༢༠༡༨ ཟླ་ ༩ ཚེས་ ༢༨ རེས་གཟའ་པ་སངས།
༄༅། །ཉེ་ལམ་བོད་ནང་དུ་རྒྱ་ནག་གཞུང་གི་བྱེད་ཕྱོགས་དེར་འགྲེལ་བརྗོད་ཇི་ལྟར་བྱེད་མིན་ལ་མ་ལྟོས་པར་བོད་ཐོག་ཕྱོགས་ཡོངས་ནས་འཆར་གཞི་ཧ་ཅང་རྒྱ་ཆེ་གཏིང་ཟབ་འཛིན་བཞིན་ཡོད་པ་ནི་ཧ་ཅང་གསལ་པོར་མངོན་བཞིན་ཡོད། དེ་ཡང་རྒྱ་ནག་གཞུང་གིས་བོད་མཐོ་སྒང་དུ་དམག་དོན་རྒྱ་སྐྱེད་བཏང་ནས་རྒྱ་གར་ས་མཚམས་ཐོག་དཔུང་འཇུག་བྱ་རྒྱུ་དང་། རྒྱ་རིགས་གནས་སྤོ་བྱ་ཡུལ། རྒྱ་ནག་གི་དཔལ་འབྱོར་ཁྲོམ་རར་དགོས་མཁོ་ཆེ་བའི་རང་བྱུང་ཐོན་སྐྱེད་ཀྱི་འབྱུང་ཁུངས་ཤིག་ཏུ་བཟོ་རྒྱུ་བཅས་ཡིན།
རྒྱ་ནག་གི་འཆར་གཞི་གཅིག་ནི་ ”རྒྱུད་གཅིག་ལམ་གཅིག་” ཟེར་བ་དེ་ཡིན་ཞིང་། འཆར་གཞི་དེའི་འོག་ནས་བག་ཚ་སྤུ་ཙམ་མེད་པའི་ཐོག་ལྷོ་ཨེ་ཤི་ཡའི་ནང་རྒྱ་ནག་གི་སྟོབས་ཤུགས་ཇེ་ཆེར་གཏོང་རྒྱུ་དེ་རེད། དམིགས་ཡུལ་དེ་བསྒྲུབ་ཆེད་བོད་དེ་རྒྱ་ནག་གི་ལག་ཆར་བཀོལ་བཞིན་པ་ནི་བོད་ནས་བལ་ཡུལ་བར་མེ་འཁོར་ལྕགས་ལམ་འཛུགས་འཆར་དེས་མཚོན་ཐུབ། འཆར་གཞི་དེ་དག་ཚང་མ་སྐུལ་འདེད་བྱེད་མཁན་ཤུགས་རྐྱེན་གཙོ་བོ་རྒྱ་ནག་གཞུང་གིས་༸གོང་ས་༸སྐྱབས་མགོན་ཏཱ་ལའི་བླ་མ་མཆོག་གི་༸སྐུའི་ཡང་སྲིད་ཐག་གཅོད་བྱ་རྒྱུའི་བདག་དབང་ཐོབ་ཐབས་བྱ་རྒྱུའི་ཀུན་སློང་དེ་ལ་བརྟེན་ནས་བྱུང་བ་ཞིག་རེད། འཆར་གཞི་དེ་དག་རྒྱ་ཆེ་ལ་རྡོག་དྲིལ་ཞིང་། ཕུགས་ཀྱི་དམིགས་འདུན་གཅིག་ཁོ་ན་ཡིན།
ཉེ་ལམ་བོད་ནང་རྒྱ་ནག་དཔོན་རིགས་མཐོ་གྲས་གཉིས་ཀྱིས་གཅིག་མཇུག་གཉིས་མཐུད་བྱས་ནས་ལྟ་སྐོར་བྱས་པ་དང་། “ཏཱ་ལ་ཁ་བྲལ་ལ་ངོ་རྒོལ་” ཟེར་བའི་ལས་འགུལ་ཤུགས་ཆེ་རུ་གཏོང་བཞིན་པ་དེ་ནི། རྒྱ་ནག་གཞུང་གིས་མ་འོངས