ངོས་ཀྱི་གདོང་པར་ལྟོས་དང་། ཡང་སྲིད་འཚོལ་རྒྱུར་ད་ལྟ་ཛ་དྲག་འདུག་གམ།

གསར་ལས་ཁང་གི་གསར་འགོད་པས།

༢༠༡༨-༡༡-༡༣

ཕྱི་ལོ་ ༢༠༡༨ ཟླ་ ༡༡ ཚེས་ ༡༣ རེས་གཟའ་མིག་དམར།

༄༅། །བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ཟླ་ ༡༡ ཚེས་ ༡༣ ཉིན་ཉི་ཧོང་གི་གྲོང་ཁྱེར་ཡོ་ཀོ་ཧ་མར་རྟེན་གཞི་བྱས་པའི་རྒྱལ་སྤྱིའི་བརྙན་འཕྲིན་གསར་འགྱུར་ཚན་པ་གྲགས་ཅན་ NHK BS1 ཞེས་པའི་གསར་འགོད་པ་ལྕམ་རི་ན་ཡ་མ་ས་ཝ་ Ms. Rina Yamasawa ལགས་ཀྱིས་བཅར་འདྲི་དང་ལེན་མཛད་འདུག

དེ་ཡང་གསར་འགོད་པས་བོད་ནང་གི་གནས་སྟངས་སྐོར་བཀའ་འདྲི་ཞུས་པར་མགོན་པོ་གང་ཉིད་མཆོག་གིས་བཀའ་ལན་སྩལ་དོན། ངོས་རང་འཛམ་གླིང་འདིའི་སྟེང་མི་དུང་ཕྱུར་བདུན་ཅུ་ཡོད་པའི་ཁོངས་ནས་གཅིག་ཡིན། ང་ཚོས་སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ལྡན་པར་གྱུར་ཅིག་ཅེས་སྨོན་ལམ་རྒྱག་གི་ཡོད་ནའང་འཛམ་གླིང་འདིའི་སྟེང་གི་སྲོག་ཆགས་དུད་འགྲོ་བྱ་རི་དྭགས་དང་ཉ་སོགས་གྲངས་ལས་འདས་པ་དེ་དག་ལ་སྐད་ཡིག་མེད་སྟབས། སྨོན་ལམ་རྒྱག་རྒྱུ་ཙམ་མ་གཏོགས་ཐད་ཀར་འབྲེལ་བ་གང་ཡང་མེད། འོན་ཀྱང་ཕྲན་བུ་བྱེད་རྒྱུའི་གོ་སྐབས་ཡོད་པ་ནི། འཛམ་གླིང་འདིའི་སྟེང་གི་མི་དུང་ཕྱུར་བདུན་ཅུ་དེ་དག་རེད། དེང་སྐབས་ཕྱི་དངོས་པོ་ཡར་རྒྱས་ཧ་ཅང་ཕྱིན་པའི་དུས་སྐབས་འདིར་མང་པོ་ཞིག་གིས་ནང་སེམས་ཀྱི་རིན་ཐང་སྐོར་ཤེས་ཀྱི་མི་འདུག ངོས་ཀྱིས་ནང་སེམས་ཀྱི་ཞི་བདེ་བསྐྲུན་ཐབས་ཀྱི་ཐབས་ལམ་སྐོར་གང་ཐུབ་ཅི་ཐུབ་འབད་བརྩོན་བྱེད་བཞིན་ཡོད།

གཉིས་པ་ངོས་རང་ནང་པའི་དགེ་སློང་ཞིག་ཡིན་པར་བརྟེན་ཆོས་ཀྱི་མིང་ཐོག་ནས་རྙོག་གྲ་དེ་འདྲ་མཐོང་སྐབས་ཧ་ཅང་བློ་ཕམ་ཡོང་གི་འདུག རྒྱ་གར་ནང་ཆོས་ལུགས་མི་འདྲ་བ་མང་པོ་ཕན་ཚུན་འཆམ་མཐུན་ཐོག་མཉམ་གནས་བྱེད་ཐུབ་ཀྱི་ཡོད་སྟབས། ཆོས་ལུགས་མི་འདྲ་བ་དེ་དག་ཕན་ཚུན་འཆམ་མཐུན་ངང་གནས་ཐུབ་རྒྱུ་ཡིན་པ་ང་ཚོས་མཐོང་གི་འདུག

