༢༠༡༡ ཟླ་ ༤ ཚེས་ ༡ རེས་གཟའ་པ་སངས།
༄༅། །ཕྱི་ལོ་ ༢༠༡༡ ཟླ་ ༣ ཚེས་ ༢༨ རེས་གཟའ་ཟླ་བའི་ཉིན་ཕྱི་དྲིལ་འགྲེམས་སྟོན་ཚན་པས་རྒྱ་གར་བྱང་ཤར་བསྟན་འཛིན་སྒང་ས་གནས་བོད་མི་རྒན་གཞོན་དང་སློབ་ཕྲུག་རྣམས་ལ་བོད་མི་རྣམས་བཙན་བྱོལ་དུ་འབྱོར་ནས་མི་ལོ་ལྔ་བཅུ་འཁོར་བའི་དྲན་རྟེན་གྱི་པར་རིགས་འགྲེམས་སྟོན་གནང་ཡོད། དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩།༣༠ ཙམ་ལ་བསྟན་སྒང་ས་གནས་གྲོས་ཚོགས་ཀྱི་ཚོགས་གཙོ་སྐུ་ཞབས་ཉི་མ་རྡོ་རྗེ་ལགས་ཀྱིས་འགྲེམས་སྟོན་དབུ་འབྱེད་གནང་།  དེ་རྗེས་ཕྱི་དྲིལ་འགྲེམས་སྟོན་ཚན་པའི་འགན་འཛིན་སྐུ་ཞབས་བཀྲིས་ཕུན་ཚོགས་ལགས་ཀྱིས་འགྲེམས་སྟོན་གྱི་ལས་གཞི་ངོ་སྤྲོད་རྣམས་མང་ཚོགས་ལ་གསལ་བཤད་ཞིབ་ཕྲ་གནང་བསྟུན།

རིམ་པས་རྒྱུད་སྟོད་དགོན་པའི་དགེ་འདུན་པ་དང་དབུས་བོད་གཞུང་སློབ་གྲྭའི་སློབ་ཕྲུག  གཞན་ཡང་ས་གནས་བོད་མི་བཅས་ཁྱོན་མི་གྲངས་ ༥༠༠  ཙམ་འདུ་འཛོམས་བྱུང་བ་རྣམས་ཀྱིས་པར་རིགས་ལ་དོ་སྣང་ཆེན་པོ་བྱས་ཡོད་པ་མ་ཟད།  བོད་དོན་དང་འབྲེལ་བའི་གློག་བརྙན་རྣམས་ཀྱང་བལྟས་ཡོད་འདུག  དེ་བཞིན་སང་ཉིན་རྟ་དབང་ཁུལ་དུ་འགྲེམས་སྟོན་གནང་འཆར་ཡོད་འདུག་པ་བཅས།།