ཕྱི་ལོ་ ༢༠༡༨ ཟླ་ ༡༠ ཚེས་ ༨ རེས་གཟའ་ཟླ་བ།
༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ལོ་ ༢༠༡༨ ཟླ་ ༡༠ ཚེས་ ༣ ནས་ ༦ བར་ཉིན་གྲངས་བཞིའི་རིང་བཞུགས་སྒར་རྡ་ས་ཐེག་ཆེན་ཆོས་གླིང་གཙུག་ལག་ཁང་དུ་ཐེ་ཝན་གྱིས་གཙོས་ཕྱི་རྒྱལ་ཡུལ་གྲུ་ཁག་ ༦༧ ནས་བཅར་བའི་དད་ལྡན་ཆོས་ཞུ་བ་དང་རང་རིགས་བཅས་ཁྱོན་མི་གྲངས་ ༦༩༠༠ བརྒལ་བར་སློབ་དཔོན་ཟླ་བ་གྲགས་པས་མཛད་པའི་དབུ་མ་འཇུག་པའི་བཀའ་ཆོས་ཉིན་མཐའ་མའི་སྐབས་ལམ་གཙོ་རྣམ་གསུམ་གྱི་བཀའ་ཁྲིད། དགེ་བསྙེན་གྱི་སྡོམ་པ་དང་བྱང་ཆུབ་སེམས་དཔའི་སྡོམ་པ་འབོག་ཆོག སྤྱན་རས་གཟིགས་ངན་སོང་ཀུན་གྲོལ་གྱི་རྗེས་གནང་བཅས་བཀའ་དྲིན་སྩལ་ཏེ་ཐེངས་འདིའི་ཉིན་གྲངས་བཞིའི་རིང་གི་བཀའ་ཆོས་རེ་ཞིག་ལེགས་པར་མཇུག་སྒྲིལ་མཛད་ཡོད།
དེ་ཡང་ཕྱི་ཚེས་ ༦ ཉིན་གྱི་སྔ་དྲོ་ཆུ་ཚོད་ ༨།༡༥ ཙམ་ལ་བཞུགས་སྒར་རྡ་ས་ཐེག་ཆེན་ཆོས་གླིང་གཙུག་ལག་ཁང་དུ་ཆིབས་བསྒྱུར་བཀའ་དྲིན་བསྐྱངས་ཏེ་སྒྲུབ་ཞག་གནང་སྐབས་ཚང་མས་མ་ཎི་འདོན་དགོས་པའི་བཀའ་ཕེབས་པ་དང་བསྟུན་མི་མང་གིས་མ་ཎི་བཏོན་ནས་སྒྲུབ་ཞག་གྲུབ་མཚམས་བཀའ་སློབ་སྩལ་དོན། དེ་རིང་མཇུག་ཏུ་དགེ་བ་ལ་ཁ་སང་ནས་སྔགས་ཀྱི་སྐོར་ལ་གང་ཞིག་ཡག་པོ་ཡོད་ན་བསམ་པ་ཡིན། སྤྱན་རས་གཟིགས་ངན་སོང་ཀུན་གྲོལ་འདི་ངོས་ཀྱིས་བསྙེན་པ་ཡང་མང་པོ་བཏང་ཡོད། ངན་སོང་ཀུན་གྲོལ་གྱི་སྒོམ་བཟླས་དང་འབྲེལ་བའི་ཐོག་ནས་མ་ཎི་འབུམ་དྲུག་བསགས་ཡོད། དེར་བརྟེན་སྤྱན་རས་གཟིགས་ངན་སོང་ཀུན་གྲོལ་གྱི་རྗེས་གནང་བྱས་ན་དྲན་སོང་། ཆོ་ག་དེ་བསྡུས་པ་འདུམ་བདེ་བོ་རེད། འདིའི་ཆོ་གའི་ནང་དུ་སེམས་བསྐྱེད་ཡོད་པ་རེད། དེ་ཅུང་རྒྱས་པར་བཏང་ནས་ང་རང་ཚོས་ནམ་རྒྱུན་བྱང་སེམས་ཆོ་ག་ཞེས་པ་བྱང་སྡོམ་སྲུང་བ་ངོས་ནས་ནམ་རྒྱུན་འདོན་གྱི་ཡོད། དེའི་སྔོན་ལ་ཁྱོད་རང་ཚོ་ཁྱིམ་པ་ཕོ་མོ་ཚོའི་ནང་དགེ་བསྙེན་སྒྲུབ་འདོད་ཡོད་མཁན་ཚོར་ཚངས་སྤྱོད་དགེ་བསྙེན་མིན་པར་ཡོངས་རྫོགས་དགེ་བསྙེན་སྒྲུབ་ཐུབ་ན་ཡག་པོ་ཡོད་པ་རེད། དེའི་གོང་ལ་ལམ་གཙོའི་བཤད་ལུང་བསྡུས་པ་ཞིག་བྱེད།
