ཕྱི་ལོ་ ༢༠༡༨ ཟླ་ ༩ ཚེས་ ༡༣ རེས་གཟའ་ཕུར་བུ།
༄༅། །ཤེས་རིག་མདུན་ལམ་སློབ་སྟོན་ཚན་པའི་གོ་སྒྲིག་འོག་བོད་མིའི་སྒྲིག་འཛུགས་ཀྱི་ཤེས་རིག་བཀའ་བློན་པདྨ་དབྱངས་ཅན་མཆོག་གིས་ཕྱི་ལོ་ ༢༠༡༨ ཟླ་ ༩ ཚེས་ ༡༢ ཉིན་རྒྱ་གར་ལྷོ་ཕྱོགས་སྦེལ་ཀོབ་ལུགས་བསམ་བོད་མིའི་གཞིས་ཆགས་ཀྱི་མི་མང་ཚོགས་ཁང་ནང་སློབ་ཕྲུག་གི་མདུན་ལམ་དང་འབྲེལ་བའི་འདུ་འཛོམས་ཐེངས་གསུམ་པའི་མཛད་སྒོ་དབུ་འབྱེད་གནང་། དབུ་འབྱེད་མཛད་སྒོའི་ཐོག་བཀའ་བློན་མཆོག་གིས་སློབ་ཕྲུག་གི་མདུན་ལམ་དང་འབྲེལ་བའི་འདུ་འཛོམས་དེ་ལྟ་བུ་གོ་སྒྲིག་ཞུས་པའི་དགེ་མཚན་དང་འབྲེལ་བའི་སྐོར་གསུང་དོན།
འདུ་འཛོམས་འདི་བརྒྱུད་སློབ་ཕྲུག་རྣམས་ནས་རང་གི་མ་འོངས་མདུན་ལམ་མ་ནོར་བ་ཞིག་ཐག་གཅོད་བྱེད་ཐུབ་པ་མ་ཟད། མཐོ་སློབ་ཁག་གི་སློབ་ཕྲུག་རྣམས་ཀྱི་སྐུ་ཚབ་རྣམས་དང་ཐུག་འཕྲད་ཀྱིས་རང་ཉིད་ཀྱི་དོགས་པ་རྣམས་སེལ་ཐུབ་ཀྱི་ཡོད། ཅེས་དང་། སློབ་ཕྲུག་རྣམས་ཀྱིས་ཐེངས་འདིའི་མདུན་ལམ་དང་འབྲེལ་བའི་འདུ་འཛོམས་སྟེང་མཉམ་ཞུགས་ཀྱིས་གོ་སྐབས་བེད་སྤྱོད་ཡག་པོ་གཏོང་དགོས་པའི་ལམ་སྟོན་གསུང་བཤད་གནང་།
ཤེས་རིག་ལས་ཁུངས་ཀྱི་མདུན་ལམ་སློབ་སྟོན་ཚན་པའི་འགན་འཛིན་སྒྲོལ་དཀར་དབང་མོ་ལགས་ཀྱིས་སློབ་ཕྲུག་གི་མདུན་ལམ་དང་འབྲེལ་བའི་འདུ་འཛོམས་གོ་སྒྲིག་ཞུ་དགོས་པའི་དགོས་དམིགས་ནི། སློབ་ཕྲུག་རྣམས་ལ་མཐོ་སློབ་ཁག་གི་སྐུ་ཚབ་རྣམས་དང་ཐུག་འཕྲད་བྱེད་རྒྱུའི་སྡིངས་ཆ་སྐྲུན་ཐབས་དང་། སྡིངས་ཆ་འདི་བརྒྱུད་སློབ་ཕྲུག་རྣམས་ནས་མཐོ་སློབ་ཁག་ལ་སློབ་འཇུག་བྱེད་སྟངས་ཀྱི་བརྒྱུད་རིམ་དང་སློབ་ཡོན་སོགས་ཀྱི་སྐོར་ཤེས་རྟོགས་ཐུབ་ཀྱི་ཡོད་པ་མ་ཟད། སློབ་གྲྭ་ཐོན་རྗེས་མཐོ་སློབ་གང་ཞིག་འདེམ་དགོས་མིན་ཐད་ལའང་རམ་འདེགས་བྱེད་ཐུབ་ཀྱི་ཡོད། ཅེས་གསུངས།
མེ་སོར་དང་སྦེང་ལོར་གྲོང་ཁྱེར་ཁུལ་གྱི་ཆེད་ལས་མཐོ་སློབ་ཁག་ ༡༧ ཙམ་གྱི་སྐུ་ཚབ་རྣམ་པ་སློབ་ཕྲུག་གི་མདུན་ལམ་དང་འབྲེལ་བའི་འདུ་འཛོམས་ཐོག་མཉམ་ཞུགས་ཀྱིས་སོ་སོའི་མཐོ་སློབ་སྐོར་ངོ་སྤྲོད་གཏམ་བཤད་གནང་ཡོད།
སྦེལ་ཀོབ་དང་ཀོལ་ལི་གྷལ། ཧོང་སུར་བཅས་ཀྱི་སམ་བྷོ་ཊ་སློབ་གྲྭ་དང་བོད་ཁྱིམ་སློབ་གྲྭ་བཅས་ཀྱི་འཛིན་གྲྭ་ ༩ ཡན་གྱི་སློབ་ཕྲུག་གྲངས་ ༥༠༠ དང་། ཕ་མ་གྲངས་ ༥༠ ལྷག་ཐེངས་འདིའི་འདུ་འཛོམས་ཐོག་མཉམ་ཞུགས་གནང་ཡོད་པ་མ་ཟད། སློབ་ཕྲུག་ཚོས་སོ་སོའི་མདུན་ལམ་དང་འབྲེལ་བའི་སྐོར་དྲི་བ་དྲིས་ལན་གྱི་ལམ་ནས་གོ་རྟོགས་རྒྱ་ཆེ་བྱུང་ཡོད།
མཐར་ས་གནས་ཀྱི་མདུན་ལམ་སློབ་སྟོན་པ་འཇམ་དབྱངས་དབང་རྒྱལ་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་སྟེ་མཛད་སྒོ་གྲོལ་ཡོད་པ་བཅས། །
