༢༠༡༡ ཟླ་ ༤ ཚེས་ ༤ རེས་གཟའ་ཟླ་བ།
༄༅། འདི་གར་ཁུངས་སྡན་གནས་ཚུལ་འབྱོར་གསལ་ལྟར་ན། ཕྱི་ལོ་ ༢༠༡༡ ཟླ་ ༤ ཚེས་ ༡ ཉིན་བོད་མི་ཉིས་བརྒྱ་ལྷག་གིས་ཡུལ་ཤུལ་གྲོང་ཁྱེར་དུ་འདུ་འཛོམས་ཀྱིས་ རང་གི་ས་ཆ་རང་ལ་བདག་དབང་དགོས་སོགས་བྲིས་པའི་འབོད་ཚིག་ཕྲེད་དར་འཁྱེར་ཏེ་རྒྱ་ནག་གཞུང་ལ་ངོ་རྒོལ་བྱས་པའི་གནས་ཚུལ་ཐོན་འདུག ངོ་རྒོལ་བྱེད་མཁན་དེ་དག་གིས་ཚེས་ ༡ ནས་ཚེས་ ༣ བར་མུ་མཐུད་ངོ་རྒོལ་བྱས་འདུག དེ་ཡང་ངོ་རྒོལ་བྱེད་དགོས་པའི་རྒྱུ་མཚན་གཙོ་བོ་ནི། ཕྱི་ལོ་ ༢༠༡༠ ཟླ་ ༤ ཚེས་ ༡༤ ཉིན་ས་ཁུལ་དེར་ས་ཡོམ་གྱི་གོད་ཆགས་ཚབས་ཆེ་བྱུང་རྗེས་རྒྱ་ནག་གཞུང་ནས་གྲོང་ཁྱེར་བསྐྱར་སྐྲུན་དང་།
ལྷག་པར་བོད་རིགས་མང་ཚོགས་ཀྱི་སྡོད་ཁང་གསར་རྒྱག་གི་ལས་འཆར་ཐད་ས་ཆའི་བདག་དབང་དང་བགོས་འགྲེམས་བྱེད་ཕྱོགས་ལ་དྲང་བདེན་ཡོང་གི་མེད་པའི་བསམ་ཚུལ་ཤུགས་ཆེ་ཡོད་པར་བརྟེན་ནས་བྱུང་བ་ཞིག་ཡིན་པ་མ་ཟད། ས་གནས་བོད་རིགས་མང་ཚོགས་ཀྱི་ས་བབ་ལེགས་པའི་ས་ཆ་རྣམས་རྒྱ་ནག་གཞུང་ཕྱོགས་ནས་བདག་བཟུང་བྱས་པར་མང་ཚོགས་ཁྲོད་བློ་ཁ་མ་ཁེངས་པའི་བསམ་ཚུལ་ཤུགས་ཆེ་བྱུང་དང་འབྱུང་མུས་སོགས་ཡིན་འདུག
ངོ་རྒོལ་བྱུང་རྗེས་ཟླ་ ༤ ཚེས་ ༡ ནས་འགོ་བཙུགས་ཏེ་དྲག་ཆས་ཉེན་རྟོག་པ་དང་སྤྱི་བདེ་མི་སྣ་ཁྱོན་ཆེ་ས་གནས་སུ་འབྱོར་ཡོད་ཅིང་། འགྲུལ་བཞུད་དམ་བསྒྲགས་ཤུགས་ཆེ་བྱས་པ་མ་ཟད། ཞི་བའི་ངོ་རྒོལ་བའི་ཐོག་དྲག་གནོན་བྱས་ཏེ་ཁ་ཤས་དྲན་པ་འཐོར་བ་དང་ཁ་ཤས་ལ་རྨས་སྐྱོན་ཚབས་ཆེ་ཕོག་ཡོད་པ་རེད།
ཕྱི་ཟླ་ ༤ ཚེས་ ༣ ཉིན་ངོ་རྒོལ་ལས་འགུལ་གྱི་སྣེ་འཁྲིད་མཁན་ཡིན་པར་དོགས་གཞི་བྱས་ཏེ་བོད་རིགས་ཚོང་པ་ཀརྨ་ཞེས་པ་གཅིག་དང་། བཙུན་མ་ཞིག་འཛིན་བཟུང་བཀག་ཉར་བྱས་པའི་གནས་ཚུལ་ཐོན་འདུག
དེ་བཞིན་ས་གནས་སུ་འབྱོར་བའི་དམག་མི་དེ་དག་གིས་་ཕྱི་ཟླ་ ༤ ཚེས་ ༣ དགོང་མོའི་ཆུ་ཚོད་ ༡༡ གོང་ཞི་བའི་ལས་འགུལ་སྤེལ་ཡུལ་དུ་ཡོད་པའི་ཁྲག་ཤུལ་སོགས་ཚང་མ་གཙང་བཟོ་བྱས་ཏེ་ཞི་བའི་ངོ་རྒོལ་བར་དྲག་གནོན་བྱས་པའི་དཔང་རྟགས་མེད་པ་བཟོ་ཐབས་བྱས་ཡོད་འདུག་ལ། ད་བར་འདས་གྲོངས་སུ་གྱུར་་བའི་གནས་ཚུལ་གང་ཡང་ཤེས་རྟོགས་བྱུང་མེད།།
