༢༠༡༨ ཟླ་ ༡༢ ཚེས་ ༡ རེས་གཟའ་སྤེན་པ།
༄༅། །སུད་སི་རྒྱལ་ས་ཇི་ནི་ཝར་རྟེན་གཞི་བྱས་པའི་འཛམ་གླིང་མཉམ་སྦྲེལ་རྒྱལ་ཚོགས་ཀྱི་གྲངས་ཉུང་མི་རིགས་ཐོབ་ཐང་ཞུ་གཏུག་ལྷན་ཚོགས་ཐེངས་ ༡༡ མཇུག་སྒྲིལ་བ་དང་། ལྷན་ཚོགས་ཐོག་སུད་སི་སྐུ་ཚབ་དོན་ཁང་གི་འབྲེལ་ཡོད་ལས་བྱེད་སྐལ་ལྡན་མཚོ་མོ་ལགས་ཀྱིས་བོད་ཀྱི་གནས་སྟངས་གསལ་འདོན་གནང་དོན། “ལོ་ངོ་དྲུག་ཅུའི་གོང་བོད་མི་སྟོང་ཕྲག་མང་པོ་རྒྱ་གར་དང་བལ་ཡུལ་ནང་བྲོས་བྱོལ་དུ་ཕེབས་དགོས་བྱུང་ཡོད། རྒྱ་གར་གཞུང་གི་མཐུན་འགྱུར་རོགས་རམ་འོག་རྒྱ་གར་ནང་གི་བོད་མི་རྣམས་ཀྱི་གནས་སྟངས་ཡག་པོ་ཡོད་ཀྱང་བལ་ཡུལ་ནང་གི་བོད་མི་རྣམས་དཀའ་ངལ་འོག་གནས་ཡོད། བལ་ཡུལ་ནང་སྐྱེས་པའི་བོད་མིས་གཙོས་དེ་སྔ་བྲོས་བྱོལ་དུ་ཕེབས་ནས་ཡུལ་དེར་ལོ་ངོ་བཅུ་ཕྲག་རིང་གནས་བཞིན་པའི་བོད་མི་དེ་དག་ལ་ངོ་སྤྲོད་ལག་འཁྱེར་མ་སྤྲད་པ་མ་ཟད། བོད་མི་དེ་དག་ལ་བལ་གཞུང་གིས་ཡང་ཡང་སུན་གཙེར་བཟོ་བ་དང་། སྐབས་རེ་འཛིན་བཟུང་བཀག་ཉར་བྱས་པ་ཙམ་མ་ཟད། རྒྱལ་ཁབ་ནས་ཕྱིར་འབུད་བཏང་བ་སོགས་དཀའ་ངལ་ཧ་ཅང་ཆེན་པོ་འཕྲད་བཞིན་ཡོད། དེར་བརྟེན་ངས་བོད་མི་དེ་དག་གི་ཚབ་ཞུས་ནས་བལ་པོའི་གཞུང་ལ་བོད་མི་དེ་དག་ལ་དབྱེ་བ་མེད་པར་དགོས་ངེས་མི་སེར་ལག་འཁྱེར་གནང་རོགས། ཞེས་འབོད་སྐུལ་ཤུགས་ཆེ་གནང་ཡོད་པ་མ་ཟད། གོ་སྐབས་དང་བསྟུན་རྒྱ་ནག་གཞུང་ལའང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཚབ་དང་ལྷན་བོད་ཀྱི་གནད་དོན་གསལ་ཆེད་འབྲེལ་མོལ་བསྐྱར་གསོ་དགོས་པའི་རེ་འདུན་ཤུགས་ཆེ་ཡང་བཏོན་འདུག
ལྷན་ཚོགས་ཐོག་རྒྱ་ནག་གི་སྐུ་ཚབ་དེས་ “ང་ཚོས་བསམ་ཚུལ་དེར་མཐའ་ཅིག་ཏུ་ངོས་ལེན་མེད། ཁོང་ཚོས་བོད་ནང་གི་འགྲོ་བ་མིའི་ཐོབ་ཐང་གནས་སྟངས་དང་སྤྱི་ཚོགས་བརྟན་ལྷིང་ཡར་རྒྱས་ཧ་ཅང་བཏང་ཡོད་པ་དེར་བརྩི་མེད་རྡོག་རོལ་གཏོང་བཞིན་ཡོད། དེར་བརྟེན་བསམ་ཚུལ་དེ་དག་དགོས་མེད་ཙམ་མ་ཟད། མ་ཉེས་ཁ་གཡོག་བྱས་པ་ཞིག་ཀྱང་རེད། དེར་བརྟེན་འདིར་གཏམ་བཤད་བྱེད་མཁན་དེའི་ཀུན་སློང་གཙོ་བོ་ཆབ་སྲིད་ཀྱི་དམིགས་ཡུལ་ངན་པ་བསྒྲུབ་ཐབས་ཆེད་འབད་བརྩོན་བྱས་པ་ཞིག་རེད། བོད་མི་དེ་དག་གིས་ཀྲུང་གོ་ཁ་བྲལ་གཏོང་ཐབས་བྱེད་བཞིན་ཡོད།” ཅེས་བཤད།
འཛམ་གླིང་མཉམ་སྦྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་གིས་བཏོན་པའི་སྙན་ཐོའི་ནང་གསལ་ལྟར་ན། ༢༠༡༧ ལོ་བར་རྒྱལ་ཁབ་ཀྱི་ངོས་འཛིན་མ་ཐོབ་པའི་འཛམ་གླིང་མི་འབོར་བརྒྱ་ཆ་ ༧༥ གྲངས་ཉུང་མི་རིགས་ཡིན་འདུག
འཛམ་གླིང་མཉམ་སྦྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་གིས་༢༠༡༤ ལོར་ “IBelong” ཞེས་པའི་ལས་འགུལ་དེ་གསར་གཏོད་གནང་བ་དང་། དེའི་དམིགས་ཡུལ་གཙོ་བོ་ནི། ༢༠༢༤ ལོ་བར་རྒྱལ་ཁབ་མེད་མཁན་སུ་གཅིག་མ་ལྷག་པ་བྱ་རྒྱུ་ཡིན་འདུག སྐབས་དེར་དོན་ཁང་གི་ལས་བྱེད་དཀོན་མཆོག་སྒྲོལ་མ་ལགས་ཀྱང་ཕེབས་འདུག་པ་བཅས།།
