༢༠༡༨ ཟླ་ ༡༠ ཚེས་ ༢༩ རེས་གཟའ་ཟླ་བ།
༄༅། །ཕྱི་ལོ་ ༢༠༡༨ ཟླ་ ༡༠ ཚེས་ ༢༩ ཉིན་ཨ་རིའི་འགྲེམས་སྟོན་ཁང་ཁག་གི་འགན་འཛིན་དང་། འགྲེམས་སྟོན་དང་འབྲེལ་བའི་ཆེད་མཁས་མི་སྣ་ ༢༧ ། དེ་བཞིན་འཇར་མན་ནི་ནས་མི་གྲངས་གཉིས། ཨ་རི་སྐུ་ཚབ་དོན་གཅོད་དངོས་གྲུབ་ཚེ་རིང་ལགས། ཕྱི་དྲིལ་འགྲེམས་སྟོན་ཚན་པའི་འགན་འཛིན་བཀྲ་ཤིས་ཕུན་ཚོགས་ལགས་དང་འབྲེལ་ཡོད་ལས་བྱེད་གྲངས་ ༦ བཅས་ཁྱོན་མི་གྲངས་ ༣༥ ལ་བཞུགས་སྒར་༸རྒྱལ་བའི་ཕོ་བྲང་དུ་མཇལ་བཅར་ཞུ་སྐབས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་མཇལ་ཁ་དང་བཀའ་སློབ་སྩལ་དོན།
འདས་པའི་ལོ་ངོ་ ༥༩ རིང་ས་གནས་འདི་ངོས་ཀྱི་སྡོད་ཁང་ཆགས་ཡོད། ཁྱེད་ཚོ་འདིར་ཕེབས་པར་འཚམས་འདྲི་ཡོད། མི་ཡུལ་ལ་གྱར་ནས་ཉམས་མྱོང་མང་པོ་བསགས་བྱུང་། བོད་དུ་དུས་རབས་བརྒྱད་པའི་སྐབས་ཆོས་རྒྱལ་ཁྲི་སྲོང་ལྡེ་བཙན་སྐབས་རྒྱ་གར་ནས་མཁན་ཆེན་ཞི་བ་འཚོ་སོགས་གདན་དྲངས་ནས་ལོ་ངོ་སྟོང་ཕྲག་རིང་གི་རྒྱ་གར་གནའ་རབས་དཔལ་ནཱ་ལེནྡྲ་ནས་བརྒྱུད་པའི་སངས་རྒྱས་ཀྱི་བསྟན་པ་དྲི་མ་མེད་པ་བོད་དུ་དར་སྤེལ་མཛད་ཡོད། དེ་ལྟ་བུའི་སངས་རྒྱས་ཀྱི་བསྟན་པ་དེ་ནི་སྟོན་པ་རང་ཉིད་ཀྱི་བཀའ་ལའང་རྒྱལ་བས་གསུང་པའི་ཕྱིར་ཟེར་ནས་དད་པ་ཙམ་གྱིས་རྗེས་སུ་མ་འབྲངས་པར་རིགས་པའི་ལམ་ནས་བརྟག་དཔྱད་བྱེད་པ་བརྒྱུད་ཡིད་ཆེས་བྱེད་དགོས་པའི་ལམ་སྲོལ་བཟང་པོ་ཞིག་རྒྱུན་འཛིན་ཐུབ་པ་བྱུང་ཡོད།
སངས་རྒྱས་རང་གི་བཀའ་ལའང་སྒྲ་ཇི་བཞིན་པར་ཁས་བླང་དུ་རུང་བ་དྲང་དོན་དང་མི་རུང་བ་ངེས་དོན་གྱི་མདོ་བཅས་ཡོད། ལོ་ངོ་བཅུ་ཕྲག་མང་པོའི་རིང་ངོས་ལ་མཚོན་ན་ནཱ་ལེནྡྲའི་རིག་གཞུང་དེས་ཕན་ཐོགས་ཧ་ཅང་བྱུང་། ལྷག་པར་ངོས་ཀྱིས་འདས་པའི་ལོ་ངོ་སུམ་ཅུ་ལྷག་རིང་ཚན་རིག་པ་མང་པོ་ཞིག་དང་ལྷན་བགྲོ་གླེང་བྱེད་སྐབས་ནཱ་ལེནྡྲའིལ་བརྟེན་ནས་ཕྱོགས་གཉིས་ཀར་ཕན་ཐོགས་རྒྱ་ཆེ་བྱུང་། འཇིག་རྟེན་ཆགས་ཚུལ་ཐོག་ཚན་རིག་པས་གས་འཐོར་ཆེན་པོ་ནས་མར་འགྲེལ་བཤད་རྒྱག་བཞིན་ཡོད།
