ཕྱི་ལོ་ ༢༠༡༨ ཟླ་ ༩ ཚེས་ ༢༤ རེས་གཟའ་ཟླ་བ།

༄༅། །ནུབ་ཧི་མ་ལ་ཡའི་གོ་རྟོགས་དང་ཡར་རྒྱས་ཚོགས་པའི་ Western Himalayan Society for Awareness and Upliftment གོ་སྒྲིག་འོག་ཕྱི་ལོ་ ༢༠༡༨ ཟླ་ ༩ ཚེས་ ༢༢ དང་༢༣ བཅས་ཉིན་གྲངས་གཉིས་རིང་ཧི་མཱ་ཅལ་མངའ་སྡེའི་པ་ལམ་པུར་གྲོང་སྡེའི་ནང་རྟེན་གཞི་བྱས་པའི་ས་རོ་ཝེར་པོར་ཊི་ཁོ་ RS Sarover Portico ཞེས་པའི་གསོལ་མགྲོན་ཁང་དུ་དེང་རབས་གྲོང་ཁྱེར་འཛིན་སྐྱོང་གི་ཐོག་རྒྱལ་ཡོངས་བགྲོ་གླེང་ཞིག་ཚོགས་ཡོད་པ་དང་།

སྐབས་དེར་བོད་མིའི་སྒྲིག་འཛུགས་ཀྱི་འཕྲོད་བསྟེན་བཀའ་བློན་ཆོས་སྐྱོང་དབང་ཕྱུག་མཆོག་སྐུ་མགྲོན་གཙོ་བོར་ཆེད་ཕེབས་གནང་ཡོད། དེ་ཡང་རྒྱལ་ཡོངས་བགྲོ་གླེང་ཚོགས་དགོས་པའི་དམིགས་ཡུལ་གཙོ་བོ་ནི། རྒྱ་གར་གཞུང་གི་ལམ་སྟོན་འོག་བཞུགས་སྒར་རྡ་རམ་ས་ལའི་གྲོང་སྡེ་དེ་བཞིན་དེང་རབས་ཅན་གྱི་གྲོང་ཁྱེར་ལ་ཇི་ལྟར་བསྒྱུར་དགོས་སྐོར་གྲོས་བསྡུར་གནང་རྒྱུའི་ཆེད་རེད། འཕྲོད་བསྟེན་བཀའ་བློན་མཆོག་གིས་བགྲོ་གླེང་དབུ་འབྱེད་ཞུས་པ་དང་སྦྲགས་དེང་རབས་གྲོང་ཁྱེར་འཛིན་སྐྱོང་གི་ཐོག་གསུང་བཤད་གནང་ཡོད་པ་མ་ཟད། སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་ཐུགས་བསྐྱེད་དམ་བཅའ་བཞིའི་སྐོར་དང་འཛུགས་སྐྲུན་ཡར་རྒྱས། ཁོར་ཡུག་གཙང་བཟོའི་སྐོར་གསུང་བཤད་གནང་ཡོད། དེ་བཞིན་བོད་མིའི་སྒྲིག་འཛུགས་ནས་བཞུགས་སྒར་རྡ་རམ་ས་ལའི་གྲོང་སྡེ་དེང་རབས་ཅན་གྱི་གྲོང་ཁྱེར་ལ་བསྒྱུར་བར་རམ་འདེགས་ཇི་ལྟར་བསྒྲུབ་དགོས་པའི་སྐོར་གསུང་བཤད་གནང་ཡོད་པ་བཅས། །