་པར་སྤྱི་ནོར་༸གོང་ས་༸སྐྱབས་མགོན་ཏཱ་ལའི་བླ་མ་མཆོག་གི་༸སྐུའི་ཡང་སྲིད་གནད་དོན་ཐག་གཅོད་བྱ་རྒྱུའི་བདག་དབང་ཐོབ་ཐབས་བྱེད་པའི་སྲིད་བྱུས་ཤིག་ཡིན་པར་རྒྱལ་སྤྱིའི་གསར་འགྱུར་བརྒྱུད་ལམ་ཁག་གིས་ཚོད་དཔག་བྱེད་བཞིན་ཡོད།
༢༠༡༨ ཟླ་ ༡ ཚེས་ ༡༡ ཉིན་ཀྲུང་གུང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གིས་“ནག་སེལ་གཤེད་བཅོམ་གྱི་ཆེད་དོན་འཐབ་རྩོད་སྤེལ་རྒྱུའི་སྐོར་གྱི་བརྡ་ཐོ་”ཟེར་བ་བརྒྱུད་རུལ་སུངས་ལ་གདོང་ལེན་བྱེད་སྒོ་སྤེལ་ནས། སྤྱི་ཚོགས་བརྟན་ལྷིང་སྲུང་སྐྱོབ་ཆེད་མང་ཚོགས་ནས་ནག་ཕྱོགས་ཀྱི་སྟོབས་ཤུགས་སྤེལ་བའི་ལས་འགུལ་དང་ལས་བྱེད་རུལ་སུངས་ཡོད་པ་རྣམས་དུས་ཐོག་གཞུང་ལ་བརྡ་ལན་སྤྲོད་དགོས་པའི་འབོད་སྐུལ་བྱས་ཡོད།
༢༠༡༨ ཟླ་ ༢ ཚེས་ ༧ ཉིན་བོད་རང་སྐྱོང་ལྗོངས་ཀྱི་སྤྱི་བདེ་ལས་ཁུངས་ཀྱིས་རུལ་སུངས་དང་གཞུང་དང་ལྟ་ཚུལ་མི་མཐུན་མཁན། དེ་བཞིན་གཞུང་གིས་ངོས་འཛིན་མེད་པའི་ཆོས་ལུགས་ལྷན་ཁང་ལ་ཁ་ཕྱོགས་ནས་ངོ་རྒོལ་གྱི་ལས་འགུལ་སྤེལ་བཞིན་པ་དེ་ད་ཆ་ “ཏཱ་ལའི་རུ་ཚོགས་” ལ་འཐབ་འཛིང་གི་ལས་འགུལ་ཞིག་ཏུ་བསྒྱུར་བ་རེད། “ཏཱ་ལའི་རུ་ཚོགས་”ཀྱིས་ཆོས་དད་ཀྱི་བག་ཆག་བཀོལ་སྤྱོད་བྱེད་པ་བརྒྱུད་མི་དམངས་ཀྱི་བསམ་བློ་ཁ་སྒྱུར་བྱེད་པ་དང་། དམངས་ལ་རྒྱུད་སྐུལ་བྱེད་པ་བརྒྱུད་ཀྲུང་གུང་ཀྲུང་དབྱང་དང་མི་དམངས་དབར་འགལ་ཟླ་བཟོས་ནས་ཏང་གི་ཁྲིམས་བཟོ་དང་ཤེས་ཡོན་གྱི་ལས་དོན་སོགས་གཞི་རིམ་སྲིད་བྱུས་ལ་ཐེ་བྱུས་བྱེད་བཞིན་ཡོད། དེར་བརྟེན་མང་ཚོགས་ནས་ “ཏཱ་ལའི་རུ་ཚོགས་ཀྱིས་རྒྱུད་སྐུལ་བྱེད་བཞིན་པའི་ནག་ཕྱོགས་ཀྱི་སྟོབས་ཤུགས་འོག་ཁ་བྲལ་གྱི་ལས་འགུལ་སོགས་ནམ་ཡང་སྤེལ་རྒྱུ་མེད་”པའི་འབོད་སྐུལ་བྱས་ཡོད། དབུ་མའི་ལམ་གྱི་སྲིད་བྱུས་ཀྱི་ཉེས་སྐྱོན་སྐོར་གླེང་སློང་ཙམ་ཡང་བྱེད་ཚེ་ཁྲིམས་འགལ་དུ་བརྩི་བཞིན་ཡོད། བཀའ་བརྒྱ་ཨང་བཞི་པ་ཟེར་བ་དེས་ “མང་ཚོགས་ཀྱིས་ “ཁྲིམས་འགལ་གྱི་ཚོགས་སྡེ་ཁག་” དང་ལྷན་ལག་སྦྲེལ་བྱ་རྒྱུ་མེད་པ་དང་། “ཁྲིམས་འགལ་གྱི་ཚོགས་སྡེ་” དེ་དག་གི་རྒྱུད་སྐུལ་བྱས་པར་བརྟེན་དབུ་མའི་ལམ་ཟེར་བ་དང་། ཕ་སྐད་སྲུང་སྐྱོབ་ཟེར་བའི་རྒྱལ་ཞེན་གྱི་བསམ་བློ་གུ་དོག་ལ་བརྟེན་ནས་མང་ཚོགས་ཀྱི་རྒྱུད་རློམ་བཞིན་ཡོད།“ བོད་ནང་ “ཁྲིམས་འགལ་གྱི་ཚོགས་སྡེ་” དེ་དག་གིས་བོད་མིའི་མགྲིན་ཚབ་བྱས་ནས་བོད་མིའི་རིག་གཞུང་དང་གོམས་གཤིས། ཁོར་ཡུག འཚོ་བའི་མདུན་ལམ་སྲུང་སྐྱོབ་བྱེད་ཁུལ་བྱེད་བཞིན་ཡོད།”ཅེས་འཁོད། སྤྱིར་བཀའ་བརྒྱ་ཨང་ལྔ་པ་ཟེར་བའི་ནང་ “ཁྲིམས་འགལ་གྱི་ཚོགས་སྡེ་ཁག” དེ་དག་ནི་ནག་ཕྱོགས་ཏཱ་ལའི་རུ་ཚོགས་དང་ཕྱི་སྡོད་བོད་མིའི་སྟོབས་ཤུགས་རེད་” ཅེས་འཁོད་ཡོད། ཨ་སྒོར་ཐེར་འབུམ་བདག་པོ་རྒྱ་རིགས་བརྒྱ་སྟོང་མང་པོས་རང་གི་རྒྱུ་ནོར་ལོངས་སྤྱོད་དང་ནང་མི་བཅས་པ་ཕྱི་རྒྱལ་ནུབ་ཕྱོགས་དུ་ཕུགས་འདུན་བཟང་པོ་ཞིག་ལ་དམིགས་ནས་གནས་སྤོ་བྱེད་བཞིན་ཡོད་ཀྱང་བོད་མི་ཚོས་༸གོང་ས་༸སྐྱབས་མགོན་ཏཱ་ལའི་བླ་མ་མཆོག་གིས་གཙོས་བསྟན་བདག་བླ་ཆེན་རྣམས་ལ་སྐྱབས་རྟེན་སོགས་འབུལ་རྒྱུ་ཙམ་ལའང་དམ་བསྒྲགས་བྱེད་བཞིན་ཡོད། ད་བར་ཁྱོན་བཀའ་བརྒྱ་ ༢༢ བཏང་ཟིན། བཀའ་བརྒྱ་བཏང་བ་དེ་དག་ཀློག་སྐབས་རྒྱ་ནག་གཞུང་གིས་བོད་ནང་དབང་སྒྱུར་བྱེད་ཐུབ་ཀྱི་མེད་པའི་རྣམ་པ་གསལ་པོར་མཐོང་། མི་དམངས་རྣམས་ལ་ “གྲོང་དཔོན་ངན་རུལ་དང་ཡུལ་གྱི་གཤེད་མ། ཚུལ་བཙན། ལས་བཙན། ཁྲོམ་བཙན་གྱི་ལས་དོན་སྤེལ་རིགས་རྣམས་འཐེར་འདོན་དགོས་པའི་འབོད་སྐུལ་བྱས་ཡོད།
