གློག་བརྙན་བཟོས་པར་བརྟེན། རྒྱ་ནག་གི་བཙོན་འོག་ཏུ་ལོ་ངོ་དྲུག་གི་རིང་དཀའ་སྡུག་གི་མནར་གཅོད་མྱངས་ཡོད། རྒྱལ་སྤྱིའི་གཞུང་འབྲེལ་དང་གཞུང་འབྲེལ་མ་ཡིན་པའི་ཚོགས་པ་ཁག་གིས་རྒྱབ་སྐྱོར་གནང་སྟེ་ཕྱི་ལོ་ ༢༠༡༤ ཟླ་ ༦ ཚེས་ ༥ ཉིན་རྒྱ་ནག་གི་བཙོན་འོག་ནས་གློད་བཀྲོལ་ཐོབ། ཕྱི་ལོ་ ༢༠༡༧ ཟླ་ ༡༢ ནང་བོད་ནས་ཨ་རི་ལ་བཙན་བྱོལ་དུ་ཕེབས་ཡོད་པ་དང་། རིམ་པས་ཨ་རིའི་གཞུང་གིས་ཁོང་ལ་བཙན་བྱོལ་བའི་ཐོབ་ཐང་གནང་ཡོད། ཅེས་སོགས་ཀྱི་ངོ་སྤྲོད་གསུང་བཤད་གནང་།
དེ་རྗེས་དོན་གྲུབ་དབང་ཆེན་ལགས་ཀྱིས་སྐད་སྒྱུར་བ་རིག་འཛིན་ཆོས་སྒྲོན་ལགས་བརྒྱུད་གསུང་དོན། སྤྱིར་རྒྱ་ནག་གི་རྩ་ཁྲིམས་ནང་མི་མང་དང་བཙོན་པ་ཚོར་ཐོབ་ཐང་ཆ་ཚང་སྤྲད་ཡོད་པ་གསལ་པོར་བཀོད་ཡོད་ནའང་། དོན་དངོས་སུ་རྒྱ་ནག་གཞུང་གིས་དེ་དག་ལག་བསྟར་བྱེད་ཀྱི་མེད་པ་མ་ཟད། བོད་པའི་བཙོན་པ་ཚོར་དམིགས་བསལ་གྱིས་དབྱེ་འབྱེད་གཏོང་གི་ཡོད། རང་ཉིད་རྒྱ་ནག་གི་བཙོན་ཁང་ནང་ཉིན་ཞག་བདུན་རིང་བཟའ་བཏུང་མེད་པར་ཟུར་བཀག་བཙོན་འཇུག་བྱས་པ་མ་ཟད། ཐ་ན་བཙོན་འོག་ནས་གློད་བཀྲོལ་ཐོབ་ཟིན་པའི་རྗེས་ལའང་རྒྱ་གཞུང་གིས་རང་ཉིད་ཀྱི་གྲོགས་པོ་རྣམས་ལ་སུན་གཙེར་དང་། མི་གཞན་ལ་འབྲེལ་གཏུག་བྱས་མ་ཆོག་པ་བཟོས་པ་སོགས་ཧ་ཅང་མནར་གཅོད་མྱངས་པ་ཡིན། ཡུ་རོབ་གྲོས་ཚོགས་འཐུས་མི་རྣམས་ཀྱིས་བོད་དོན་དང་ཡང་སྒོས་ང་རང་བཙོན་འོག་ནས་གློད་བཀྲོལ་སླད་རྒྱབ་སྐྱོར་དང་ཐུགས་ཁུར་གནང་བར་ཐུགས་རྗེ་ཆེ་ཞུ་བ་དང་སྦྲགས། རྒྱ་ནག་གི་གནོན་ཤུགས་ལ་མ་ལྟོས་པར་མུ་མཐུད་ཁྱེད་རྣམ་པས་བོད་དོན་དང་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཡར་རྒྱས་ཡོང་བར་རྒྱབ་སྐྱོར་གནང་དགོས་པའི་འབོད་སྐུལ་ཞུ་རྒྱུ་ཡིན། ཞེས་གསུངས།
སྐུ་ཞབས་ཐོ་མ་སི་མན་མཆོག་གིས་བོད་ནང་གི་བཙོན་པ་ཚོའི་ཆེད་བོད་ཕྱི་ལོགས་ཀྱི་བོད་དོན་རྒྱབ་སྐྱོར་བ་ཚོས་ལས་འགུལ་སྤེལ་བཞིན་ཡོད་པ་དེ་བོད་ནང་གི་བོད་མི་ཚོས་མཁྱེན་རྟོགས་ཡོང་གི་ཡོད་མེད་སྐོར་དང་། ཡུ་རོབ་གྲོས་ཚོགས་ཀྱི་འཐུས་མི་ཊུ་ནེ་ཀེ་ལམ་Tunne Kelem མཆོག་གིས་མི་གྲངས་ ༡༠༠ ལྷག་གིས་འཇིགས་བྲལ་གློག་བརྙན་ནང་ཆ་ཤས་བླངས་པའི་སྐོར་དོན་གྲུབ་དབང་ཆེན་ལགས་ལ་དྲིས། ཡུ་རོབ་གྲོས་ཚོགས་ཀྱི་འཐུས་མི་སྐུ་ཞབས་ས་བྷ་སོ་གོར་ Csaba Sogor མཆོག་གིས་དོན་གྲུབ་དབང་ཆེན་ལགས་ཀྱིས་རྒྱ་ནག་གི་བཙོན་འོག་ནས་དཀའ་སྡུག་མྱངས་པའི་སྐོར་འགྲེལ་བརྗོད་གནང་བར་ཐུགས་རྗེ་ཆེ་ཞུས་ཡོད།
དོན་གྲུབ་དབང་ཆེན་ལགས་སྦར་སེལ་ནང་རྟེན་གཞི་བྱས་པའི་རྒྱལ་སྤྱིའི་གཞུང་འབྲེལ་མ་ཡིན་པའི་ཚོགས་པ་ཁག་གི་སྐུ་ཚབ་རྣམས་དང་ལྷན་ཐུག་འཕྲད་དང་། དེ་བཞིན་ཡུ་རོོབ་བོད་མིའི་རང་དབང་སྒེར་ལངས་གསུམ་བཅུའི་དུས་དྲན་ཐེངས་ ༦༠ ཐམ་པའི་མཛད་སྒོར་མཉམ་ཞུགས་གནང་རྒྱུ་ཡིན་འདུག་པ་བཅས། །
