༢༠༡༨ ཟླ་ ༡༡ ཚེས་ ༢༩ རེས་གཟའ་ཕུར་བུ།
༄༅། །འདི་གར་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་སྐུ་ཞབས་མེ་ཐིའུ་མེ་ཁ་ཆི་Matteo Mecacciལགས་ཀྱིས་བཏང་གནས་ནང་འཁོད་དོན། ཕྱི་ལོ་ ༢༠༡༨ ཟླ་ ༡༡ ཚེས་ ༢༨ ཉིན་ཨ་རིའི་གྲོས་ཚོགས་གོང་མའི་ཕྱི་འབྲེལ་ལས་དོན་ལྷན་ཁང་ United States Senate Foreign Relations Committee གིས་བོད་ནང་འགྲོ་འོང་གི་ཐོབ་ཐང་དགོས་པའི་གྲོས་ཆོད་ལ་རྒྱབ་སྐྱོར་གནང་འདུག སྤྱིར་གྲོས་ཆོད་དེ་བཞིན་འདི་ལོའི་ཕྱི་ཟླ་ ༩ ནང་ཨ་རིའི་གྲོས་ཚོགས་འོག་མའི་ནང་རྒྱབ་སྐྱོར་ཐོབ་ཟིན།
དེ་ཡང་གྲོས་ཆོད་དེའི་དགོས་དམིགས་གཙོ་བོ་ནི། རྒྱ་ནག་གཞུང་གིས་བོད་ནང་ཨ་རིས་གཙོས་ཕྱི་རྒྱལ་མི་སྣ་འགྲོ་འོང་བྱ་རྒྱུར་དམ་དྲག་བྱས་པ་བརྒྱུད་བོད་མི་རྣམས་ཀྱི་དངོས་ཡོད་གནས་སྟངས་ཇི་ཡིན་འཛམ་གླིང་ཕྱིས་ཤེས་རྟོགས་མེད་པ་བཟོ་ཐབས་བྱེད་བཞིན་པའི་སྲིད་བྱུས་དེར་དམིགས་པ་ཞིག་ཡིན་འདུག དེར་བརྟེན་གྲོས་ཆོད་དེས་བོད་ནང་ཕྱི་རྒྱལ་གཞུང་འབྲེལ་མི་སྣ་དང་རང་དབང་ཅན་གྱི་གསར་འགོད་པ། ཡུལ་སྐོར་སྤྲོ་འཆམ་པ་སོགས་ལ་འགྲོ་འོང་བྱ་རྒྱུའི་ཐོབ་ཐང་དགོས་པའི་དགོས་འདུན་འདོན་བཞིན་ཡོད། རྒྱ་མི་རིགས་སུ་འདྲ་ཞིག་ཨ་རིའི་ས་གནས་གང་དུ་རང་དབང་ཐོག་ནས་འགྲོ་བསྐྱོད་བྱ་རྒྱུའི་ཐོབ་ཐང་ཡོད་པ་ལྟར་ཨ་རིའི་མི་སེར་སུ་འདྲ་ཞིག་ཡིན་ཕྱིན་བོད་ཀྱིས་གཙོས་རྒྱ་ནག་གི་ས་གནས་གང་འདྲ་ཞིག་ནང་དམ་དྲག་རྩ་བ་ནས་མེད་པར་རང་དབང་ལྡན་པའི་ཐོག་ནས་འགྲོ་འོང་བྱ་རྒྱུའི་ཐོབ་ཐང་གཅིག་མཚུངས་སུ་དགོས་པའི་ཆ་རྐྱེན་བཏོན་ཡོད།
དེ་ཡང་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་སྐུ་ཞབས་མེ་ཐིའུ་མེ་ཁ་ཆི་Matteo Mecacciལགས་ཀྱིས་གསུང་དོན། “དེ་རིང་ཨ་རིའི་གྲོས་ཚོགས་གོང་མའི་ཕྱི་འབྲེལ་ལས་དོན་ལྷན་ཁང་གིས་སྤྱི་མོས་ཐོག་ནས་གྲོས་ཆོད་དེར་རྒྱབ་སྐྱོར་གནང་བ་དེས་ཨ་རིའི་མི་མང་ཚོས་བོད་ནང་གི་བོད་མི་ཚོའི་གནས་སྟངས་དང་། ཨ་རིའི་མི་སེར་ལ་རྒྱ་ནག་གཞུང་གིས་བོད་ནང་རང་དབང་ཐོག་ནས་འགྲོ་འོང་བྱ་རྒྱུའི་ཐོབ་ཐང་མ་སྤྲད་པ་དེར་སེམས་འཚབ་ཇི་ཡོད་གསལ་འདོན་གནང་ཡོད།
