ཕྱི་ལོ་ ༢༠༡༨ ཟླ་ ༡༠ ཚེས་ ༡༢ རེས་གཟའ་པ་སངས།

༄༅། །ཕྱི་ལོ་ ༢༠༡༨ ཟླ་ ༡༠ ཚེས་ ༡༡ རེས་གཟའ་ཕུར་བུའི་ཉིན་བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་རྡ་ས་རྒྱལ་བའི་ཕྲོ་བྲང་དུ་རྒྱ་གར་བྱང་ཕྱོགས་ཨུ་ཏྟར་ཁཎྜ་མངའ་སྡེའི་ཁོངས་མ་སུ་རིར་རྟེན་གཞི་བྱས་པའི་ཝུཊ་སི་ཊོག་རྒྱལ་སྤྱིའི་སློབ་གྲྭའི་ Woodstock International School འཛིན་རིམ་བཅུ་གཅིག་དང་བཅུ་གཉིས་ཀྱི་སློབ་ཕྲུག་གྲངས་ ༥༡ ལ་དམིགས་བསལ་མཇལ་ཁ་སྩལ་རྗེས་བཀའ་སློབ་སྩལ་དོན།  གོང་དུ་ཨིན་ཌོན་ཨེ་ཤེ་ཡ་ Indonesia ནས་རུ་ཁག་གཅིག་ངོས་དང་ཐུག་འཕྲད་སླད་ཕེབས་ཡོད། ཁོང་རྣམས་ཁ་ཆེའི་ལུང་པ་ནས་ཡིན་ཀྱང་ནང་ཆོས་ཉམས་ལེན་བྱེད་མཁན་ཞིག་རེད་འདུག  ངོས་ཀྱིས་ཨིན་ཌོན་ཨེ་ཤེ་ཡ་རྒྱལ་ཁབ་ནི་ཁ་ཆེའི་རྒྱལ་ཁབ་ཞིག་ཡིན་ཀྱང་ཧིན་རྡུ་དང་ནང་ཆོས་ཉམས་ལེན་བྱེད་མཁན་ཡོད་པ་རེད། ཅེས་བརྗོད་རྒྱུ་བྱུང་།  ཁ་ཆེའི་སྤྱི་ཚོགས་ནང་ཤི་ཡ་ Shia དང་སུན་ནི་ Sunni གཉིས་དབར་འཁྲུག་རྩོད་བྱེད་བཞིན་ཡོད།

ཨིན་ཌོན་ཨེ་ཤེ་ཡ་ནས་བཅར་བའི་རུ་ཁག

དེ་བཞིན་སི་རི་ཡ་ Syria དང་ཨབ་གྷ་ནི་སི་ཐན་ Afghanisthan ནང་དུའང་དམག་འཁྲུག་འབྱུང་བཞིན་ཡོད། ཁ་ཆེ་ཆོས་ལུགས་འཛིན་མཁན་ཡོངས་ཀྱིས་ཨཱ་ལ་ Allah སྐྱབས་སུ་བྱེད་མཁན་དང་། ཀུ་རན་ Kuran རྩ་བར་བཞག་མཁན།  དེ་བཞིན་དུས་ཡུན་ལྔའི་རིང་ཁ་འདོན་བྱེད་མཁན་གཅིག་གྱུར་ཡིན།   ཤི་ཡ་དང་སུན་ནི་དབར་ཕན་ཚུན་གསོད་རེས་བྱེད་ཀྱི་ཡོད་པ་དེ་ནི་བསམ་ཡུལ་ལས་འདས་པའི་བྱ་སྤྱོད་ཞིག་ཡིན། འོན་ཀྱང་ངོས་ཀྱིས་རྒྱ་གར་ནང་ཁ་ཆེའི་ཆོས་ལུགས་ཤི་ཡ་དང་སུན་ནི་དབར་འཁྲུག་རྩོད་བྱུང་བའི་སྐད་ཆ་ནམ་ཡང་གོ་མྱོང་མེད། དཀའ་ངལ་རྩ་བ་ནས་མེད། རྒྱ་གར་ནང་ལོ་སྟོང་ཕྲག་གསུམ་བཞི་ལྷག་རིང་འཛམ་གླིང་ནང་གི་ཆོས་ལུགས་གཙོ་ཆེ་བ་ཚང་མ་འཆམ་མཐུན་ངང་འདིར་གནས་བཞིན་ཡོད་པ་འདིས་འཛམ་གླིང་ཕྱི་ལ་ཆོས་ལུགས་མཐུན་སྒྲིལ་གྱི་མིག་དཔེ་བཟང་པོ་ཞིག་སྐྲུན་ཐུབ་པ་བྱ་དགོས། ཆོས་ལུགས་མི་འདྲ་བ་དེ་དག་ཕན་ཚུན་འཆམ་མཐུན་ངང་གནས་ཐུབ་རྒྱུ་ཡིན་པའི་མིག་དཔེ་བཟང་པོ་སྟོན་པ་དེ་དག་འཛམ་གླིང་ཁྱོན་ཡོངས་ལ་ལག་བསྟར་བྱ་དགོས།

