ཕྱི་ལོ་ ༢༠༡༨ ཟླ་ ༡༡ ཚེས་ ༡༥ རེས་གཟའ་ཕུར་བུ།
༄༅། །ཕྱི་ལོ་ ༢༠༡༨ ཟླ་ ༡༡ ཚེས་ ༡༥ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཉི་ཧོང་གི་ཡོ་ཀོ་ཧ་མ་(Yokohama)གྲོང་ཁྱེར་དུ་ཡོ་ཀོ་ཧ་མ་རྒྱལ་ཡོངས་ཚོགས་ཁང་ (National Convention Hall of Yokohama) དུ་སྤྱན་རས་གཟིགས་ཕྱག་སྟོང་སྤྱན་སྟོང་གི་བཀའ་དབང་བཀའ་དྲིན་མ་སྩལ་གོང་སྔོན་འགྲོའི་ཚུལ་དུ་བཀའ་སློབ་སྩལ་དོན།
དེ་རིང་ཐུགས་རྗེ་ཆེན་པོའི་དབང་ཆེན་བྱེད་རྒྱུ་དང་། དེ་རིང་འབུལ་རྒྱུའི་ཐུགས་རྗེ་ཆེན་པོ་ནི། སྤྱིར་སངས་རྒྱས་བཅོམ་ལྡན་འདས་ཀྱི་གསུང་པའི་ཆོས་ལ་ངོས་ཀྱི་ནམ་རྒྱུན་བསྟན་པ་སྤྱི་བཙན་དང་གང་ཟག་སྒོས་བཙན་ཞེས་བཤད་ཀྱི་ཡོད། ཐ་སྙད་འདི་བོད་ཀྱི་མཁས་པ་གཉེན་མགོན་གསུང་རབ་པ་ཞེས་ཧ་ཅང་མཁས་པ་ཆེན་པོ་ཞིག་བྱུང་ཡོད། ཁོང་གིས་བསྟན་པ་སྤྱི་བཙན་དང་གང་ཟག་སྒོས་བཙན་ཞེས་པའི་ཐ་སྙད་འདི་གསུང་གི་འདུག ངོས་ཀྱིས་གོ་བ་འདི་རྒྱ་ཆེ་རུ་བཏང་ནས་མདོ་ཕྱོགས་ཀྱི་ལམ་དཔེར་ན་འཁོར་ལོ་དང་པོ། འཁོར་ལོ་བར་པ། འཁོར་ལོ་མཐའ་མའམ་གསུམ་པ་བཅས་ཁ་སྔོན་རོབ་ཙམ་ཞུས་པ་དེ་རེད། གང་ལྟར་དེ་དག་བསྟན་པ་སྤྱིའི་དབང་དུ་བྱས་ནས་གསུང་གི་འདུག ཅེས་དང་། ཡང་མུ་མཐུད་བཀའ་སློབ་སྩལ་དོན།
དེ་རིང་གསང་སྔགས་ཀྱི་ཆོས་འཁོར་འདི་གང་ཟག་སྒོས་བཙན་ཆགས་ཡོད། དེ་ལ་སྔར་རྒྱ་གར་ལ་སྔ་འགྱུར་དང་གསར་མ་དེ་འདྲ་མེད། བོད་ལ་ལོ་ཆེན་རིན་ཆེན་བཟང་པོ་མ་བྱུང་གོང་དེ་དག་སྔ་འགྱུར་དང་། ལོ་ཆེན་རིན་ཆེན་བཟང་པོ་བྱུང་བའི་རྗེས་དེ་དག་གསར་མ་ཞེས་གསང་སྔགས་རྙིང་མ་དང་གསར་མ་ཞེས་གཉིས་བྱུང་འདུག དེ་རིང་ཐུགས་རྗེ་ཆེན་པོ་འཇིག་རྟེན་དབང་ཕྱུག་གི་དབང་ཞུ་རྒྱུ་འདི་གསང་སྔགས་རྙིང་མའི་ཕྱོགས་རེད། དེ་ལ་རིང་བརྒྱུད་བཀའ་མ་དང་ཉེ་བརྒྱུད་གཏེར་མ། ཤིན་ཏུ་ཟབ་པ་དག་སྣང་ཞེས་གསུམ་གསུང་གི་འདུག དེ་རིང་གི་ཆོས་འཁོར་འདི་དག་སྣང་གི་ཁོངས་རེད། དག་སྣང་འདི་ཡོང་ཁུངས་ནི་༸རྒྱལ་དབང་སྐུ་ཕྲེང་ལྔ་པ་ངག་དབང་བློ་བཟང་རྒྱ་མཚོ་མཆོག་རེད། ཁོང་ལ་ལྷག་པའི་ལྷ་མང་པོའི་ཞལ་གཟིགས་པའི་དག་སྣང་མང་པོ་ཞིག་ཡོང་བཞིན་འདུག
