༢༠༡༡ ཟླ་ ༣ ཚེས་ ༣༠ རེས་གཟའ་ལྷག་པ།
༅༅།ཕྱི་ལོ་ ༢༠༡༡ ཟླ་ ༣ ཚེས་ ༢༩ ཉིན་འདི་གར་ཁུངས་ལྡན་གྱི་གནས་ཚུལ་ངོ་སྤྲོད་གནང་བ་ལྟར། རྔ་པ་ཀིརྟི་དགོན་པའི་དགེ་འདུན་པ་ཕུན་ཚོགས་ལགས་བོད་བསྟན་པ་ཆབ་སྲིད་དོན་དུ་རང་ལུས་མེ་སྲེག་བཏང་བའི་རྗེས་ཕྱི་ཚེས་ ༡༧ ནས་རྔ་པ་འབར་ཁམས་སློབ་གྲྭའི་སློབ་ཕྲུག་རྣམས་ཀྱི་ཟས་བཅད་ངོ་རྒོལ་གྱི་ལས་འགུལ་ཞིག་འགོ་འཛུགས་བྱས་པར་བརྟེན་སློབ་གྲྭའི་ནང་འགྲོ་སྐྱོད་ལ་བཀག་སྡོམ་དང་། སློབ་ཕྲུག་རྣམས་ཀྱི་ལག་ཐོགས་ཁ་པར་ཚང་མ་བཙན་འཕྲོག་གི་ད་ལྟ་བར་ཅི་བྱས་ཀྱི་ཞིབ་ཕྲའི་གནས་ཚུལ་ཤེས་རྟོགས་དཀའ་བ་དང་། ཕྱི་ཚེས་ ༢༢ ཉིན་རྒྱལ་གཅེས་དགེ་འདུན་པ་ཕུན་ཚོགས་ཀྱི་སྤུན་གྲྭ་བློ་བཟང་སྐལ་བཟང་དང་། དགེ་རྒན་གཅིག་པ་ཡིན་པའི་དགེ་འདུན་པ་བློ་བཟང་བརྩོན་འགྲུས། དགེ་འདུན་པ་བསམ་གྲུབ་བཅས་དགེ་འདུན་ཕུན་ཚོགས་ཀྱིས་རང་ལུས་མེ་སྲེག་བཏང་བའི་དོན་རྐྱེན་དང་འབྲེལ་བ་ཡོད་པའི་དྭོགས་གཞིའི་འོག་འཛིན་བཟུང་བྱས་འདུག དེ་བཞིན་རྔ་པ་རྫོང་ཁུལ་དུ་ཕྱི་ཚེས་ ༢༠ ཉིན་བཙན་བྱོལ་ནང་བཀའ་སྤྱི་གཉིས་ཀྱི་རྒྱལ་ཡོངས་འོས་བསྡུ་ཆེན་མོའི་དུས་ཚོད་འཁེལ་བ་དང་སྟབས་བསྟུན་མི་མང་ཧ་ཅང་མང་པོས་དགའ་སྟོན་རྟེན་འབྲེལ་བྱེད་རྒྱུའི་གྲ་སྒྲིག་ཡོད་པར་བརྟེན། མཚན་གུང་ནས་རྔ་པ་རྫོང་ཐོག་གི་ས་གནས་གང་སར་རྒྱ་དམག་འབོར་ཆེན་འགྲེམས་འཇོག་གི་གྲོང་སྡེ་དང་ལས་ཁུངས་སོ་སོའི་འགོ་ཁྲིད་རྣམས་ལ་དེ་ཉིན་མི་རྣམས་ཕྱི་ལ་ཐོན་པ་དང་། ལས་བྱེད་རྣམས་ལས་གནས་ལས་ཁ་བྲལ་ཏེ་དགའ་སྟོན་གྱི་རྣམ་པ་སྟོན་མི་ཆོག་པའི་བཙན་བཀའ་བཏང་ཡོད་ཀྱང། མི་མང་རྣམས་ཀྱིས་ཐོག་མའི་གྲ་སྒྲིག་ལྟར་འདུ་འཛོམས་དགའ་སྟོན་རྟེན་འབྲེལ་མཚོན་པ་བྱེད་རྒྱུ་བྱུང་མེད་ཀྱང་། སོ་སོའི་ནང་གི་རྟེན་གྱི་མདུན་དུ་མཆོད་པ་ཕུལ་ཏེ་བཀའ་ཁྲི་དང་སྤྱི་འཐུས་འོས་མི་བོད་ཀྱི་བསྟན་སྲིད་དང་༸གོང་ས་མཆོག་གི་དགོངས་བཞེད་ལྟར་སྒྲུབ་ཐུབ་མཁན་གྱི་མི་ཤ་སྟག་ཡོང་བའི་རེ་བ་དང་སྨོན་ལམ་བསྐྱོན་འདུག ཕྱི་ཚེས་ ༢༧ ཉིན་ནས་རྔ་པ་ཀིརྟི་དགོན་དུ་རྒྱལ་གཅེས་ཆོས་གཅེས་ཟེར་བའི་ལས་འགུལ་འགོ་འཛུགས་བྱས་ཏེ་རྒྱུན་གཏན་གྱི་དགོན་པའི་ཆོས་ལུགས་བྱེད་སྒོ་ཁག་ལ་བཀག་སྡོམ་ནན་པོ་བྱེད་བཞིན་ཡོད་སོགས་ཀྱི་འགྲེལ་བརྗོད་གནང་བ་བཅས།