བོད་རང་སྐྱོང་ལྗོངས་སྤྱི་སྡེ་ལས་ཁང་གིས་ “ནག་ཚོགས་ངན་སྤྱོད་ཀྱི་ངོ་བོ་ལྡན་པའི་ཁྲིམས་འགལ་ཉེས་གསོག་གི་བྱ་འགུལ་རིགས་སྤེལ་བ་རྣམས་འཐེར་འདོན་དགོས།” ཞེས་པ་འདི་ནི་བོང་བུ་དེད་མཁན་ཚོར་དབྱུག་པ་དང་གུང་ལ་ཕུག་བཅས་འཇམ་རྩུབ་ཀྱི་ཐབས་ལམ་གཉིས་ཡོད་པ་ལྟར་གསལ་བསྒྲགས་འདི་བོད་མི་བོང་བུ་ཚོར་མདུན་གྱི་དབྱུག་པ་ཆགས་ཡོད་ཅིང་། དབྱུག་པ་འཁྱེར་ནས་བོང་བུ་དེད་མཁན་རྒྱ་མི་ཚོས་གུང་ལ་ཕུག་ཡིན་ཁུལ་བྱེད་བཞིན་པ་ཞིག་རེད། དེ་ཡང་བོང་བུ་དེད་མཁན་གཉིས་ཏེ་སྲིད་བློན་ལི་ཁི་ཆང་ཅན་ནི་བོད་ནང་སྐོར་སྐྱོད་བྱེད་མཁན་རྒྱ་ནག་གི་སྲིད་བློན་ཆེས་ཐོག་མ་ཆགས་ཡོད། རྒྱ་ནག་དབུས་འཐབ་ཕྱོགས་གཅིག་གྱུར་གྱིས་བོད་ཀྱི་ལས་དོན་ཐོག་སྲིད་བྱུས་ལག་བསྟར་བྱེད་ཕྱོགས་ཐད་སློབ་སྟོན་བྱེད་མཁན་རྒྱ་ནག་རྒྱལ་ཡོངས་སྲིད་གྲོས་ཀྱི་ཚོགས་གཙོ་ཝང་དབྱང་ཁོ་པས་ཉེ་ལམ་བོད་ནང་ལག་རྟགས་འཁྱེར་ནས་ཡོང་བ་རེད།
ལག་རྟགས་དེ་དག་གང་ཡིན་བརྗོད་ན་བོད་ནང་སྔར་ཡོད་འཛུགས་སྐྲུན་ཤུགས་ཆེ་བྱེད་བཞིན་པའི་ཁར་ད་དུང་རྒྱ་སྐྱེད་གཏོང་རྒྱུ་དེ་རེད། དེ་ཡང་གཞུང་ལམ་དང་གནམ་ཐང་གསར་རྒྱག ཁྲིན་ཏུ་ནས་ལྷ་སའི་བར་མེ་འཁོར་ལྕགས་ལམ་གསར་འཛུགས་བྱ་རྒྱུ་ཡིན་འདུག། དེ་ཡང་ལྕགས་ལམ་དེ་རྒྱ་གར་ནས་ལྟ་སྐབས་འཕགས་བོད་ས་མཚམས་བྱང་ཤར་དང་། བོད་ནས་ལྟ་སྐབས་ལྷོ་ཤར་ས་མཚམས་སུ་འཁེལ་བར་བརྩི་ཆོག