༢༠༡༨ ཟླ་ ༩ ཚེས་ ༢༠ རེས་གཟའ་ཕུར་བུ།
༄༅། །ཕྱི་ལོ་ ༢༠༡༨ ཟླ་ ༩ ཚེས་ ༡༩ ཉིན་འཇར་མན་བོད་དོན་རྒྱབ་སྐྱོར་ཚོགས་པ་ Tibet Initiative Deutschland དང་། དགའ་ལྡན་ཕོ་བྲང་ཟུང་འབྲེལ་གྱིས་འཇར་མན་གྲོང་ཁྱེར་ཌམ་སི་ཌ་ Darmstadt ཞེས་པའི་ནང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དབུ་བཞུགས་ཐོག ནོ་བེལ་ཞི་བདེའི་གཟེངས་རྟགས་བཞེས་མྱོང་མཁན་པོ་ལེན་ཡུལ་གྱི་སྲིད་འཛིན་ཟུར་པ་སྐུ་ཞབས་ལེག་ཝ་ལེ་ས་ Lech Welesa མཆོག་དང་། དེ་སྔ་པོ་ལེན་ཡུལ་དུ་དམར་ཤོག་ཚོགས་པ་མགོ་རྟིང་སློག་མཁན་ཆིག་སྒྲིག་ལས་འགུལ་ཚོགས་པའི་ Solidarnosch ཚོགས་མི་དང་། རྒྱལ་སྤྱིའི་རྡུལ་ཕྲན་མཚོན་ཆ་རྩ་མེད་ལས་འགུལ་ཚོགས་པའི་ཚོགས་གཙོ་ནོ་བེལ་ཞི་བདེའི་གཟེངས་རྟགས་༼༢༠༡༧༽ ཐོབ་མྱོང་མཁན་ལྕམ་སྐུ་རེ་བྷེ་ཀ་ཇོན་སོན་ Rebecca Johnson མཆོག་བཅས་ལྷན་འཛོམས་ཐོག དཀའ་རྙོག་སེལ་ནས་ཡར་རྒྱས་ཀྱི་ཕྱོགས་སུ་གོམ་པ་མདུན་སྤོས་བྱ་རྒྱུའི་ཐབས་ལམ་ཉག་གཅིག་ནི། འཚེ་མེད་ཞི་བའི་ཐབས་ལམ་ཡིན་སྐོར་མགྲིན་གཅིག་ཏུ་གསུང་ཡོད།
གཞན་ཡང་སྐབས་དེར་འཇར་མན་གྲོས་ཚོགས་ཀྱི་ཚོགས་གཞོན་ལྕམ་སྐུ་རོ་ཐི་ Claudia Roth མཆོག་དང་། ཧེ་སེ་ Hesse state མངའ་སྡེའི་དཔལ་འབྱོར་བཀའ་བློན་མཆོག གྲོང་ཁྱེར་ཌམ་སི་ཌ་ Darmstadt གྲོང་སྡེའི་སྤྱི་ཁྱབ་པ་སྐུ་ཞབས་ཇོ་ཆེན་པ་ཆ་Jochen Partsch མཆོག བོད་མིའི་སྒྲིག་འཛུགས་ཀྱི་དྲིལ་བསྒྲགས་དྲུང་ཆེའི་གནས་རིམ་ཚད་མཉམ་ཤར་གླིང་བསྟན་འཛིན་ཟླ་སྒྲོན་ལགས་བཅས་ཀྱིས་འཚེ་མེད་ཞི་བའི་ཐབས་ལམ་སྐོར་དང་། ལྷག་པར་ཤར་གླིང་ཟླ་སྒྲོན་ལགས་ཀྱིས་གཞིས་བྱེས་བོད་མི་རྣམས་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་འཚེ་མེད་ཞི་བའི་ཡང་དག་པའི་ལམ་སྟོན་དབུ་ཁྲིད་ཉག་གཅིག་འོག མ་གྲོས་བསམ་པ་གཅིག་མཐུན་གྱིས་རྒྱ་ནག་དམར་པོའི་སྲིད་གཞུང་གིས་དྲག་གནོན་ཇི་ཙམ་བྱས་ཀྱང་བློ་རྩེ་བརྟན་པོའི་ཐོག་ནས་འཚེ་མེད་ཞི་བའི་ཐབས་ལམ་འབའ་ཞིག་རྒྱུན་སྐྱོང་འོག་ད་བར་བོད་ཕྱི་ནང་གཉིས་སུ་ཞི་བའི་ལས་འགུལ་སྤེལ་དང་སྤེལ་མུས་ཡིན་སྐོར་ཞིབ་ཕྲ་གསུངས།
དེ་བཞིན་པོ་ལེན་ཡུལ་གྱི་སྲིད་འཛིན་ཟུར་པ་སྐུ་ཞབས་ལེག་ཝ་ལེ་ས་ Lech Welesa མཆོག་གིས་གསུང་དོན། ” ངའི་མི་ཚེའི་རིང་འདིར་བོད་མིའི་འཐབ་རྩོད་ལ་རྒྱལ་ཁ་རྒྱུར་བའི་རེ་བ་བྱེད་བཞིན་ཡོད། ཕན་ཚུན་མཉམ་དུ་ལས་འགུལ་སྤེལ་བ་ཡིན་ན་ནུས་པ་ཤུགས་ཆེ་བ་འཐོན་རྒྱུ་རེད། བོད་དོན་ལ་རྒྱབ་སྐྱོར་མ་བྱེད་ནས་བསྡད་པ་ཡིན་ན་དངོས་གནས་ངོ་ཚ་དགོས་པའི་གནས་ཚུལ་ཞིག་རེད། ཅེས་གསུངས།