གང་ལྟར་༸གོང་ས་ལྔ་པ་ཆེན་པོ་ནས་གསང་བ་རྒྱ་ཅན་གྱི་ཆོས་འཁོར་འདི་༸རྒྱལ་བ་ལྔ་པའི་རྗེས་ཀྱི་༸རྒྱལ་དབང་སྐུ་ཕྲེང་རིམ་བྱོན་གྱིས་ཕ་ཆོས་ལྟ་བུ་ཆགས་ཡོད། ངོས་ཀྱིས་གསང་བ་རྒྱ་ཅན་གྱི་ཆོས་འཁོར་ཆ་ཚང་ཆུང་དུས་སྐབས་ནས་སྟག་བྲག་རིན་པོ་ཆེའི་སྐུ་མདུན་ནས་ལེགས་པར་ཐོབ་པ་རེད།
དེ་སྔ་འགོ་སྟོད་ལ་དཔེ་ཆ་མེད། ཕྱིས་སུ་ངོས་ལ་དཔེ་ཆ་དེ་ཐོབ་བྱུང་། གསང་བ་རྒྱ་ཅན་གྱི་དཔེ་ཆ་བྲིས་མ་མ་གཏོགས་མེད། གསང་བ་རྒྱ་ཅན་གྱི་གྱི་དཔེ་ཆ་དེ་དག་རིམ་པས་ངོས་ཀྱི་ལག་པར་སླེབས་པ་ནས་བཟུང་ཚེས་བཅུ་ནམ་ཡིན་ལ་འཇིག་རྟེན་དབང་ཕྱུག་ལྷ་སྐུའི་སྒོ་ནས་ཚེས་བཅུ་འདོན་བཞིན་ཡོད།
ལོ་ཀེ་ཤྭ་རི་འཇིག་རྟེན་དབང་ཕྱུག་དང་ཝ་ཏི་བཟང་པོའི་སྣང་བརྙན་དང་བཅས་ངོས་དང་ཐུན་མོང་མིན་པའི་འབྲེལ་བ་ཞིག་ཡོད། ཁྱེད་རང་ཚོ་ཁ་ཤས་ཀྱི་རྨོངས་དད་བྱེད་ནས་༸རྒྱལ་བ་རིན་པོ་ཆེ་འཕགས་པ་སྤྱན་རས་གཟིགས་རེད་ཟེར་བ་འདི་རྨོངས་དད་རེད། གང་ལྟར་ངོས་རང་སྤྱན་རས་གཟིགས་ཀྱི་མགྲོན་གཉེར་ལྟ་བུ་བྱེད་ཀྱི་ཡོད། འདི་ཕལ་ཆེར་ངོས་ཀྱིས་ཚོད་ཐིག་གི་འདུག སྤྱན་རས་གཟིགས་སྙིང་རྗེའི་བདག་ཉིད་རེད། སྙིང་རྗེ་ལྷ་མཆོག་རེད། ཡང་སྒོས་བོད་ཁ་བ་གངས་ཅན་གྱི་ལྷ་སྐལ་རེད། གོ་ཆོད་རུང་མ་ཆོད་རུང་ཕགས་པ་སྤྱན་རས་གཟིགས་ཀྱི་མགྲོན་གཉེར་དེ་ངོས་རང་ཡིན། ཞེས་ཞུ་གི་ཡོད། ངོས་རང་ཕར་ཚུར་འགྲོ་སྐབས་སུ་འཕགས་པ་སྤྱན་རས་གཟིགས་ལོ་ཀེ་ཤྭ་ར་ངོས་ཀྱི་མཇིང་པའི་སྟེང་ཡོད་བསམ་པ་དྲན་བཞིན་འདུག ཅེས་སོགས་ཀྱི་བཀའ་སློབ་སྩལ་རྗེས་ཆོས་འབྲེལ་དབུ་འཛུགས་མཛད། སྐབས་དེར་ཐོག་མར་ཆོས་ཞུ་བ་གྲངས་ ༥༠༠ བརྒལ་བར་དགེ་བསྙེན་གྱི་སྡོམ་པ་སྩལ་ཡོད་པ་བཅས།།
