ཕྱི་ལོ་ ༢༠༡༨ ཟླ་ ༨ ཚེས་ ༡༤ རེས་གཟའ་མིག་དམར།
༄༅། །ཕྱི་ལོ་ ༢༠༡༨ ཟླ་ ༨ ཚེས་ ༡༤ རེས་གཟའ་མིག་དམར་ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བཞུགས་སྒར་དུ་༸ཞབས་སོར་བདེ་བར་འཁོད་ཡོད།
དེ་ཡང་གོང་ཚེས་ཉིན་གྱི་ཕྱེད་ཡོལ་ཆུ་ཚོད་ ༡༢།༣༠ ཡོལ་ཙམ་མགོན་པོ་གང་ཉིད་མཆོག་རྒྱ་གར་གྱི་རྒྱལ་ས་ལྡི་ལི་ནས་མཁའ་ལམ་བརྒྱུད་རྡ་སའི་ཉེ་འགྲམ་གྷ་གྷལ་གནམ་ཐང་དུ་༸ཞབས་སོར་བདེ་བར་འཁོད་སྐབས་བོད་མིའིསྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་དང་། བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དང་། བདེ་སྲུང་བཀའ་བློན་བླ་བྲང་འཕགས་པ་ཚེ་རིང་མཆོག་སོགས་ཀྱིས་ཕེབས་བསུའི་སྣེ་ལེན་གཟབ་རྒྱས་ཞུས་ཡོད།
སྐབས་དེར་མགོན་པོ་གང་ཉིད་མཆོག་གིས་ཕྱི་ནང་གི་གསར་འགོད་པ་རྣམས་ལ་བཀའ་སློབ་སྩལ་དོན། ཐོག་མར་ལ་དྭགས་ལ་ཕྱིན། ལ་དྭགས་ནི་ས་མཐོ་བོ་ཡིན་སྟབས་ཡུན་རིང་པོ་བསྡད་པ་ཡིན། ཐེངས་འདིར་ལྡུམ་ར་དང་། ཟངས་དཀར། ཀར་གྷིལ་དུ་ཕྱིན་པ་དེ་ཏོག་ཙམ་མང་དྲགས་འདུག ངོས་རང་ད་ཆ་ལོ་ན་ ༨༣ བསླེབས་པར་བརྟེན་ལུས་པོས་ཏོག་ཙམ་ཚོད་ཟིན་ཟེར་གྱི་འདུག
སྤྱིར་ཡག་ཐག་ཆོད་བྱུང་། ངོས་ཀྱིས་རྒྱུན་དུ་བསྟན་པ་དང་འགྲོ་བར་ཕན་ཐོགས་བྱུང་ན། ཞེས་སྨོན་ལམ་རྒྱག་བཞིན་པ་ལྟར་ཕན་ཐོགས་གང་ཙམ་བྱུང་སོང་། རླུང་འཕྲིན་འདི་བརྒྱུད་ནས་བོད་ཕྱི་ནང་གཉིས་ཀྱི་བོད་མི་རྣམས་བློ་བདེ་པོ་བྱས་ནས་སྡོད་རོགས། ངོས་རང་ད་ཆ་རྡ་སར་འབྱོར་ནས་ངལ་གསོ་ཡག་པོ་ཞིག་རྒྱག་རྒྱུ་ཡིན། ཞེས་བཀའ་སློབ་སྩལ།
དེ་ནས་རྒྱ་གར་གྱི་གསར་འགོད་པ་ཞིག་གིས་༸གོང་ས་༸སྐྱབས་མགོན་ཆེན་པོ་མཆོག་ས་གནས་གང་སར་ཡུན་རིང་པོ་དེ་འདྲ་ཇི་ལྟར་ཚིབས་སྒྱུར་མཛད་ཐུབ་མིན་བཀའ་འདྲི་ཞུས་པར་མགོན་པོ་གང་ཉིད་མཆོག་གིས་དེ་འདྲ་ཡོང་ཐུབ་པ་ནི་གཙོ་བོ་སེམས་ནང་ཞི་བདེ་ཡོད་པར་བརྟེན་ནས་ཁྱད་པར་ཧ་ཅང་ཡོད་སྐོར་བཀའ་ལན་སྩལ།།