གསུམ་པ་ངོས་རང་བོད་མི་ཞིག་ཡིན། ཕྱི་ལོ་ ༢༠༡༡ ལོ་ནས་ངོས་ཀྱིས་བོད་མིའི་ཆབ་སྲིད་ཀྱི་འགོ་ཁྲིད་ལས་འགན་དེ་མཚམས་བཞག་ཟིན་པར་བརྟེན། ད་ཆ་ངོས་ཀྱིས་བོད་ཀྱི་ཁོར་ཡུག་སྲུང་སྐྱོབ་དགོས་པའི་གནས་སྟངས་ཐོག་ཤུགས་རྒྱག་བཞིན་ཡོད། ཕྱོགས་མཚུངས་བོད་ཀྱི་རིག་གཞུང་དང་ལྷར་པར་བོད་ལ་རྒྱ་གར་ནས་དར་བའི་ལེགས་བཤད་དེ་དག་སྲུང་སྐྱོབ་བྱ་རྒྱུ་གལ་ཆེན་པོ་རེད།

ཕྱི་ལོ་ ༡༩༧༤ ལོ་ནས་བཟུང་ང་ཚོས་བོད་རང་བཙན་མ་རྩོད་ཀྱི་མེད་པ་དང་། ང་ཚོས་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་འོག་ལ་སྡོད་རྒྱུའི་གྲ་སྒྲིག་བྱས་པ་ཡིན། དེ་ནི་གཉིས་སྨན་དབུ་མའི་ལམ་གྱི་སྲིད་བྱུས་རེད། འདས་པའི་ལོ་ངོ་ ༤༠ རིང་རྒྱ་ནག་ནང་འགྱུར་བ་ཧ་ཅང་ཕྱིན་ཡོད། དེང་སྐབས་རྒྱ་ནག་ནང་དུ་ནང་པ་ཧ་ལམ་ས་ཡ་གསུམ་བརྒྱ་ཙམ་ཡོད་པའི་ཁོངས་ནས་མང་པོ་ཞིག་གིས་བོད་བརྒྱུད་ནང་བསྟན་ལ་དོ་སྣང་བྱེད་ཀྱི་ཡོད། རྒྱ་ནག་གི་དཔོན་རིགས་མཁྲེགས་འཛིན་པ་ཚོས་འདས་པའི་མི་ལོ་ ༧༠ ཙམ་རིང་བོད་མིའི་ཐོག་དྲག་གནོན་ཅན་གྱི་སྲིད་ཇུས་བཟུང་བ་དེལམ་ལྷོངས་བྱུང་མེད་སྟབས། ད་ཆ་རྒྱ་ནག་གི་དཔོན་རིགས་མཁྲེགས་འཛིན་པ་ཚོས་ཅི་བྱ་གཏོལ་མེད་ཀྱི་ངང་གནས་ཡོད།

རྒྱ་ནག་གིས་ང་ཚོར་ཕྱི་དངོས་པོའི་འཛུགས་སྐྲུན་ཐོག་རོགས་རམ་བྱེད་ཐུབ་པ་དང་། ང་ཚོས་ཕར་རྒྱ་ནག་ལ་ནང་པའི་སེམས་ཁམས་རིག་པའི་ཐོག་ནས་རོགས་རམ་བྱེད་ཐུབ། དེར་བརྟེན་ང་ཚོའི་དབུ་མའི་ལམ་གྱི་སྲིད་བྱུས་ནི་གཉིས་སྨན་གྱི་ཐབས་ལམ་ཞིག་རེད། ངོས་རང་ཡུ་རོབ་སྤྱི་མཐུན་ཚོགས་པ་ལྟ་བུ་ལ་ཡིད་སྨོན་འཆོར་མཁན་ཞིག་ཡིན། ངོས་རང་གིས་མ་འོངས་པར་རྒྱ་གར་དང་། རྒྱ་ནག ཉི་ཧོང་དབར་ཡུ་རོབ་སྤྱི་མཐུན་ཚོགས་པ་ལྟ་བུ་འཛུགས་ཐུབ་ན་བསམ་གྱི་ཡོད།

