ཕྱི་ལོ་ ༢༠༡༨ ཟླ་ ༩ ཚེས་ ༡༡ རེས་གཟའ་མིག་དམར།

༄༅། །བོད་མིའི་སྒྲིག་འཛུགས་ཀྱི་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་ཨ་རིའི་གྲོང་ཁྱེར་ལོ་སི་ཨེན་ཇི་ལེ་སི་ Los Angeles ནང་རྟེན་གཞི་བྱས་པའི་རྒྱལ་སྤྱིའི་བྱམས་བརྩེ་ཉམས་ལེན་འབྲེལ་མཐུད་ཁང International Network of Love-in-Action དང་ཡོངས་ཁྱབ་ནང་པའི་ཤེས་ཡོན་ཐེབས་རྩ་ཁང་ Universal Buddhists Education Foundation གཉིས་ཀྱིས་གོ་སྒྲིག་གནང་བའི་ནང་བསྟན་དང་ཚོང་ལས་ཐོག་རྒྱལ་སྤྱིའི་ནང་པའི་མཛའ་འབྲེལ་གླེང་སྟེགས་ཞེས་པའི་ཚོགས་འདུའི་སྟེང་ཆེད་ཕེབས་གནང་ཡོད་པ་མ་ཟད། བྱང་ཨ་རིའི་ཁ་ལི་ཧྥོར་ནི་ཡ་ California མངའ་སྡེའི་བོད་རིགས་སྤྱི་མཐུན་ཚོགས་པའི་ཚོགས་འདུའི་ཐོག་སྐུ་མགྲོན་གཙོ་བོར་ཕེབས་ཡོད།

སྐབས་དེར་དམིགས་བསལ་སྐུ་མགྲོན་བཀའ་ཟུར་པདྨ་ཆོས་འབྱོར་ལགས་ཕེབས་ཡོད། དེ་ཡང་ཐེངས་འདིའི་ཚོགས་འདུའི་དགོས་པ་དམིགས་ཡུལ་ནི། རྒྱལ་སྤྱིའི་ནང་པའི་མཛའ་འབྲེལ་ཚོགས་པའི་ས་གནས་ཡན་ལག་ཚོགས་པ་ཁག་གི་ཚོགས་མི་རྣམས་མཉམ་འཛོམས་ཀྱིས་ནང་བསྟན་དང་ཚོང་ལས་ཐོག་བསམ་ཚུལ་བརྗེ་ལེན་དང་གོ་རྟོགས་ཀྱི་ཆུ་ཚད་གོང་མཐོར་གཏོང་རྒྱུའི་ཆེད་དམིགས་པ་ཞིག་རེད། ཕྱི་ཚེས་ ༩ ཉིན་ཚོགས་འདུ་གྲོལ་བ་དང་བསྟུན་ཆོས་རིག་བཀའ་བློན་མཆོག་ལོ་སི་ཨེན་ཇི་ལེ་སིའི་གྲོང་ཁྱེར་ནང་རྟེན་གཞི་བྱས་པའི་ནང་པའི་ཆོས་ཚོགས་ཁག་བཞི་ལ་གཟིགས་སྐོར་དུ་ཕེབས་ཡོད་པ་བཅས། །