༢༠༡༨ ཟླ་ ༡༠ ཚེས་ ༣༠ རེས་གཟའ་མིག་དམར།
༄༅། །ཕྱི་ལོ་ ༢༠༡༨ ཟླ་ ༡༡ ཚེས་ ༦ ཉིན་འཛམ་གླིང་མཉམ་སྦྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་ནས་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཡར་རྒྱས་ཇི་ཙམ་སོང་མིན་དང་། ད་ལྟའི་གནས་སྟངས་ཇི་ཡིན་དུས་བཀག་བསྐྱར་ཞིབ་ཐེངས་གསུམ་པ་གནང་གཏན་འཁེལ་ཡོད་སྟབས། བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་དྲིལ་བསྒྲགས་དྲུང་ཆེའི་གནས་རིམ་ཚད་མཉམ་ཤར་གླིང་བསྟན་འཛིན་ཟླ་སྒྲོན་ལགས་དང་། ལྡི་ལི་སྐུ་ཚབ་དོན་ཁང་གི་དྲུང་ཆེ་ཚེ་རིང་དོན་གྲུབ་ལགས། ཕྱི་དྲིལ་འགྲོ་བ་མིའི་ཐོབ་ཐང་ཚན་པའི་འབྲེལ་ཡོད་ལས་བྱེད་འབྲུག་བསྟན་སྐྱིད་ལགས་དང་འཕྲིན་ལས་ཆོས་སྐྱིད་ལགས་བཅས་ཀྱིས་རྒྱ་གར་རྒྱལ་ས་ལྡི་ལིར་རྟེན་གཞི་བྱས་པའི་འཛམ་གླིང་མཉམ་སྦྲེལ་རྒྱལ་ཚོགས་ཀྱི་ཚོགས་མིའི་ཁོངས་སུ་ཡོད་པའི་རྒྱལ་ཁབ་ཁག་གཅིག་གི་གཞུང་ཚབ་ཏུ་བཅར་ནས་བོད་ནང་གི་འགྲོ་བ་མིའི་ཐོབ་ཐང་གི་ཛ་དྲག་གནས་སྟངས་ཇི་ཡིན་ཞིབ་ཕྲ་གསལ་བཤད་དང་སྦྲགས། བོད་མིའི་བདེན་པའི་འཐབ་རྩོད་ལ་རྒྱབ་སྐྱོར་གནང་དགོས་པའི་རེ་འདུན་ཤུགས་ཆེ་བཏོན་འདུག སྤྱིར་ཞུ་གཏུག་ལས་འགུལ་དེ་བཞིན་ཕྱི་ཟླ་ ༡༠ ཚེས་ ༢༥ ཉིན་སྤེལ་འགོ་བཙུགས་ཏེ་ཕྱི་ཚེས་ ༢༩ ཉིན་རེ་ཞིག་མཇུག་སྒྲིལ་གནང་འདུག
དེ་ཡང་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཐོག་དུས་བཀག་བསྐྱར་ཞིབ་ཆེད་འཛམ་གླིང་མཉམ་སྦྲེལ་རྒྱལ་ཚོགས་ཀྱི་ཚོགས་མིའི་ཁོངས་སུ་ཡོད་པའི་རྒྱལ་ཁབ་བདུན་གྱིས་འདྲི་བ་བཏོན་པའི་ནང་བོད་ནང་གི་གནས་སྟངས་འཁོད་པ་མ་ཟད། བོད་མིའི་འགྲོ་བ་མིའི་ཐོབ་ཐང་གི་གནས་སྟངས་ལ་འཕྲད་བཞིན་པའི་དཀའ་ངལ་སྐོར་འཁོད་འདུག འདྲི་བ་དེ་དག་ལ་རྒྱ་ནག་གཞུང་གིས་དུས་བཀག་བསྐྱར་ཞིབ་སྐབས་གསལ་བཤད་བྱེད་དགོས་པ་ཡིན།
ད་ཐེངས་བོད་མིའི་སྐུ་ཚབ་རྣམས་ཀྱིས་ལྡི་ལིར་ཡོད་པའི་ནིའུ་ཛི་ལེན་ཌི་ New Zealand དང་། ཧྥ་རན་སི། France འཇར་མ་ནི།Germany ཁེ་ན་ཌ།Canada སུད་སི་ Switzerland བཅས་རྒྱལ་ཁབ་ཁག་ལྔའི་གཞུང་ཚབ་ལས་ཁུངས་སུ་བཅར་འདུག