ང་ཚོས་ཉིན་གསུམ་རིང་ལ་ནང་ཆོས་སྤྱི་ངོ་སྤྲོད་བྱས་པ་རེད། དེ་རིང་འདིར་ལམ་གྱི་གཙོ་བོ་རྣམ་པ་གསུམ་ཞེས་མ་གཞི་ཁ་སང་ཞུས་ཟིན་པ་ལྟར། མགོན་པོ་ཀླུ་སྒྲུབ་ཀྱི་དབུ་མ་རིན་ཆེན་ཕྲེང་བའི་ནང་དུ་མངོན་མཐོ་སྒྲུབ་པ་དང་ངེས་ལེགས་སྒྲུབ་པ་ཞེས་གཉིས་གསུང་གི་འདུག དེ་ཁུངས་བྱས་ནས་དབུ་མ་བཞི་བརྒྱ་བའི་ནང་དུ། བསོད་ནམས་མིན་པ་དང་པོར་བཟློག། །བར་དུ་བདག་ནི་བཟློག་པ་དང་། །ཞེས་སོགས་ཀྱི་ཐོག་ནས་བློ་རིམ་གྱིས་སྦྱོང་སྟངས་གསུངས། དཔལ་ནཱ་ལེནྡྲའི་མཁས་པའི་དབང་པོ་ཚོས་ཀླུ་སྒྲུབ་ཡབ་སྲས་ཀྱི་གསུང་དེ་བཞིན་ཉམས་བཞེས་གནང་གི་ཡོད་པ་རེད།
བོད་གངས་ཅན་གྱི་ལྗོངས་ལ་དུས་རབས་བཅུ་པ་དང་བཅུ་གཅིག་པར་བྱུང་བ་དང་། བར་སྐབས་ཤིག་ལ་བོད་ལ་སངས་རྒྱས་ཀྱི་བསྟན་པར་ཉམས་ཆག་ཆེན་པོ་བྱུང་བ་རེད། ཕལ་ཆེར་དབུས་ཁུལ་དུ་རབ་བྱུང་ངུར་སྨྲིག་འཆང་བ་མཐོང་རྒྱུ་མེད་པར་ལོ་དྲུག་ཅུ་སྐོར་ཞིག་བསྡད་པ་རེད། དེ་ནས་སྟོད་མངའ་རིས་ལ་མངའ་རིས་ཆོས་རྒྱལ་གྱིས་ཐུགས་ཁུར་བཞེས་ནས་ཇོ་བོ་རྗེ་གདན་ཞུ་གནང་བ་རེད། དེ་ལྟར་ཇོ་བོ་རྗེ་ཡིས་མཐོ་ལྡིང་ལ་ཡིན་པ་ཡོད། དེར་ལམ་སྒྲོན་མཛད་པ་རེད། ལམ་སྒྲོན་ནི་འབྲོམ་སྟོན་པས། ངོ་མཚར་བཀའ་ནི་སྡེ་སྣོད་གསུམ་ཡིན་ཏེ། །དམ་པ་སྐྱེས་བུ་གསུམ་གྱིས་མཛེས་པ་ཡི། །བཀའ་གདམས་རིན་ཆེན་གསེར་གྱི་ཕྲེང་བ་འདི། །འགྲོ་བ་གང་གིས་བགྲངས་ཀྱང་དོན་ཡོད་འགྱུར། །ཞེས་གསུངས་འདུག
སངས་རྒྱས་བཅོམ་ལྡན་འདས་ཀྱིས་སྡེ་སྣོད་གསུམ་གསུངས་ཡོད་པ་རེད། དེ་ངོ་མཚར་བཀའ་ནི་རེད། ཁ་སང་ཁེ་ཉིན་སྐད་ཆ་བྱུང་བ་ལྟར་དད་པ་གཅིག་པུའི་སྐད་ཆ་མིན་པར་དངོས་གནས་རིགས་པའི་སྒྲུབ་བྱེད་མང་དུ་བཀོད་དེ་མཐར་མྱོང་བ་ལ་གཏུགས་ནས་གསུངས་པ་ཞིག་རེད། མི་འདྲ་བ་ཞིག་རེད། དེར་བརྟེན་དེ་ལྟ་བུའི་སྡེ་སྣོད་གསུམ་གྱི་སྙིང་པོ་བསྡུས་པ་སྐྱེས་བུ་གསུམ་གྱི་ལམ་རིམ་ལ་བསྡུས་ནས་གསུངས་པ་ཞིག་རེད་ཅེས་གསུངས་པ་རེད།