ང་ཚོས་གྲོས་ཆོད་ཐོག་མར་འདོན་གནང་མཁན་གྲོས་ཚོགས་གོང་མའི་འཐུས་མི་མར་ཀོ་རུ་བྷི་འོ་Sen. Rubioམཆོག་དང་། ཨ་རིའི་གྲོས་ཚོགས་གོང་མའི་ཕྱི་འབྲེལ་ལས་དོན་ལྷན་ཁང་གི་ཚོགས་གཙོ་གྲོས་ཚོགས་འཐུས་མི་སྐུ་ཞབས་ཀུར་ཀར་མཆོག་དང་། གྲོས་ཚོགས་གོང་མའི་འཐུས་མི་མི་ནེན་ཌེ་ཛི་Sen. Menendezམཆོག་རྣམ་གཉིས་ལ་གོ་སྐབས་དང་བསྟུན་སྙིང་ཐག་པ་ནས་ཐུགས་རྗེ་ཆེ་ཞུ་བཞིན་ཡོད།
གྲོས་ཆོད་དེའི་ནང་ཨ་རིའི་མི་སེར་ཡིན་པའི་བོད་མི་རྣམས་བོད་ནང་དུ་རང་གི་གཉེན་ཉེ་དང་གནས་མཇལ་སོགས་འགྲོ་རྒྱུར་ཨ་རིར་རྟེན་གཞི་བྱས་པའི་རྒྱ་ནག་གཞུང་ཚབ་ཁང་དུ་མཐོང་མཆན་ཞུ་བར་འགྲོ་སྐབས་བོད་མི་རིགས་ཡིན་པའི་རྒྱུ་མཚན་དུ་བྱས་ནས་དབྱེ་འབྱེད་བྱེད་བཞིན་པའི་གནས་སྟངས་སྐོར་འཁོད་འདུག དབྱེ་འབྱེད་བྱེད་མཁན་རྒྱ་ནག་གཞུང་ཚབ་ཁང་གི་ལས་བྱེད་སུ་ཡིན་ངོས་འཛིན་བྱས་ཏེ་ཨ་རིའི་ཕྱི་སྲིད་དྲུང་ཆེས་གྲོས་ཚོགས་ནང་སྙན་སེང་ཞུས་པ་བརྒྱུད་ཇི་སྲིད་ཨར་རྒྱ་ཡུལ་གཉིས་ཀྱི་ཆབ་སྲིད་ལ་འགྱུར་བ་མ་ཕྱིན་བར་དེ་སྲིད་དུ་རྒྱ་ནག་གཞུང་ཚབ་ཁང་གི་ལས་བྱེད་དེ་དག་སླད་ཕྱིན་ཨ་རིའི་ནང་འགྲོ་རྒྱུར་མཐོང་མཆན་ལ་དམ་དྲག་བྱེད་དགོས་པའི་རེ་འདུན་འདོན་རྒྱུ་ཡིན་འདུག
བར་ལམ་ལོ་ཤས་རིང་ནས་ཨ་རིའི་མང་གཙོ་དང་སྤྱི་མཐུན་ཚོགས་པ་གཉིས་ཀས། རྒྱ་ནག་གཞུང་ལ་ཨ་རིས་ཚོང་དོན་ཙམ་མ་ཟད། རྒྱ་མི་རིགས་སུ་འདྲ་ཞིག་ཡིན་རུང་ཨ་རིའི་ནང་རང་དབང་ཐོག་འགྲོ་འོང་བྱེད་ཆོག་པ་ལྟར་རྒྱ་ནག་གཞུང་ནས་ཀྱང་དེ་མཚུངས་ཨ་རིའི་གསར་འགོད་པ་དང་ཡུལ་སྐོར་སྤྲོ་འཆམ་པ། གཞུང་འབྲེལ་མི་སྣ་སོགས་ལ་བོད་དང་རྒྱ་ནག་ནང་དུ་རང་དབང་ཐོག་ནས་འགྲོ་འོང་གི་ཐོབ་སྤྲོད་དགོས་པའི་ཚོར་སྣང་དྲག་པོ་ཞིག་བསླེབས་ཏེ་གྲོས་ཆོད་དེར་རྒྱབ་སྐྱོར་ཤུགས་ཆེ་ཐོབ་པ་ཞིག་ཡིན་འདུག
འདས་པའི་ལོ་ཤས་གོང་ནས་ཨ་རིའི་མི་སེར་ཡིན་པའི་བོད་མིས་གཙོས་ཨ་རིའི་ནང་གི་བོད་དོན་རྒྱབ་སྐྱོར་བ་བཅས་ཀྱིས་ས་གནས་སོ་སོའི་འབྲེལ་ཡོད་གྲོས་ཚོགས་གོང་འོག་གི་འཐུས་མི་རྣམས་ཆེད་མངགས་མཇལ་འཕྲད་ཞུས་ནས་བོད་ནང་འགྲོ་འོང་གི་ཐོབ་ཐང་དགོས་པའི་གྲོས་ཆོད་ལ་རྒྱབ་སྐྱོར་གནང་དགོས་པའི་འབོད་སྐུལ་ཤུགས་ཆེ་ཞུས་ཡོད་འདུག རིང་མིན་ཨ་རིའི་གྲོས་ཚོགས་གོང་མའི་ནང་གྲོས་ཆོད་དེའི་ཐོག་གླེང་སློང་གནང་རྗེས་ལངས་ཕྱོགས་ཇི་འདྲ་འཛིན་རྒྱུའི་ཐད་ཐག་གཅོད་གནང་འཆར་ཡོད་འདུག