ཕྱོགས་མཚུངས་ལྕམ་སྐུ་རེ་བྷེ་ཀ་ཇོན་སོན་ Rebecca Johnson མཆོག་གིས་ “བོད་མིའི་ཆོད་སེམས་ལ་ངས་བསྔགས་བརྗོད་ཞུ་བཞིན་ཡོད། འཚེ་མེད་ཞི་བ་བརྗོད་སྐབས་ནུས་པ་མེད་པ་ལྟ་བུ་ཞིག་མ་རེད། ང་ཚོ་ཚང་མས་ཆིག་སྒྲིལ་ཐོག་ནས་བོད་མི་དང་བོད་དོན་ལ་རྒྱབ་སྐྱོར་གནང་བ་ཡིན་ན་བོད་རང་དབང་སྐྱར་གསོ་ཡོང་ཐུབ་ངེས་རེད།”ཅེས་གསུངས།
འཇར་མན་གྲོས་ཚོགས་ཀྱི་ཚོགས་གཞོན་ལྕམ་སྐུ་རོ་ཐི་ Claudia Roth མཆོག་གིས་ “༸གོང་ས་ཏཱ་ལའི་བླ་མ་མཆོག་དང་བོད་མི་ཚོར་མཚོན་ན་ང་ཚོར་ཧ་ཅང་གལ་གནད་ཆེན་པོ་ཆགས་ཡོད། གང་ཡིན་བརྗོད་ན་བོད་མི་ཚོས་འཚེ་མེད་ཞི་བའི་ལས་འགུལ་སྤེལ་བ་བརྒྱུད་འཚེ་བའི་སྟོབས་ཤུགས་ལས་འཚེ་བ་མེད་པའི་སྟོབས་ཤུགས་ལ་ནུས་པ་ཆེ་བ་ཡོད་པ་གསལ་འདོན་མཛད་བཞིན་ཡོད། དེར་བརྟེན་༸གོང་ས་ཏཱ་ལའི་བླ་མ་མཆོག་དང་བོད་མིའི་འཚེ་མེད་ཞི་བའི་ལས་འགུལ་ནི་འགྲོ་བ་མི་རིགས་ཡོངས་ལ་ལེགས་སྐྱེས་ཤིག་ཆགས་ཡོད། ༸གོང་ས་ཏཱ་ལའི་བླ་མ་མཆོག་ལ་མཚོན་ན་མཐོང་གྲོལ་འཛུམ་༸ཞལ་མཇལ་བ་ཙམ་གྱིས་ཡིད་ཀྱི་གདུང་བ་དང་རྨོངས་པ་ལས་སེལ་ཐུབ། “ཅེས་གསུངས།
གཞན་བོད་མིའི་སྒྲིག་འཛུགས་ཀྱི་དྲིལ་བསྒྲགས་དྲུང་ཆེའི་ཚད་མཉམ་ཤར་གླིང་བསྟན་འཛིན་ཟླ་སྒྲོན་ལགས་ཀྱིས་ “བོད་མི་སྤྱི་སྒེར་སུ་འདྲ་ཞིག་ཡིན་ཡང་བོད་དོན་འཐབ་རྩོད་ཀྱི་ལས་འགུལ་སྤེལ་སྐབས་དུས་རྟག་ཏུ་འཚེ་མེད་ཞི་བའི་ལྟ་གྲུབ་ལ་གཞི་རྩ་བརྟན་པོར་བཟུང་ནས་རྒྱ་ནག་གཞུང་གིས་བོད་ས་བཙན་བཟུང་བྱས་པ་དེར་གདོང་ལེན་བྱེད་བཞིན་ཡོད། ལས་འགུལ་དེས་འཚེ་མེད་ཞི་བ་བརྗོད་སྐབས་ནུས་པ་མེད་པ་ཞིག་མིན་པའི་ར་སྤྲོད་བྱེད་བཞིན་ཡོད། གལ་ཏེ་གཞིས་བཞུགས་བོད་མི་ཚོས་མི་ལོ་ ༦༠ རིང་རྒྱ་ནག་གི་མནར་གཅོད་དང་གདུག་རྩུབ་ལ་འཚེ་མེད་ཞི་བའི་ལམ་ནས་བཟོད་བསྲན་དང་གདོང་ལེན་བྱེད་ཐུབ་ཀྱི་ཡོད་ན། གལ་ཏེ་རྒྱ་ནག་གཞུང་གིས་འཛིན་བཟུང་དང་དམར་གསོད་གཏོང་བཞིན་པ་སོགས་ལ་འཇིགས་ཞུམ་རྩ་བ་ནས་མེད་པར་མུ་མཐུད་འཐབ་རྩོད་བྱེད་ཐུབ་ཀྱི་ཡོད་ཚེ་ང་ཚོ་རང་དབང་ལུང་པའི་ནང་ཡོད་མཁན་ཚོས་དུས་ནམ་ཡང་སེམས་ཤུགས་ཆགས་མི་རུང་། ང་ཚོས་སོ་སོའི་རང་དབང་དང་། མང་གཙོའི་ཁོར་ཡུག་ལོངས་སུ་སྤྱད་ནས་འབད་བརྩོན་ངེས་པར་དུ་བྱེད་དགོས།”ཞེས་འབོད་སྐུལ་ཤུགས་ཆེ་གནང་འདུག །