རྗེ་རིན་པོ་ཆེས་ལམ་གྱི་གཙོ་བོ་རྣམ་པ་གསུམ་གང་རེད་ཅེ་ན། ངེས་འབྱུང་། བྱང་སེམས། ཡང་དག་པའི་ལྟ་བ་དེ་གསུམ་གསུངས་པ་རེད། དང་པོ་མགོ་སྟོད་རྗེ་རིན་པོ་ཆེ་ལ་རྗེ་བཙུན་འཇམ་པའི་དབྱངས་ཀྱིས་ཞལ་གཟིགས་ཐད་ཀར་ཡོང་གི་ཡོད་པ་མ་རེད། ཁམས་ནས་ཡིན་པ་བླ་མ་དབུ་མ་བ་དཔའ་བོ་རྡོ་རྗེ་ཟེར་བ་ཞིག་ཡོད། ཁོང་སྔོན་གྱི་བག་ཆགས་སད་ནས་ཕྱུགས་རྫི་ལ་ཁྱུག་ཙམ་བཞུགས་སྐབས་ཉིན་གཅིག་རྗེ་བཙུན་འཇམ་པའི་དབྱངས་སྐུ་མདོག་ནག་པོ་ཞིག་ཁྲ་ལམ་མེར་གཟིགས་པ་དང་། དེ་ནས་བཟུང་རྗེ་བཙུན་འཇམ་པའི་དབྱངས་ཞལ་གཟིགས་ནས་བཀའ་མོལ་གནང་བ་དེ་འདྲ་ཡོང་གི་ཡོད། རྗེ་རིན་པོ་ཆེ་མདོ་སྨད་ནས་ཡར་དབུས་གཙང་ལ་ཕེབས་ནས་བསླབ་པ་སློབ་གཉེར་རྒྱ་ཆེན་པོ་གནང་། སྐབས་དེར་དབུས་ཁུལ་ན་ཡོད་པའི་བཤད་གྲྭ་གསང་ཕུ་ལ་སོགས་པར་གྲྭ་སྐོར་གནང་བ་དང་། དེ་ནས་སྐབས་ཤིག་དགའ་གདོང་ལ་གནས་ཤིག་ཡོད་པ་རེད། དེར་ཁོང་རྣམ་པ་གཉིས་སྐུ་མཚམས་ལ་བཞུགས་པའི་སྐབས་སུ་རྗེ་བཙུན་འཇམ་པའི་དབྱངས་ཞལ་གཟིགས་པ་རེད།
དེ་ནས་བཟུང་རྗེ་བཙུན་འཇམ་པའི་དབྱངས་རྗེ་རིན་པོ་ཆེས་ནམ་འདོད་ཞལ་གཟིགས་པ་ཞིག་དང་། ཞལ་གཟིགས་པའི་སྐབས་སུ་ཟབ་རྒྱས་ཀྱི་ལམ་གྱི་རིམ་པ་དང་། ལྷག་པར་སྟོང་ཉིད་ཀྱི་ལྟ་བའི་སྐོར་ལ་འཇམ་པའི་དབྱངས་ལ་བཀའ་འདྲི་ཞུས་པར་འཇམ་པའི་དབྱངས་ཀྱིས་བསྡུས་བསྡུས་སྙིང་པོ་ཞིག་གསུངས་པར་འདི་གོ་ཡི་མི་འདུག་ཅེས་ཡར་ཞུས་པར་འཇམ་པའི་དབྱངས་ཀྱིས་སྐྱོན་ཡོད་པ་མ་རེད། དཔེ་ཆར་ལྟོས་གསུངས་པ་རེད། འཇམ་པའི་དབྱངས་ཀྱི་རལ་གྲི་དེ་རྗེ་རིན་པོ་ཆེའི་ཐུགས་ཀར་བཙུགས་ནས་སྟོང་ཉིད་རྟོགས་པ་བྱུང་མི་འདུག དཔེ་ཆར་ལྟོས་གསུངས་འདུག དེ་བཞིན་ཚོགས་བསགས་སྒྲིབ་སྦྱོང་བྱོས་གསུངས་འདུག ཅེས་སོགས་བཀའ་སློབ་སྩལ་རྗེས་ལམ་གཙོ་རྣམ་གསུམ་གྱི་བཤད་ལུང་དང་། དེ་ནས་དགེ་བསྙེན་དང་བྱང་ཆུབ་སེམས་དཔའི་སྡོམ་པ་འབོག་ཆོག་མཛད་རྗེས། སྤྱན་རས་གཟིགས་ངན་སོང་ཀུན་གྲོལ་གྱི་རྗེས་གནང་བཀའ་དྲིན་སྩལ་ཏེ་ཐེངས་འདིའི་ཉིན་གྲངས་བཞིའི་རིང་གི་བཀའ་ཆོས་རེ་ཞིག་ལེགས་པར་མཇུག་སྒྲིལ་མཛད་ཡོད། །
