༢༠༡༨ ཟླ་ ༡༠ ཚེས་ ༢༩ རེས་གཟའ་ཟླ་བ།

༄༅། །རྒྱལ་སྤྱིའི་རྒྱ་གྲམ་དམར་པོས་རྒྱ་གར་བྱང་ཕྱོགས་ཧི་མཱ་ཅལ་མངའ་སྡེའི་ནང་རྟེན་གཞི་བྱས་པའི་ཌལ་ཧོར་བོད་མིའི་གཏན་འཇགས་སློབ་གྲྭའི་རྩེད་ཐང་དུ་དཔལ་འབྱོར་འདུ་འགོད་ཀྱི་ལས་གཞི་རྒྱ་ཆེ་ཞིག་སྤེལ་འདུག་པ་དང་།  དེ་ཡང་ཚོང་འདུས་ meela སྐབས་མཛད་སྒོའི་སྐུ་མགྲོན་གཙོ་བོ་ས་གནས་རྫོང་དཔོན་དང་། ཅམ་བྷ་རྫོང་གི་རྒྱ་གྲམ་དམར་པོའི་ཚོགས་གཙོ་ཧ་རི་ཀེཤ་མི་ན་Harikesh Meena ལགས།  རྫོང་ཡན་ལག་ལས་ཁུངས་ཀྱི་འགོ་དཔོན་མུ་ར་རི་ལཱལ་ Dr. Murari Lal ལགས་སོགས་དང་།

ཌལ་ཧོར་གཏན་འཇགས་སློབ་གྲྭས་གཙོས་སློབ་གྲྭ་ཁག་འདྲ་མིན་གྱིས་མཉམ་ཞུགས་གནང་སྟེ་བོད་མི་དགེ་ལས་སློབ་ཕྲུག་རྣམས་ནས་དཀར་ཟས་མོག་མོག་སྡེར་མ་༣༥༠༠ བཙོངས་བའི་ཡོང་འབབ་བརྒྱ་ཆ་ ༤༠ རྒྱ་གྲམ་དམར་པོའི་དཔལ་འབྱོར་འདུ་འགོད་ལས་གཞིར་རྒྱབ་སྐྱོར་མཚོན་སླད་ཕུལ་འདུག   

སྐབས་དེར་ཌལ་ཧོར་ས་གནས་བོད་མི་ཚོས་རུམ་གདན་སྣ་ཚོགས་ཤིག་འགྲེམས་སྟོན་གནང་བ་མ་ཟད།  ས་གནས་འགོ་འཛིན་རབ་བརྟན་ཚེ་རིང་ལགས་ཀྱིས་ ༢༠༡༨ ལོ་དེ་བཞིན་བོད་མིའི་སྒྲིག་འཛུགས་ཀྱིས་རྒྱ་གར་གཞུང་མང་གཉིས་ལ་ཐུགས་རྗེ་ཆེ་ཞུའི་ལོར་སྲུང་བརྩི་ཞུ་བཞིན་ཡོད་སྟབས་གོ་སྐབས་དང་བསྟུན།  སྐུ་མགྲོན་གཙོ་བོ་སོགས་ལ་ཐུགས་རྗེ་ཆེ་ཞུའི་མཚོན་བྱེད་ཕྱག་རྟགས་ཤིག་ཀྱང་ཕུལ་བ་དང་སྦྲགས།  ད་བར་ས་གནས་གཞུང་མང་གཉིས་ཀྱིས་བོད་མི་བཙན་བྱོལ་བ་རྣམས་ལ་རྒྱབ་སྐྱོར་དང་མཐུན་འགྱུར་རོགས་རམ་གནང་དང་གནང་མུས་ལ་ཐུགས་རྗེ་ཆེ་ཞུས་འདུག་པ་བཅས།།