ཞུ་གཏུག་ནང་དོན་གཙོ་བོ་ནི། ༡༽ དུས་བཀག་བསྐྱར་ཞིབ་གནང་སྐབས་བོད་ཀྱི་གནད་དོན་གཙོ་བོར་འཛིན་དགོས་པ། ༢༽ རྒྱལ་ཚོགས་ཀྱི་ཚོགས་མི་རྣམ་པས་རྒྱ་ནག་གཞུང་དང་ལྷན་བོད་ནང་གི་བོད་མིའི་འགྲོ་བ་མིའི་ཐོབ་ཐང་གི་གནས་སྟངས་སྐོར་གླེང་སློང་གནང་བ་བརྒྱུད་རྒྱལ་སྤྱིའི་འགྲོ་བ་མིའི་ཐོབ་ཐང་སྲུང་སྐྱོབ་ཀྱི་བཅའ་ཁྲིམས་ལ་འགན་ཁུར་དགོས་པའི་དྲན་སྐུལ་གཏོང་དགོས་པ་བཅས་གནད་དོན་གཙིགས་ཆེར་འཛིན་འདུག གཞུང་ཚབ་ཁང་དུ་བཅར་སྐབས་བོད་མིའི་སྒྲིག་འཛུགས་ཀྱི་སྐུ་ཚབ་རྣམ་པས་རྒྱ་ནག་གཞུང་གིས་འཛམ་གླིང་ནང་བོད་བརྒྱུད་ནང་བསྟན་གྱི་སློབ་གཉེར་གནང་ཡུལ་ཆེ་ཤོས་སུ་གྲགས་པ་གསེར་རྟ་བླ་རུང་སྒར་དང་ཡ་ཆེན་སྒར་གཏོར་བཤིག་བཏང་དང་གཏོང་བཞིན་པ་མ་ཟད། ཀུན་གཟིགས་པཎ་ཆེན་དགེ་འདུན་ཆོས་ཀྱི་ཉི་མ་མཆོག་རྒྱ་ནག་གཞུང་གི་བཙན་དབང་འོག་གར་སོང་ཆ་མེད་དུ་གྱུར་བའི་གནས་སྟངས་སྤྱི་དང་། ལྷག་པར་བོད་ཀྱི་སྐད་ཡིག་འཐབ་རྩོད་པ་བོད་མི་བཀྲ་ཤིས་དབང་ཕྱུག་ལགས་ཀྱི་སྐོར་དང་། དེང་སྐབས་རྒྱ་ནག་གཞུང་གིས་བོད་མིའི་ཆོས་དད་རང་དབང་ཐོག་དམ་བསྒྲགས་ཤུགས་ཆེ་གཏོང་བཞིན་པའི་ཛ་དྲག་གནས་སྟངས་སོགས་ཀྱི་སྐོར་ཞིབ་ཕྲ་ངོ་སྤྲོད་གནང་འདུག
གཞུང་ཚབ་ཁང་དེ་དག་གི་འབྲེལ་ཡོད་ལས་བྱེད་ནས་ཀྱང་རྒྱལ་ཁབ་སོ་སོའི་སྲིད་གཞུང་ནས་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ལ་སེམས་འཚབ་དང་གདུང་སེམས་མཉམ་སྐྱེ་ཡོད་པ་གསལ་འདོན་གནང་བ་མ་ཟད། རྒྱ་ནག་གཞུང་གིས་མུ་མཐུད་བོད་ནང་དུ་འགྲོ་བ་མིའི་ཐོབ་ཐང་ལ་བརྩི་མེད་རྡོག་རོལ་གཏོང་བཞིན་པ་དེར་སྣང་མེད་དུ་འཇོག་ཐབས་མེད་སྐོར་གསུངས།
སྤྱིར་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཐོག་འཛམ་གླིང་མཉམ་སྦྲེལ་རྒྱལ་ཚོགས་ཀྱིས་དུས་བཀག་བསྐྱར་ཞིབ་ཐེངས་གསུམ་པའི་སྐབས་དང་བསྟུན། གཞུང་འབྲེལ་མིན་པའི་བོད་དོན་རྒྱབ་སྐྱོར་ཚོགས་པ་མང་པོས་གོ་སྐབས་དམ་འཛིན་ཐོག་ཡུལ་དུས་གནས་སྐབས་དང་བསྟུན་ནས་བོད་དོན་ཞུ་གཏུག་གི་ལས་འགུལ་རྒྱ་ཆེ་སྤེལ་ཏེ་འཛམ་གླིང་མཉམ་སྦྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་ནང་རྒྱ་ནག་གཞུང་ལ་གནོན་ཤུགས་གང་མང་སྤྲོད་ཐབས་བྱེད་ཡོད་འདུག