ཕྱོགས་མཚུངས་ཚན་རིག་ནས་བཤད་པའི་དབང་རྩའི་སྐོར་དེ་དག་ཧ་ཅང་ཟབ་པོ་དང་ཕན་ཐོགས་ཆེན་པོ་འདུག ཚད་རྡུལ་དངོས་ཁམས་རིག་པའི་རྣམ་གཞག་ཐོག་ལ་མཚོན་ན་དེང་དུས་ཚན་རིག་པ་ཚོ་ལས་ང་ཚོས་ཡག་པ་ཤེས་ཀྱི་ཡོད། (ཞལ་ཤོབ་མཛད།) དེ་སྔ་རྒྱ་གར་དངོས་ཁམས་ཚན་རིགས་པ་རཱ་ཇ་ར་མནནཱ་ Raja Ramanna དམ་པ་མཆོག་གིས་རྒྱ་གར་ནང་ཚད་རྡུལ་དངོས་ཁམས་རིག་པའི་རྣམ་གཞག་ Quantum Physics དར་ནས་ལོ་ངོ་ ༢༦༠༠ སོང་ཟིན་སྐོར་བརྗོད་མྱོང་ཡོད།
དེ་ནས་སེམས་ཁམས་རིག་པའི་རྣམ་གཞག་ལ་མཚོན་ན་རྒྱ་གར་ནང་ལོ་ངོ་ ༣༠༠༠ ཙམ་ནས་བདག་དང་ཤེས་པ་སོགས་རང་ངོས་ནས་བདེན་པར་གྲུབ་ཡོད་མེད་ཐོག་དཔྱད་པ་ཧ་ཅང་ཞིབ་ཚགས་པོ་བྱས་ཡོད་སྟབས། རྒྱ་གར་དང་བསྡུར་བ་ཡིན་ན་དེང་དུས་སེམས་ཁམས་རིག་པའི་རྣམ་གཞག་སྔོན་འགྲོ་སློབ་གྲྭའི་གནས་ཚད་ལས་མེད། (སླར་ཡང་ཞལ་ཤོབ་མཛད།) རྒྱ་གར་གནའ་རབས་ཀྱི་སེམས་ཁམས་རིག་པའི་རྣམ་གཞག་དེ་དག་ཡར་རྒྱས་ཧ་ཅང་ཚད་མཐོན་པོར་སོན་ཡོད། དེ་བཞིན་དཔྱད་སྒོམ་དང་འཇོག་སྒོམ་དེ་དག་ཧ་ཅང་ཕན་རླབས་ཆེན་པོ་འདུག ཅེས་སོགས་ཀྱི་བཀའ་སློབ་སྩལ་རྗེས་དྲི་བ་ཁག་ལ་བཀའ་ལན་སྩལ་ཡོད།
དེ་ཡང་གོང་ཚེས་ཉིན་གྱི་ཕྱེད་ཡོལ་ཆུ་ཚོད་ ༢ ཐོག་ཕྱི་དྲིལ་ལས་ཁུངས་ཀྱི་འགྲེམས་སྟོན་ཚན་པ་དང་ཨ་རི་སྐུ་ཚབ་དོན་གཅོད་ཁང་གཉིས་ཀྱི་གོ་སྒྲིག་འོག་བཞུགས་སྒར་མེག་གྷན་དུ་རྟེན་གཞི་བྱས་པའི་ཝེ་ཀུན་ཐི་ The Vaikunth གསོལ་མགྲོན་ཁང་དུ། གོང་གི་མཇལ་བཅར་བ་རྣམས་འདུ་འཛོགས་ཐོག་འགྲེམས་སྟོན་ཁང་བརྒྱུད་ཆོས་ལུགས་ལ་མ་བརྟེན་པའི་བཟང་སྤྱོད་དང་བྱམས་བརྩེ་གོང་འཕེལ་གཏོང་ཐབས་ཀྱི་བགྲོ་གླེང་ཚོགས་འདུ་ཞིག་ཚོགས་ཡོད་འདུག སྐབས་དེར་བགྲོ་གླེང་གནང་མཁན་ཡོངས་ནས་འགྲེམས་སྟོན་དང་པར་རིས་བརྒྱུད་ཁོར་ཡུག་དང་འགྲོ་བ་མི། དུད་འགྲོ་སྲོག་ཆགས་ཚུན་ཆད་ལའང་ཆོས་ལུགས་ལ་མ་བརྟེན་པའི་བཟང་སྤྱོད་དང་བྱམས་བརྩེ་བརྒྱུད་ཇི་ལྟར་ཕན་བདེ་སྒྲུབ་དགོས་པའི་སྐོར་བགྲོ་གླེང་ལྷུག་པོ་གནང་བ་བཅས།།
