༢༠༡༨ ཟླ་ ༡༠ ཚེས་ ༢ རེས་གཟའ་མིག་དམར།

༄༅། །བོད་མིའི་སྒྲིག་འཛུགས་བཀའ་ཤག་སྐབས་བཅོ་ལྔ་པའི་དབུ་ཁྲིད་ལམ་སྟོན་འོག་ ༢༠༡༨ ལོ་འདི་བཞིན་རྒྱ་གར་གཞུང་མང་གཉིས་ལ་ཐུགས་རྗེ་ཆེ་ཞུའི་ལོར་སྲུང་བརྩི་ཞུ་རྒྱུའི་ལས་འགུལ་གྱི་ཆ་ཤས་སུ་ཕྱི་ཟླ་ ༡༠ ཚེས་ ༢ ཉིན་རྒྱ་གར་གྱི་མེས་པོ་དམ་པ་བདག་ཉིད་ཆེན་པོ་གཱན་དྷི་མཆོག་གི་སྐུའི་འཁྲུངས་སྐར་དུས་ཆེན་དང་སྟབས་བསྟུན། བོད་མི་བཙན་བྱོལ་བ་རྣམས་ཀྱིས་རྒྱ་གར་དབུས་གཞུང་གི་གཙང་བཟོའི་ལས་འགུལ་Swachh Bharat Abhiyaan ཞེས་པར་རྒྱབ་སྐྱོར་དང་རྒྱ་གར་གཞུང་མང་གཉིས་ཀྱི་བཀའ་དྲིན་མཚོན་སླད་ཉིན་བརྒྱ་དུས་གཅིག་ཏུ་སོ་སོའི་གནས་ཡུལ་གྱི་ཉེ་འཁོར་ཁོར་ཡུག་གཙང་བཟོའི་ལས་འགུལ་རྒྱ་ཆེ་སྤེལ་ཡོད།

དེ་ཡང་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་མཆོག་གིས་ཕྱི་ཚེས་ ༡ ཉིན་གཙང་བཟོའི་ཉིན་མོར་བོད་མི་རྣམས་ཀྱིས་ཆ་ཤས་བླང་དགོས་པའི་འབོད་སྐུལ་གནང་དོན། “སང་ཉིན་མེས་པོ་དམ་པ་གཱན་དྷི་མཆོག་གི་སྐུའི་འཁྲུངས་སྐར་ཉིན་མོར་རྒྱ་གར་གཞུང་གིས་གཙང་བཟོའི་ལས་འགུལ་སྤེལ་བཞིན་ཡོད་པ་ཚང་མས་མཁྱེན་གསལ་རེད།  འདི་ལོར་མཚོན་ན་བོད་མིའི་སྒྲིག་འཛུགས་ཀྱིས་རྒྱ་གར་གཞུང་མང་གཉིས་ལ་ཐུགས་རྗེ་ཆེ་ཞུའི་ལས་འགུལ་སྤེལ་བཞིན་ཡོད། དེར་བརྟེན་སང་ཉིན་བོད་མིའི་སྒྲིག་འཛུགས་ཀྱིས་རྡ་སའི་ཉེ་འཁོར་ཁོར་ཡུག་གཙང་བཟོའི་ལས་འགུལ་སྤེལ་རྒྱུ་ཡིན་སྟབས་རྒྱ་གར་ནང་དུ་བོད་མི་ས་གནས་གཞིས་ཆགས་དང་རྒྱ་གར་གྱི་གྲོང་ཁྱེར། དེ་བཞིན་གྲོང་གསེབ་སོགས་ས་གནས་གང་དུ་གནས་ཡོད་ཀྱང་བོད་མི་ཚོས་དེ་ཉིན་རང་གི་ཉེ་འཁོར་གྱི་ཁོར་ཡུག་གཙང་བཟོའི་ལས་འགུལ་ཐོག་རུ་ངར་ལྡན་པའི་ཐོག་ནས་ཚང་མས་ངེས་པར་དུ་ཆ་ཤས་བླང་རོགས་ཞུ་རྒྱུ་ཡིན། གང་ཡིན་བརྗོད་ན་ཞལ་ནས་ཐུགས་རྗེ་ཆེ་ཞུའི་ཚིག་སྐམ་པོ་ཙམ་མིན་པར་དངོས་སུ་ལག་ལེན་ཐོག་ནས་རྣམ་འགྱུར་ཞིག་སྟོན་ཐུབ་ཚེ་རྒྱ་གར་ལ་རྣམ་འགྱུར་དང་བརྡ་ལན་བཟང་པོ་ཞིག་གཏོང་ཐུབ་རྒྱུ་རེད། “ཅེས་གསུངས།