༄༅། །ཕྱི་ལོ་ ༢༠༡༨ ཟླ་ ༡༠ ཚེས་ ༥ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་རྒྱ་གར་བྱང་ཕྱོགས་ཨུཏྟར་ཁཎྜ་མངའ་སྡེའི་ནང་ཆགས་པའི་ཡུལ་སྐོར་སྤྲོ་འཆམ་བྱེད་ས་གྲགས་ཆེ་བ་ནེ་ནི་ཏལ་གྲོང་ཁྱེར་དུ་ཀུ་མོན་རྩོམ་རིག་སྒྱུ་རྩལ་དུས་སྟོན་Kumaon Festival of Literature and Arts དབུ་འབྱེད་གནང་ཡོད།
སྲིད་སྐྱོང་མཆོག་གིས་སྐབས་དེར་༼ རྒྱ་གར་ནང་གི་བོད། ༽ ཅེས་འཕགས་བོད་གཉིས་ལོ་རྒྱུས་ཐོག་འབྲེལ་བའི་འཕེལ་རིམ་དང་། ལྷག་པར་ ༡༩༥༩ ལོར་བོད་མི་བཙན་བྱོལ་བ་རྣམས་རྒྱ་གར་དུ་བཙན་བྱོལ་ལ་སླེབས་རྗེས་བོད་ཀྱི་ཆོས་དང་རིག་གཞུང་མི་ཉམས་རྒྱུན་འཛིན་བྱེད་བཞིན་པའི་སྐོར་བགྲོ་གླེང་གི་ལམ་ནས་གསུངས།   བགྲོ་གླེང་གནང་མཁན་སྐུ་ཞབས་ Patrick French ཡིན་པ་དང་།  ཁོང་ནི་རྒྱ་གར་གུ་ཇུ་རཱཏ་ Gujurat མངའ་སྡེའི་གྲོང་ཁྱེར་ཨེམ་དྷ་བྷཐ་Aahmedabad ནང་རྟེན་གཞི་བྱས་པའི་ཨེམ་དྷ་བྷཐ་གཙུག་ལག་སློབ་གཉེར་ཁང་Aahmedabad University  གི་སྒྱུ་རྩལ་དང་ཚན་རིག་ཚན་པའི་School of Arts and Sciences འགན་འཛིན་ཡིན་ཞིང་། རྩོམ་པ་པོ་དང་དེ་བྱུང་རིག་པའི་མཁས་དབང་ཞིག་ཀྱང་ཡིན་འདུག

སྲིད་སྐྱོང་མཆོག་གིས་སྐབས་དེར་བོད་ཕྱི་ནང་གཉིས་ཀྱི་ད་ལྟའི་གནས་སྟངས་དང་། བོད་ནང་གི་ཁོར་ཡུག  ཆབ་སྲིད།  དེ་བཞིན་རྒྱ་ནག་གཞུང་གི་དབང་སྒྱུར་འོག་བོད་མིའི་སྤྱི་ཚོགས་ཀྱི་གནས་སྟངས་ལ་ཤུགས་རྐྱེན་ཇི་ལྟར་འཐེབ་བཞིན་པའི་སྐོར།   བོད་མིའི་རང་དབང་བསྐྱར་གསོའི་ལས་འགུལ་ལ་དམིགས་ནས་འབྱུང་འགྱུར་བོད་མིའི་འཐབ་རྩོད་ཀྱི་འཆར་སྣང་སྐོར་འགྲེལ་བརྗོད་རྒྱ་ཆེ་གནང་འདུག

སྤྱིར་དུས་སྟོན་ཐོག་གཏམ་བཤད་གནང་སྐབས་རྒྱ་གར་ཉམས་ཞིབ་པ་དང་། མཁས་དབང་། ཤེས་ཡོན་མི་སྣ།  དེ་བཞིན་ས་གནས་བོད་མི་ཁག་གཅིག་བཅས་ཕེབས་ཡོད་པ་དང་། 

སྐབས་དེར་ས་གནས་བོད་མི་དང་རྒྱ་གར་ཁམས་པ་སོགས་ཀྱིས་སྲིད་སྐྱོང་མཆོག་གནམ་ཐང་ནས་ཕེབས་སྐབས་ཁྲོམ་སའི་མདུན་ནས་ཕེབས་ལམ་དུ་སྲོལ་རྒྱུན་གྱི་ལམ་ནས་ཕེབས་བསུའི་སྣེ་ལེན་གཟབ་རྒྱས་ཞུས་འདུག 

དུས་སྟོན་དབུ་འབྱེད་གཏམ་བཤད་སྒྲུབ་རྗེས་སྲིད་སྐྱོང་མཆོག་སྒོ་མང་དགའ་ལྡན་ཀུན་སྐྱོབ་གླིང་ Gomang Gadhan Kunkyop Ling དུ་གནས་གཟིགས་དང་མི་མང་ཚོགས་ཁང་ནང་ས་གནས་བོད་མི་ཚོར་བཀའ་ཤག་གི་ལྟ་གྲུབ་དང་། རྒྱལ་སྤྱིའི་ནང་བོད་དོན་གྱི་གནས་འབབ། བཀའ་ཤག་གི་འདས་པའི་ལོ་བདུན་ལྷག་ནང་བཙན་བྱོལ་བོད་མིའི་ཤེས་ཡོན་དང་།  དཔལ་འབྱོར། རིག་གཞུང་སོགས་ཀྱི་ཐོག་ལ་གྲུབ་འབྲས་ཇི་བྱུང་སྐོར་དང་། ལྔ་དང་ལྔ་བཅུའི་འཆར་སྣང་སོགས་ཀྱི་སྐོར། ཉེ་འཆར་གྲོས་ཚོགས་ནས་བཙན་བྱོལ་བོད་མིའི་འོས་བསྡུའི་སྒྲིག་གཞིར་བསྐྱར་བཅོས་ཇི་གནང་སོགས་ཞིབ་ཕྲ་འགྲེལ་བརྗོད་གནང་རྗེས་མང་ཚོགས་ཀྱི་དྲི་བར་ལན་འདེབས་གནང་ཡོད།