འོན་ཀྱང་ས་ཁུལ་དེ་དག་ནང་རྒྱ་ནག་དང་བོད་ཡོངས་ནང་གཏེར་རིགས་འདྲ་མིན་ཕོན་ཆེ་ཤོས་ཡོད་པའི་ས་ཁུལ་ཞིག་ཡིན། རྒྱ་ནག་གཞུང་གི་འཛུགས་སྐྲུན་ལས་གཞི་དེ་དག་ལ་འགྲོ་གྲོན་མ་དངུལ་ཨ་སྒོར་ཐེར་འབུམ་དགུ་བཅུ་གོ་བདུན་གནས། ལས་གཞི་དེ་དག་ཟིན་མཚམས་རྒྱ་རིགས་ཡུལ་སྐོར་སྤྲོ་འཆམ་པ་བོད་ནང་འགྲུལ་བཞུད་བྱེད་སྟབས་བདེ་རུ་འགྲོ་ངེས། སྔ་ལོར་མཚོན་ན་རྒྱ་ནག་སྐམ་ས་ནས་བོད་ནང་རྒྱ་རིགས་ཡུལ་སྐོར་སྤྲོ་འཆམ་པ་ས་ཡ་ཉི་ཤུ་རྩ་དྲུག་སླེབས་ཡོད། བོད་ནང་འཛུགས་སྐྲུན་ལག་རྟགས་ཀྱི་ལན་ལ་རྒྱ་ནག་གཞུང་གིས་བོད་མིའི་བློ་སེམས་བཀུག་ཏེ། པེ་ཅིང་གཞུང་གི་དབང་སྒྱུར་ལ་ངོས་ལེན་དང་ཁོར་ཡུག་འབགས་བཙོག་ཤུགས་ཆེ་ཡོད་པའི་རྒྱ་ནག་སྐམ་ས་ནས་རྒྱ་རིགས་ཕོན་ཆེ་བོད་དུ་གནས་སྤོ་བྱ་རྒྱུར་མོས་མཐུན་ཐོབ་པ་བྱ་རྒྱུ་དེ་ཡིན། ལི་ཁི་ཆང་གིས་ ༢༠༡༨ ཟླ་ ༧ ཚེས་ ༢༥ ནས་ ༢༧ བར་བོད་ནང་ལྟ་སྐོར་སླེབས་པའི་དམིགས་ཡུལ་གཙོ་བོ་ནི་མི་རིགས་མཐུན་འབྲེལ་དང་རྒྱ་ཧན་མི་རིགས་ཆེན་པོའི་རིང་ལུགས་ནང་བོད་མི་གྲངས་ཉུང་མི་རིགས་མཉམ་བསྲེས་ཇེ་ཤུགས་ཆེ་རུ་གཏོང་རྒྱུ་ཡིན།
༢༠༡༨ ཟླ་ ༨ ཚེས་ ༢༤ ནས་ ༢༦ བར་ཝང་དབྱང་བོད་དུ་སླེབས་པའི་དམིགས་ཡུལ་ནི་རྒྱ་ནག་ནང་གི་ཆོས་ལུགས་ཚང་མ་ཀྲུང་གོའི་ཁྱད་ཆོས་ལྡན་པ་ཞིག་བཟོ་རྒྱུ་དང་ཁ་བྲལ་རིང་ལུགས་ལ་འཐབ་རྒོལ། དབུལ་ཕོངས་ངལ་སེལ། བོད་བརྒྱུད་ནང་བསྟན་རྒྱ་ནག་སྤྱི་ཚོགས་རིང་ལུགས་དང་མཐུན་པ་ཞིག་བཟོ་ཐབས་བྱ་རྒྱུ་བཅས་ཡིན།
ལན་འདེབས་ཚོགས་ཆུང་ནས།
༢༠༡༨ ཟླ་ ༩ ཚེས་ ༡༨
བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཐུབ་བསྟན་བསམ་འཕེལ་ལགས་ཀྱིས་བརྩམས། ཕྱི་དྲིལ་བོད་ཡིག་ཚན་པས་ཕབ་སྒྱུར་ཞུས།
