ཕྱི་ལོ་ ༢༠༡༩ ཟླ་ ༢ ཚེས་ ༡༥ རེས་གཟའ་པ་སངས། 

༄༅། །འདི་གར་ཚོགས་དྲུང་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༡༩ ཟླ་ ༢ ཚེས་ ༡༢ ཉིན་ཨ་རིའི་གཞུང་མང་གཉིས་ལ་ཐུགས་རྗེ་ཆེ་ཞུའི་མཛད་སྒོ་ཞིག་བོད་མིའི་སྒྲིག་འཛུགས་བཀའ་ཤག་གི་ཐུགས་རྗེ་ཆེ་ཞུའི་ལས་འགུལ་གྱི་ཆ་ཤས་སུ་ཨ་རི་སྐུ་ཚབ་དོན་ཁང་དང་། རྒྱལ་སྤྱིའི་བོད་དོན་ལས་འགུལ་ཁང་། ས་གནས་བོད་རིགས་ཚོགས་པ་བཅས་ཀྱི་གོ་སྒྲིག་གནང་ཡོད་པར་བོད་མི་མང་སྤྱི་འཐུས་པདྨ་ཕྱག་མཛོད་ཚང་ལགས་ཀྱིས་སྤྱི་འཐུས་ལྷན་ཚོགས་ཀྱི་ཚབ་ཞུས་ཏེ་ཆེད་བཅར་གནང་ཡོད་འདུག
མཛད་སྒོའི་ཐོག་སྤྱི་འཐུས་ནས་ཨ་རིའི་གཞུང་མང་གཉིས་ལ་ཐུགས་རྗེ་ཆེ་ཞུས་པ་དང་སྦྲགས་གསུང་དོན།  འདས་པའི་ལོ་ངོ་ ༥༠ ལྷག་ནང་ཨི་རིས་བོད་མི་ཚོར་ཆབ་སྲིད་དང་། དཔལ་འབྱོར། སྤྱི་ཚོགས་ཐོག་རྒྱབ་སྐྱོར་གནང་ནས་བོད་པའི་རིག་གཞུང་དང་ངོ་བོ། རྒྱུན་སྲོལ་དང་གོམས་གཤིས་སོགས་སྲུང་སྐྱོབ་གནང་བ་དང་། ལྷག་པར་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་གུས་བཀུར་ཆེ་མཐོང་ཞུས་པར་ཐུགས་རྗེ་ཆེ་ཞུས་གནང་ཡོད་འདུག

དེ་བཞིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཨ་རིའི་གྲོས་ཚོགས་ཀྱི་གསེར་གྱི་གཟེངས་རྟགས་འབུལ་བཞེས་མཛད་པ་དང་།  ཨ་རིའི་གྲོས་ཚོགས་གོང་འོག་གི་འཐུས་མི་ཚོས་སྤྱི་མོས་ཐོག་ནས་བོད་དུ་རང་དབང་ཐོག་འགྲུལ་བསྐྱོད་ཆོག་པའི་ཁྲིམས་འཆར་ Reciprocal Access to Tibet Act ཞེས་པ་ཁྲིམས་སུ་གཏན་འབེབས་གནང་ཡོད་སྐོར་སོགས་གསུངས་པ་དང་། གཞན་ཡང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བོད་མིའི་ཐོག་བཅངས་པའི་ཕུགས་རྒྱང་རིང་པོའི་དགོངས་བཞེས་དང་། ཐུགས་བརྩེའི་གཟིགས་པ་ཆེན་པོའི་འོག་གདུལ་བྱ་རྣམས་རྗེས་སུ་འཛིན་པའི་བྱམས་བརྩེའི་མཛད་བཟང་བླ་ན་མེད་པར་བཀའ་དྲིན་རྗེས་དྲན་ཞུས་གནང་བ་དང་།  ལྷག་པར་བོད་ཀྱི་ལོ་རྒྱུས་ཁྲོད་ཧ་ཅང་གཉན་འཕྲང་ཆེ་བའི་དུས་སྐབས་འདིར་མགོན་པོ་གང་ཉིད་ཀྱི་རླབས་ཆེན་གྱི་དབུ་ཁྲིད་ལམ་སྟོན་འོག་བོད་མི་ཚང་མས་བོད་ཀྱི་གནད་དོན་སེལ་ཆེད་བོད་རྒྱ་མི་རིགས་གཉིས་སྨན་དབུ་མའི་ལམ་གྱི་སྲིད་བྱུས་གཞིར་བཟུང་བོད་རྒྱ་ཞི་མོལ་ཡོང་བར་རྒྱབ་སྐྱོར་དང་། བོད་མི་ཆབ་སྲིད་བཙོན་པ་རྣམས་མགྱོགས་མྱུར་བཙོན་གྲོལ་ཐོབ་ཕྱིར་རྒྱ་ནག་གཞུང་ལ་གནོན་ཤུགས་སྤྲོད་དགོས་པ་གལ་ཆེ་ཚུལ་དང་། དེ་བཞིན་བོད་པའི་རིག་གཞུང་སྲུང་སྐྱོབ་དང་བོད་མིའི་བདེ་དོན་ཆེད་རོགས་སྐྱོར་སྔར་བཞིན་མུ་མཐུད་གནང་སྐྱོང་ཡོང་བའི་འབོད་སྐུལ་ཞུས་མཐར་སླར་ཡང་ཨ་རིའི་གཞུང་མང་གཉིས་ལ་བོད་མི་ཚང་མའི་ཚབ་ཞུས་ཏེ་ཐུགས་རྗེ་ཆེ་ཞེས་པ་བཅས། །