༄༅། །བོད་རྒྱལ་ལོ་ ༢༡༤༥ རབ་གནས་ས་ཁྱི་ལོའི་སྨིན་དྲུག་ཟླ་བ་ ༡༠ ཚེས་ ༥ གཟའ་སྐར་དགེ་བའི་ཉིན་དང་། ཕྱི་ལོ་ ༢༠༡༨ ཟླ་ ༡༡ ཚེས་ ༡༢ རེས་གཟའ་ཟླ་བའི་ཉིན་ཀ་སྦུག་བརྩེ་ཆེན་འཕྲིན་ལས་དར་རྒྱས་གླིང་དགོན་པར་ས་སྐྱ་ཁྲི་འཛིན་ ༤༢ སྐྱབས་མགོན་༸གོང་མ་རཏྣ་བཛྲའམ་ངག་དབང་ཀུན་དགའ་བློ་གྲོས་དབང་ཕྱུག་རིན་ཆེན་འཇིགས་མེད་འཕྲིན་ལས་མཆོག་དགུང་གྲངས་ ༤༥ ཕེབས་པའི་༸སྐུའི་འཁྲུངས་སྐར་དུས་ཆེན་སྲུང་བརྩི་གཟབ་རྒྱས་ཞུས་ཡོད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༨།༣༠ ཐོག་སྐྱབས་མགོན་༸གོང་མ་དབུ་བཞུགས་ཐོག་འཆི་མེད་ཚེ་ལྷ་རྣམ་གསུམ་གྱི་ཆོ་ག་གསུང་འདོན་གནང་། 

དེ་ནས་ཆུ་ཚོད་ ༡༠ ཐོག་ས་སྐྱ་གོང་མ་ཁྲི་འཛིན་མཆོག་ལ་ཀ་སྦུག་ས་སྐྱ་བརྩེ་ཆེན་འཕྲིན་ལས་དར་རྒྱས་གླིང་དགོན་པ་དང་། ས་གནས་འཐུས་མི་རྣམས་ཀྱིས་མནྜལ་རྟེན་གསུམ་འདེགས་འབུལ་ཞུས་གྲུབ་མཚམས། མཛད་སྒོར་ཕེབས་པའི་སྐུ་མགྲོན་རྣམ་པ་དང་། སེར་སྐྱ་མི་མང་ཡོངས་ལ་རིམ་བཞིན་མཇལ་ཁ་དང་གོང་མ་མཆོག་གི་ཞབས་བརྟན་གསུང་འདོན་གནང་ཡོད།
དེ་རྗེས་སེར་སྐྱ་མི་མང་ཡོངས་ལ་རྟེན་འབྲེལ་མཚོན་སླད་གསོལ་ཇ་འབྲས་སིལ་འདེགས་འབུལ་ཞུས་གྲུབ་མཚམས། ཀ་སྦུག་ས་སྐྱ་དགོན་པའི་ས་པཎ་གཞི་རིམ་སློབ་གྲྭའི་སློབ་མ་རྣམས་ནས་སྐྱབས་མགོན་༸གོང་མ་མཆོག་གི་མཛད་རྣམ་མདོར་བསྡུས་ཤིག་སྙན་སྒྲོན་ཞུས་པ་དང་། ༸སྐྱབས་མགོན་གོང་མ་མཆོག་གིས་ས་པཎ་གཞི་རིམ་སློབ་གྲྭའི་ཕྱི་ལོ་ ༢༠༡༧ ལོའི་རྒྱུགས་སྤྲོད་ཀྱི་བྱ་དགའ་སྩལ་ཏེ་སེར་སྐྱ་མི་མང་ཡོངས་བཀའ་སློབ་སྩལ། 

ས་སྐྱ་ཁྲི་འཛིན་ ༤༢ སྐྱབས་མགོན་༸གོང་མ་རཏྣ་བཛྲའམ་ངག་དབང་ཀུན་དགའ་བློ་གྲོས་དབང་ཕྱུག་རིན་ཆེན་འཇིགས་མེད་འཕྲིན་ལས་མཆོག་ནི་ཕྱི་ལོ་ ༡༩༧༤ ཟླ་ ༡༡ ཚེས་༡༩ ཉིན་རྒྱ་གར་བྱང་ཕྱོགས་རྡེ་ར་རྡུན་དུ་སྐུ་འཁྲུངས་ཤིང་། སྐུ་ན་ཆུང་བའི་དུས་ནས་ཡབ་རྗེ་ས་སྐྱ་༸གོང་མ་ཁྲི་འཛིན་ ༤༡ པ་ཆེན་པོ་མཆོག་གི་དབུས་མཁས་གྲུབ་ཚད་ལྡན་བླ་མ་མང་པོའི་དྲུང་ནས་དབང་ལུང་མན་ངག་མང་པོ་གསན་བསམ་མཛད་པ་མ་ཟད།

ཕྱི་ལོ་ ༡༩༩༠ ལོར་ས་སྐྱ་མཐོ་སློབ་དུ་སློབ་ཞུགས་གནང་སྟེ་མཁན་ཆེན་ལེགས་བཤད་ཀུན་དགའི་དྲུང་ནས་བཀའ་པོད་ལྔའམ་གཞུང་ཆེན་བཅུ་གསུམ། གྲགས་ཆེན་བཅོ་བརྒྱད་བཅས་གསན་བསམ་རྒྱ་ཆེ་མཛད། ཕྱི་ལོ་ ༡༩༩༨ ལོར་གཞུང་ལུགས་རབ་འབྱམས་ལ་མཁས་པའི་དབང་པོར་གྱུར་ནས་བཀའ་བཅུ་པའི་མཚན་གནས་ཀྱི་གཟེངས་བསྟོད་བཞེས་གནང་ཡོད།
ཕྱི་ལོ་ ༢༠༡༧ ཟླ་ ༣ ཚེས་ ༩ ཉིན་རྒྱ་གར་བྱང་ཕྱོགས་སྤུ་རུ་ཝ་ལ་དཔལ་ས་སྐྱའི་མ་དགོན་དུ། ས་སྐྱ་༸གོང་མ་རཏྣ་བཛྲ་རིན་པོ་ཆེ་མཆོག་ས་སྐྱའི་ཁྲི་འཛིན་ ༤༢ པའི་མཚན་གསོལ་དང་ཐུགས་འགན་བཞེས་གནང་ཡོད་པ་བཅས། །