༢༠༡༩ ཟླ་ ༣ ཚེས་ ༤ རེས་གཟའ་ཟླ་བ།
༄༅། །འདི་གར་འཕྲོད་བསྟེན་ལས་ཁུངས་ནས་བཏང་གནས་ནང་འཁོད་དོན། བཙན་བྱོལ་བོད་མིའི་སྨན་བཅོས་ལྟ་སྐྱོང་ལས་གཞི་འགོ་བཙུགས་ནས་ད་ཆ་ལོ་ངོ་བརྒྱད་པའི་ཚོགས་ཞུགས་ཀྱི་ལས་འགུལ་འགྲོ་བཞིན་པའི་སྐབས་འདིར་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་སྨན་བཅོས་ལྟ་སྐྱོང་གི་འགན་འཛིན་ཉི་མ་རྒྱལ་མཚན་ལགས་ཀྱིས་རྒྱ་གར་ལྷོ་ཕྱོགས་གཞིས་ཆགས་ཆེ་ཁག་ཏུ། ལས་གཞི་འདིའི་ཐོག་མང་ཚོགས་ལ་གོ་རྟོགས་སྤེལ་སླད་གཞུང་འབྲེལ་ཕྱོགས་བསྐྱོད་ལེགས་པར་གྲུབ་མཚམས་ཕྱི་ཟླ་ ༣ ཚེས་ ༢ ཉིན་རྡ་སར་འབྱོར་ཡོད།
སྐབས་དེར་ཉི་མ་ལགས་ཀྱིས་སྨན་བཅོས་ལྟ་སྐྱོང་ལས་གཞིའི་རྒྱབ་ལྗོངས་ལོ་རྒྱུས་དང་དགོས་དམིགས། ལས་གཞི་དེ་བཞིན་འགོ་བཙུགས་གནང་དགོས་དོན་དང་ཕན་རླབས། ད་བར་མང་ཚོགས་གྲངས་ཇི་ཙམ་ལ་སྨན་བཅོས་ཁེ་ཕན་ཐོབ་ཐུབ་ཡོད་པ། ཚོགས་དངུལ་བྱུང་བ་དང་། མང་ཚོགས་ཆེད་སྨན་གྲོན་སོང་བའི་དངུལ་འབོར་གྱི་གྲངས་ཐོ་སོགས་གསལ་བཤད་གནང་བ་དང་། དེ་བཞིན་ལས་གཞིའི་དགེ་ཚན་སྐོར་སོགས་ལ་འགྲེལ་བརྗོད་གནང་ཡོད།
ཐེངས་འདིའི་མང་ཚོགས་གཏམ་བཤད་སྐབས་དྲི་བ་དྲི་ལན་ལ་དུས་ཚོད་གང་མང་བཏང་ནས་མང་ཚོགས་ཀྱི་དོགས་འདྲི་ཁག་སེལ་ཐབས་ཞུས་ཡོད། དེ་བཞིན་ས་གནས་སུ་བསྐྱོད་སྐབས་འཕྲོད་བསྟེན་ལས་ཁུངས་ཀྱི་སྐུ་ཚབ་ཡིན་པའི་ཆ་ནས་འཕྲོད་བསྟེན་སྔོན་འགོག་སྐོར་དང་སེམས་ཁམས་འཕྲོད་བསྟེན་ཐོག་ལའང་འགྲེལ་བརྗོད་གོ་རྟོགས་གང་ཐུབ་སྤེལ་ཡོད།
སྨན་བཅོས་ལྟ་སྐྱོང་ལས་གཞིའི་ནང་ཚོགས་ཞུགས་ཐོ་འགོད་ཀྱི་དུས་ཡུན་ནི་ཕྱི་ལོ་ ༢༠༡༩ ཟླ་ ༣ ཚེས་ ༣༡ བར་ཡིན་ན། མང་ཚོགས་ནས་སོ་སོའི་ཁྱབ་ཁོངས་གཞིས་ལས་ཁང་ངམ་འཕྲོད་བསྟེན་སྨན་ཁང་ལ་ཕེབས་ནས་དུས་ཐོག་ཐོ་འགོད་གནང་དགོས། །
