༢༠༡༡ ཟླ་ ༤ ཚེས་ ༥ རེས་གཟའ་མིག་དམར།
༄༅། །ཉེ་ལམ་ཝ་ཊ་ཀིན་སི་རི་ཝིའུ་ Watkins Review ཞེས་པའི་དུས་དེབ་སྟེང་གནས་ཚུལ་སྤེལ་གསལ་ལྟར་ན། འཛམ་གླིང་འདིའི་ནང་ཆོས་ཕྱོགས་ཀྱི་རླབས་ཆེན་དབུ་ཁྲིད་མི་སྣ་བརྒྱ་ཡི་མཚན་གཞུང་འདོན་སྤེལ་ཞུས་པའི་ཁོངས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཨང་གཉིས་པར་འདེམས་ཐོན་བྱུང་བའི་མཚན་གཞུང་ཞིག་འདོན་སྤེལ་ཞུས་འདུག དེ་ཡང་ཨིན་ཇིའི་རྒྱལ་ས་ལོན་ཌོན་ནང་རྟེན་གཞི་བྱས་པའི་ལོ་ངོ་བརྒྱ་ལྷག་གི་ལོ་རྒྱུས་ལྡན་པའི་ཝ་ཊ་ཀིན་སི་དཔེ་མཛོད་ཁང་གིས་ཉེ་ཆར་འཛམ་གླིང་ནང་གི་ཆོས་ཕྱོགས་ཀྱི་དབུ་ཁྲིད་༡༠༠ བདམས་པའི་མཚན་གཞུང་ཁྱབ་བསྒྲགས་གནང་ཡོད། ཝ་ཊ་ཀིན་སི་རི་ཝིའུ་ཞེས་པའི་དུས་དེབ་དེའི་ཐོག་སྤེལ་ཡོད་པ་དང་དུས་དེབ་དེའི་རྩོམ་སྒྲིག་པ་རྣམས་ཀྱིས་མཚན་གཞུང་འདི་འདོན་སྤེལ་ཞུས་ཏེ་དེང་དུས་ཀྱི་ཆོས་ལུགས་དང་འབྲེལ་ཡོད་ཐད་བགྲོ་གླེང་ཐུབ་པའི་ཐུགས་རེ་གནང་གི་ཡོད་ལུགས་གསུངས་འདུག འཛམ་གླིང་ནང་གི་ཆོས་ཕྱོགས་ཀྱི་རླབས་ཆེན་དབུ་ཁྲིད་ཁག་ ༡༠༠ ཡི་མཚན་གཞུང་ནང་འཁོད་རྒྱུར་གོང་ཞུས་དཔེ་མཛོད་ཁང་གི་ཆ་རྐྱེན་གཙོ་བོ་གསུམ་བཏོན་ཡོད་པ་དེ་དག་ནི། དང་པོ་ཆོས་ཕྱོཌ་ཀྱི་དབུ་ཁྲིད་དེ་ད་ལྟ་འཚོ་ཞིང་གནས་དགོས་པ། ཆ་རྐྱེན་གཉིས་པ། དབུ་ཁྲིད་དེས་འཛམ་གླིང་ནང་ཆོས་ཕྱོགས་ཐད་ཁྱད་དུ་འཕགས་པའི་ལེགས་སྐྱེས་ཕུལ་བའམ་མཛད་རྗེས་བཞག་ཡོད་པ། ཆ་རྐྱེན་གསུམ་པ་དེ་ནི་རྒྱུན་དུ་མི་སྣ་དེ་དག་གྷུ་གལ་དྲ་རྒྱ་བརྒྱུད་འཚོལ་ཞིབ་བྱེད་སྐབས་ནེལ་སེན་དྲ་མཛོད་ནང་ཡོད་དགོས་པ་བཅས་ཡིན་འདུག ད་རེས་ཝ་ཊ་ཀིན་སི་དཔེ་མཛོད་ཁང་གིས་འཛམ་གླིང་ནང་གི་ཆོས་ཕྱོགས་ཀྱི་རླབས་ཆེན་དབུ་ཁྲིད་གྲངས་ ༡༠༠ ཡི་མཚན་གཞུང་འདོན་སྤེལ་ཞུས་པའི་ཁོངས་སུ་ཨང་དང་པོ་དེ་ནི་ཇར་མ་ནིའི་ནང་འཁྲུངས་པའི་རྩོམ་པ་པོ་དང་ཆོས་ཕྱོགས་ཀྱི་འགོ་ཁྲིད་ཨེ་ཀཏ་ཊོ་ལེ་ཞུ་བ་དང་། ཨང་གཉིས་པ་སྤྱི་ནོར་༸གོང་ས་སྐྱབས་མགོན་ཆེན་པོ་མཆོག ཨང་གསུམ་པ་རྩོམ་པ་པོ་གྲགས་ཅན་ཝེན་ཌ་ཡར་ཡིན་པ་དང་། དེ་བཞིན་དུ་ཨ་རིའི་ནང་འཁྲུངས་པའི་ནང་པའི་བཙུན་མ་པདྨ་ཆོས་སྒྲོན་ལགས་ཨང་གྲངས་ ༣༩ དང་བསོད་རྒྱལ་རིན་པོ་ཆེ་ཨང་གྲངས་ ༨༢ བཅས་ཡིན་པའི་མཚན་གཞུང་ཡང་རིམ་བཞིན་འདོན་སྤེལ་ཞུས་འདུག