ཕྱོགས་མཚུངས་བོད་མིའི་སྒྲིག་འཛུགས་ཀྱི་སྐུ་ཚབ་དོན་གཅོད་ཁང་ ༡༣ བརྒྱུད་འདི་ལོའི་ལོ་འགོ་ནས་བཟུང་བོད་དོན་ཞུ་གཏུག་གི་ལས་འགུལ་ལ་འབད་འབུང་ཆེ་སྐྱེད་གནང་འདུག
སྤྱིར་དུས་བཀག་བསྐྱར་ཞིབ་འགོ་མ་བཙུག་གོང་ཨོ་སི་ཊི་ཡ་དང་། བྷེལ་ཇམ། འཇར་མ་ནི། སུ་ཝི་ཌེན། སུད་སི། ཨིན་ཡུལ། ཨ་རི་བཅས་སྲིད་གཞུང་ཁག་བདུན་གྱིས་རྒྱ་ནག་གཞུང་ལ་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཐོག་སེམས་འཚབ་དང་སྦྲགས་དྲི་བ་བཏོན་གནང་འདུག རྒྱལ་ཁབ་དེ་དག་གིས་རྒྱ་ནག་གཞུང་ལ་བཏོན་པའི་དྲི་བ་ཁག་གི་ནང་དུ་བོད་མིའི་ཆོས་དད་དང་འགྲོ་སྐྱོད་རང་དབང་གི་ཐོབ་ཐང་གནས་སྟངས་དང་། དེེ་བཞིན་བོད་མི་བཀྲ་ཤིས་དབང་ཕྱུག་མཚན་འབོད་གནང་ནས་བོད་ཀྱི་སྐད་ཡིག་གི་གནས་སྟངས་དང་། བོད་མིས་གཙོས་གྲངས་ཉུང་མི་རིགས་རྣམས་ཀྱི་རིག་གཞུང་སྲུང་སྐྱོབ་ཀྱི་གནས་སྟངས་སྐོར་འདྲི་རྩད་གནང་འདུག དེ་སྔའི་དུས་བཀག་བསྐྱར་ཞིབ་སྐབས་རྒྱ་ནག་གཞུང་གིས་ཁས་ལེན་བྱས་པའི་གནད་དོན་ཁག་གཅིག་ལག་བསྟར་མཇུག་སྐྱོང་བྱེད་མིན་འདྲི་རྩད་གནང་འདུག་པའི་ཁོངས་ནས་གནད་དོན་གཅིག་ནི་དེ་སྔ་དུས་བཀག་བསྐྱར་ཞིབ་སྐབས་རྒྱ་ནག་གཞུང་གིས་བོད་ནང་འཛམ་གླིང་མཉམ་སྦྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ཆེས་མཐོའི་སྐུ་ཚབ་བོད་ནང་དངོས་ཡོད་གནས་སྟངས་རྟོག་ཞིབ་ཆེད་ཕེབས་འཇུག་རྒྱུ་མ་ཟད། བོད་ཀྱི་ས་གནས་གང་འདྲ་ཞིག་ཏུ་ཕེབས་ཀྱང་རྒྱ་ནག་གཞུང་གིས་དེར་འགོག་རྐྱེན་རྩ་བ་ནས་མི་བཟོ་རྒྱུའི་ཁས་ལེན་བྱས་པ་དེ་དག་ལག་བསྟར་ཇི་ཙམ་བྱེད་མིན་སོགས་འཁོད་འདུག
ཐེངས་འདིར་དུས་བཀག་བསྐྱར་ཞིབ་སྐབས་བོད་དོན་ཞུ་གཏུག་ཚོགས་ཆུང་གིས་འབྲེལ་ཡོད་མཉམ་སྦྲེལ་རྒྱལ་ཚོགས་ཀྱི་ཚོགས་མི་བརྒྱུད་རྒྱ་ནག་གཞུང་ལ་བོད་དོན་ཐོག་འདོན་རྒྱུའི་གནད་དོན་ཁག་གཅིག་ནི།