དེ་ཡང་གསར་འགོད་པས་མགོན་པོ་གང་ཉིད་ཀྱི་༸སྐུའི་ཡང་སྲིད་སྐོར་གྱི་དྲི་བར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་ལན་སྩོལ་སྐབས་སྤྱན་ཤེལ་ཕུད་གནང་མཛད་ནས་”ངོས་ཀྱི་གདོང་པར་ལྟོས་དང་། ཡང་སྲིད་འཚོལ་རྒྱུར་ད་ལྟ་ཛ་དྲག་འདུག་གམ” ཞེས་བཀའ་ལན་མཛད་འདུག

ལྕམ་རི་ན་ཡ་མ་ས་ཝའི་ Ms. Rina Yamasawa བཅར་འདྲི་དང་ལེན་མཛད་སྐབས།

བཅར་འདྲི་ལས་རིམ་ཡོངས་སུ་གྲུབ་རྗེས་མགོན་པོ་གང་ཉིད་ནས་ཉི་ཧོང་གི་བརྙན་འཕྲིན་གསར་འགྱུར་ལས་རིམ་གཙོ་སྐྱོང་བ་དང་། རྩོམ་པ་པོ། ཉི་ཧོང་རྒྱལ་ཡོངས་བསམ་བློའི་སློབ་སྟོན་བསྟི་གནས་ཁང་ Japan Institute for National Fundamentals ཞེས་པའི་འགན་འཛིན་ལྕམ་སྐུ་ས་ཀུ་ར་ཡི་ཡོ་ཤི་ཀོ་ Ms.Sakurai Yoshiko ལགས་དང་མཇལ་འཕྲད་མཛད་རྗེས་བཅར་འདྲི་ཁག་གཅིག་དང་ལེན་མཛད་འདུག

ལྕམ་རི་ན་ཡ་མ་ས་ཝའི་ Ms. Rina Yamasawa བཅར་འདྲི་དང་ལེན་མཛད་སྐབས།

ཕྱི་ཚེས་ ༡༤ ཉིན་གྱི་སྔ་དྲོ་ཉི་ཧོང་དང་ཤར་ཨེ་ཤེ་ཡའི་སྐུ་ཚབ་དོན་གཅོད་ཁང་ནས་ཇི་ལྟར་གསོལ་འདེབས་ཞུས་དོན་ལྟར་བཀའ་བཞེས་བཟང་པོ་སྨིན་སྩལ་ཐོབ་སྟེ། ཡོ་ཀོ་ཧ་མ་རྒྱལ་ཡོངས་ཚོགས་ཁང་ National Convention Hall of Yokohama དུ་ཤེས་རབ་སྙིང་པོ་དང་། རྗེ་ཙོང་ཁ་པ་ཆེན་པོས་མཛད་པའི་རྟེན་འབྲེལ་བསྟོད་པ། སློབ་དཔོན་ཀ་མ་ལ་ཤཱི་ལས་མཛད་པའི་སྒོམ་རིམ་བར་པ་བཅས་ཀྱི་ཆོས་འབྲེལ་སྩལ་གནང་མཛད་རྒྱུ་མ་ཟད།

ཕྱི་ཚེས་ ༡༥ ཉིན་གྱི་སྔ་དྲོ་དད་ལྡན་ཆོས་ཞུ་བ་རྣམས་ལ་སྤྱན་རས་གཟིགས་འཇིག་རྟེན་དབང་ཕྱུག་གི་བཀའ་དབང་བཀའ་དྲིན་ཆེ་རྒྱུ་དང་།

ལྕམ་སྐུ་ས་ཀུ་ར་ཡི་ཡོ་ཤི་ཀོ་ Ms.Sakurai Yoshiko ལགས།

ཕྱི་ཚེས་ ༡༦ ཉིན་ཉི་ཧོང་སྐུ་ཚབ་དོན་ཁང་གི་གོ་སྒྲིག་འོག་དེང་དུས་ཚན་རིག་དང་ནང་པའི་གཞུང་ནས་གསུང་པའི་ཚན་རིག་དབར་བགྲོ་གླེང་སྐབས་ཉི་ཧོང་ཡུལ་གྱི་དབང་རྩ་དང་དང་སེམས་ཁམས་རིག་པའི་ཚན་རིག་པ། ཐེ་ཝན་གྱི་ཚད་རྡུལ་དངོས་ཁམས་རིག་པའི་ཚན་རིག་པ་བཅས་དང་ལྷན་བགྲོ་གླེང་མཛད་རྒྱུ་ཡིན་འདུག་པ་བཅས།