དེ་ཡང་སྟོན་པ་བཅོམ་ལྡན་འདས་མ་བྱུང་གོང་ནས་རྒྱ་གར་ནང་ཆོས་ལུགས་འདྲ་མིན་སྣ་ཚོགས་གནས་བཞིན་ཡོད། རྒྱ་གར་གྱི་གདོད་མའི་ཆོས་ལུགས་ལ་ཆ་མཚོན་ན་གྲངས་ཅན་པ་ Samkhya དང་གཅེར་བུ་བ། Jainism ནང་པ་སངས་རྒྱས་པ། Buddhism ཕྱིས་སུ་སིཀ་ Sikhism ཆོས་ལུགས་དར་བ་དང། དེ་བཞིན་ཕྱི་ཕྱོགས་ནས་ཡི་ཤུ་ Christianity དང་ཁ་ཆེའི་ Islam ཆོས་ལུགས། ཇིའུ་ཆོས་ལུགས། Judaism ཛོ་ར་སི་ཊི་རན་ Zoroastrianism ཆོས་ལུགས་སོགས་དར་འཕེལ་བྱུང་བ་ཙམ་མ་ཟད། ཆོས་ལུགས་དེ་དག་འཆམ་མཐུན་ཐོག་མཉམ་གནས་བྱས་དང་བྱེད་བཞིན་ཡོད།

གཞན་ཡང་གནད་དོན་གལ་ཆེན་པོ་གཅིག་ནི། སིག་གི་བླ་ཆེན་གུ་རུ་ནཱ་ནག་དེ་བཞིན་ཧིན་དུའི་ཁྱིམ་ཞིག་ནས་ཡིན་ཀྱང་ཁོང་མེ་ཁག་ Mecca དུ་གནས་སྐོར་དུ་ཕྱིན་པ་དེ་ཆོས་ལུགས་གཞན་ལ་གུས་བརྩི་ཡོད་པ་རྣམ་པ་སྟོན་གྱི་ཡོད། ལོ་སྟོང་ཕྲག་རིང་རྒྱ་གར་འཕགས་པའི་ཡུལ་ནང་ཆོས་ལུགས་མཐུན་སྒྲིལ་ཧ་ལས་པ་ཡོད། 
ངོས་ཀྱིས་སྐབས་རེ་མཁས་དབང་དང་།  ཤེས་ལྡན་པ། དེ་བཞིན་ནང་ཆོས་ཉམས་ལེན་བྱེད་མཁན།  ན་ལེནྡྲའི་མཁས་པ་རྣམས་དང་ལྷན་དུ་བགྲོ་གླེང་བྱེད་ཀྱི་ཡོད། བགྲོ་གླེང་དེ་དག་ཧ་ཅང་ཡག་པོ་འདུག བགྲོ་གླེང་དེའི་བརྒྱུད་འགྲོ་བ་མིའི་རྣམ་དཔྱོད་དང་ཤེས་རབ་གོང་འཕེལ་བཏང་གིས་ཡོད། ཅེས་སོགས་ཀྱིས་བཀའ་སློབ་སྩལ་རྗེས་སློབ་ཕྲུག་རྣམས་ཀྱིས་བཀའ་འདྲིར་བཀའ་ལན་སྩལ་ཡོད།

སྤྱིར་བོད་པ་དང་རྒྱ་གར། འབྲུག ཨབ་གྷ་ནི་སི་ཐན། ཨ་རི། སི་རི་ཡ། པེ་ལིས་ཏན། ཀོ་རི་ཡ་སོགས་ནས་ཡིན་པའི་སློབ་མ་དེ་དག་ཕྱི་ལོ་ ༢༠༡༨ ཟླ་ ༡༠ ཚེས་ ༨ ནས་ ༡༠ བར་བོད་ཀྱི་རིག་གཞུང་དང་། རྒྱལ་རབས། ཆོས། བོད་ཀྱི་གནས་སྟངས་སོགས་ཀྱི་སྐོར་མཁྱེན་རྟོགས་སླད་རྡ་སར་ཕེབས་ཡོད་པ་བཅས། །