: རྒྱ་ནག་གཞུང་གི་བོད་མིའི་གཞི་རྩའི་འགྲོ་བ་མིའི་ཐོབ་ཐང་ལ་བརྩི་བཀུར་ཞུ་དགོས་པ། བོད་མིའི་སྒེར་གྱི་རང་དབང་དང་སྨྲ་བརྗོད་དང་འགྲོ་སྐྱོད་ཀྱི་རང་དབང་། ཆོས་དད་རང་དབང་བཅས་ལ་བརྩི་བཀུར་དང་ལེན་ཞུ་དགོས་པ།
: བོད་མིའི་འགྲོ་བ་མིའི་ཐོབ་ཐང་འཐབ་རྩོད་པ་རྣམས་ལ་དམ་བསྒྲགས་འཁོན་འཛིན་བྱ་རྒྱུ་འཕྲལ་མར་མཚམས་འཇོག་དགོས་པ།
:བོད་མི་ཚོས་རང་ལུས་མེར་སྲེག་གཏོང་དགོས་པའི་གནད་དོན་རྩ་བ་གང་ལ་ཐུག་ཡོད་མེད་ཐད་ངེས་པར་དངོས་ཡོད་གནས་སྟངས་དང་མཐུན་པའི་རྟོག་ཞིབ་མཐིལ་ཕྱིན་པ་གནང་བ་བརྒྱུད་ས་གནས་བོད་མི་རྣམས་དང་འབྲེལ་བ་བྱེད་ནས་དཀའ་ངལ་དེ་དག་སེལ་ཐབས་དགོས་པ།
:བོད་ནང་ཁོར་ཡུག་སྲུང་སྐྱོབ་དང་རྒྱུན་གནས་ཐུབ་པའི་དཔལ་འབྱོར་ཡར་རྒྱས་གཏང་བ་བརྒྱུད། རྒྱ་ནག་གཞུང་གིས་བོད་མིའི་ཐོག་ལག་བསྟར་བྱེད་བཞིན་པའི་དཔལ་འབྱོར་དབྱེ་འབྱེད་ཀྱི་སྲིད་བྱུས་མཚམས་འཇོག་དགོས་པ།
:འབྲོག་པ་རྣམས་བཙན་དབང་འོག་རྩྭ་ཐང་ནས་གནས་སྤོ་བྱ་རྒྱུའི་ལས་གཞི་མཚམས་འཇོག་དགོས་པ་མ་ཟད། དེ་སྔ་གནས་སྤོས་ཟིན་པའི་བོད་མི་འབྲོག་པ་ཚོར་རྒྱལ་སྤྱིའི་གནས་བབ་དང་མཐུན་པའི་མཐུན་འགྱུར་རོགས་རམ་སྤྲོད་དགོས་པ།
:བོད་ནང་རྒྱལ་སྤྱིའི་རྟོག་ཞིབ་པ་དང་རང་དབང་ལྡན་པའི་རྟོག་ཞིབ་ཚོགས་ཆུང་བཅས་ལ་འགོག་རྐྱེན་གང་ཡང་མེད་པར་འགྲོ་སྐྱོད་འཇུག་དགོས་པ་བཅས་ཡིན་འདུག
དུས་བཀག་བསྐྱར་ཞིབ་སྐབས་འཛམ་གླིང་མཉམ་སྦྲེལ་རྒྱལ་ཚོགས་ཀྱི་ཚོགས་མིའི་རྒྱལ་ཁབ་དེ་དག་གིས་རྒྱ་ནག་གཞུང་ལ་ངག་ཐོག་ནས་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཐོག་འདྲི་རྩད་གནང་རྒྱུ་དང་། ཕྱི་ཟླ་ ༡༡ ཚེས་ ༦ ཉིན་སུད་སི་གྲོང་ཁྱེར་ཇི་ནི་ཝར་རྟེན་གཞི་བྱས་པའི་འཛམ་གླིང་མཉམ་སྦྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་དུ་རྒྱལ་ཚོགས་ཀྱི་ཚོགས་མིའི་ཁོངས་སུ་ཡོད་པའི་རྒྱལ་ཁབ་དེ་དག་གིས་རྒྱ་ནག་གཞུང་ལ་ཐད་ཀར་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་སྟངས་སྐོར་སོགས་ཀྱི་དྲི་བ་འདོན་རྒྱུའི་ལས་རིམ་དེ་དག་དྲ་ཐོག་འདི་ http://webtv.un.org/ བརྒྱུད་ཐད་ཀར་གསན་གཟིགས་ཐུབ། །
